دلوقت لما نوع معين من الادوية يتوقف انتاجه او يتأخر انتاجه من قبل الشركة لاي سبب كان
انتم بتشيلوا اللي متبقي عندكم كمخزون للمعارف ولا عشان يتباع اغلى بعد كدة ؟؟!!!!!!!
يعني هقول مثلا الاوميجا 3 بلس بئالو حوالي اسبوعين مش لاقياه
سألت عليه اكتر من مرة عند الصيدلية اللي بتعامل معاها وسألت عليه في كل الصيدليات الكبيرة والكل بيقول انه ناقص من الشركة نفسها ويقولوا يومين تلاته وهاينزل ومش بينزل
امبارح كنت عند الدكتورة وقالت لي ضروري كدة تاخديه ولسه المريضة اللي قبلك معاها جوزها صيدلي في الصيدلية الفلانية بيقول عنده
اجري حصليه وخدي منه حتى شريط واحد
روحت لقيت واحد غيره في الصيدلية وحاول يجيب لي بالتليفون من صيدليات زمايله لانه عارف اني محتاجاه ضروري
ومن سياق الحديث بينهم فهمت ان عندهم بس مش مستعدين يبيعوه
قلت افوت على الصيدلية اللي بتعامل معاها بنفسي واخد حتى شريط واحد
ملقتش غير الصيدلي الصغير اللي شغال في الصيدلية مش صاحبها
والله الكذب باين في عينيه وهو بيقول مفيش ويقول لي خلصان بقاله 3 أو 4 ايام مع اني بئالي اسبوعين اسألهم عليه
بجد اتفرست منه