الموضوع: توكيل كيا ....انا زعلان منك !!!!

تفتكرو كام مرة عملت كيا اعلان عن العربية السيراتو مثلا... يتعدو على الايد الواحده
صفحة كاملة فى ملحق سيارات علشان اعلان شهاده صيانة عارفين تكلفته كام رقم كبير يتعدى الخمسين الف جنيه تقريبا .

اتصلت بالشركة.... ياجماعه ايه الاعلان ده الرد ان الاعلان ده خاص بالعربيات الخليجى فقط انما عربيات الوكيل ملهاش دعوة بالاعلان ده ..... طبعا سبق واتكلمنا فى الموضوع ده قبل كده

فكرو معايا ايه غرضه ............ ما تفكرو ....اللى ماشفش الاعلان فى اول سطر فيه

الان لكل مالكى سيارت كيا فى مصر يمكنك ان تستفيد بمزايا شهادة صيانة كيا المعتمدة من الشركة المصرية العالمية للتجارة والتوكيلات وكيل كيا الوحيد فى مصر

تفتكرو الكلام موجه لمين ....ها عرفتو ( يا عم اخلص ... حاضر ) الكلام موجهه لشخص واحد بس

هو شركة كيا الام فى كوريا ( لكل عملاء كيا فى مصر ) لسببين :

الاول : ان الاعلان اللى كان فى الاول كان موجه وخاص بسيارات كيا المستوردة من الخليج بالامتناع عن صيانة السيارة وبالتالى بعد ما حصلت مشاكل من الشركة الام بسبب الشكاوى المقدمة كان الرد بهذا الاعلان اننا مش بنفرق بين السيارات وبنفس حجم الصفحة كما كان فى الاعلان اللى فات

الثانى : سبب اعلانى بس عن التوكيل بسبب الكلام اللى بيدور فى سوق السيارات ان فى عربيات كتير مقلوبة اتباعت كازيرو وبسب سيارات التاكسى الصفرا اللى اترشت بلون اسود واتباعت كانها جديده وبسبب المبيعات الرهيبة لماركة العربية وبالتالى الاستعداد للهجوم القادم لان سوق السيارات فيه حتان وملايين ومليارات من الجنيهات تفتكرو هسيبو توكيل واحد ياكل كل التورته .
وترقبو كمية الاعلانات اللى هتنزل الفترة الجاية اللى هى فترة الاجازة للناس اللى جايين من بره وموسم البيع للعربيات

اسئلة للمراجعه على الدرس السابق عشان نشوفك فهمت ولا لأ؟

1- اذكر العامل المشترك فى السببين ؟؟

الاجابة الشركة الام فى كوريا

2 - : لماذا لم تضع قيمة شهادة الصيانة فى الاعلان ؟؟

الاجابة : انت عاوزنى اقول انى هدخل العربيات الصيانة واخد 4000 ج على السيراتو والكارينز ده غير المصنعية وحق قطع الغيار دى كانت مصر ولعت فيا

3 - : ماذا ستفعل فى السيارات القادمة من الخليج مع احد ملكيه ( ليبيا - السعودية - الكويت ) الزائرين لمصر خلال فترة الصيف ؟ هل لو حصل عطل فى اى سيارة يتم شراء الشهادة ؟
الاجابة : ازاى طبعا هيدخلو ومش بعيد هتكون ببلاش برضه احنا مصر بلد الوجب كله

السؤال الثالث : ماذا ستفعل فى سيارات الوكيل نفسه هل ستقدم نفس الخدمات والمميزيات التى قدمتها لسيارت الخليجى من اسعاف الطريق - فحص مجانى مرتين فى السنة - الخ ......؟؟؟؟

الاجابة : مش كفاية انى بعملهم صيانة ببلاش ولما يبقى فى مشكلة يبقو يتصرفو هما خلينا بس نخلص من وجع الدماغ بتاع الخليجى امال هاخد منهم 4000 ج ليه مش علشان الخدمتين دول

السؤال الرابع : ماذا ستفعل مع الحاجزين للسيارت منذ اكثر من اربع شهور وخصوصا مع قرب نزول موديلات 2011 ( يعنى لو حد حجز فى شهر 8 مثلا هيستلم على شهر 11 مثلا هياخد برضه 2010 وبنفس السعر )

الاجابة : استنى اطلع البرشام كده ........ اه ..هنقلهم هنعمل صيانة مجانى ليكم وهنشيل حق الصيانة لحد العشرين الف .. ايوة صح كده... يعنى هنعمل ايه اكتر من كده مش كفاية اننا بنبعلهم العربية هما كانو يحلمو

اسئلة للواجب (حلوها فى البيت يعني home work))

1 – هل تعتقد ان يوجد امل فى احد من التوكيل سيمر على هذا الموضوع ويكون لديه حجج لهذه الاستفسارات ؟؟ ام ان امل ربنا كرمها و اتجوزت ومش جايه عشان زوجها محرج عليها تخرج منالبيت ؟

2 - متى في رأيك سنجد حلا لهذه المشكله ان كنت تعتقد فى وجودها ؟ اما ان كنت لا تعتقدفى وجودها او مفهمتش( فحقك علينا يا عم الحج وهات راسك نبوسها)

3 - اكتب ما تعرفه عن الازمه فيما لا يزيد عن 4 سطور , موضحا رأيك بشكل يصف اللى انتفهمتوه , ولو مفهمتش اكتب 4 سطور قولنا انت مفهمتش ايه , يمكن حد يجي يفهمك ويفهمني
.

لا يسمح باستخدام الالة الحاسبة او اي نوع من انواعالجداول فى حل الاسئلة ومن يخالف ذلك مش هنعمله حاجه عشان محنش شايفنوه.

طبعا اللى هيحل صح يا ولاد فى جايزة وهى عبارة عن جايزة هتفوز برحلة سفارى انت والحج والحاجه للطريق الدائري مع اخوانك المواطنين المذنوقين هناك يوميا

ملحوظة/ للامانة فكرة الموضوع مقتبسه من موضوع اخر