هل لجرابات المحمول المغناطيسية تأثير سلبي على المحمول

**michohat** · 23-05-2010 12:34 AM

السلام عليكم ورحمه الله وبركاته
ازيكم يا جماعه
اخيرا وبعد لف كتير و طويل لقيت جراب شيك و كويس ونظيف (بيتقفل بمغناطيس) لتليفونى ال n97 mini و يا دوبك بدأت استعمله الا انى لاحظت وانا حاطط الموبايل فى الجراب ان مغناطيس الجراب بيمسك فى اى سطح معدنى و قوه مغناطيسية شديده حتى انى كنت بستغلها فى انى اثبت بيها سماعه البلوتوث بدل ما اشيلها فى حته تانيه ومن هنا بدئت افكر هل المغناطيسية دي ممكن يكون ليها تأثير سلبي على الجهاز مثلا
انا بفكر فى حته اننا لو سبنا مسمار جنب مغناطيس المسمار هيتمغنط فكده ممكن جسم الموبايل يتمغنط وخصوصا ان الموبايل عندى غطا البطارية معدن وكمان فكرت اكتر ان ده ممكن يأثر على البورده او اى تكوين داخلى فى الجهاز و يسبب تعطيله
وهل ان اشتريت الجراب الاصلى له هيكون احسن ( سعره 250 جنيه)
ده طبعا غير ان ممكن المغناطيس يأثر فى قوه اشارة الشبكه اللى واصله للجهاز

**M!SHO** · 23-05-2010 03:29 AM

معتقدش لان فيه تليفونات نازله بنفس الفكره

**pro_samir** · 23-05-2010 03:55 AM

انت فين يا عم مجدي مختفي لية

**michohat** · 23-05-2010 09:53 AM

المشاركة الأصلية كتبت بواسطة hesham_7amza

معتقدش لان فيه تليفونات نازله بنفس الفكره

المشاركة الأصلية كتبت بواسطة abdo_eldesokey

لا أعتقد أنه ضار .. أنا عندي في الموبايل القلم ممغنط عشان ميقعش ، والمغناطيس جنب الشاشة

وفيه بعض الموبايلات الـ flip بتستخدم مغناطيس لإغلاق الجهاز

إلى جانب إن الموبايل كله عبارة عن شبه موصلات semi-conductors ، ودي لا تتأثر بالمجال المغناطيسي

الي بيتأثر بالمجال المغناطيسي الهارد ديسك و الـ floppy disk ، والتلفيزيونات القديمة crt

والي حصل عندك في الموبايل إن فيه أجزاء معدنية في جسم الموبايل واتمغنطت

لكن مغناطيس صغير زي ده ميضرش الجهاز في حاجة

فإن شاء الله الجراب ده مفهوش مشكلة

اللى عندى لسه متمغنطش و اللى خلانى اشك فى ان المغناطيس بياثر على الجهاز انى جيت اشغل برنامج تحديد اتجاه القبله لقيت المؤشر بيلف بشكل جنونى و اتعدل اول ما فكيت الجراب فالقصد انى خايف احسن يكون له تأثير على الجهاز

المشاركة الأصلية كتبت بواسطة pro_samir

انت فين يا عم مجدي مختفي لية

اهه فى الدنيا والله و فى الشغل طول النهار والليل (بصلى اربع فروض فى الشغل) هوا القطاع الخاص كده بزنقاته و مشاكله انما منقولش غير الحمد لله وربنا يطلعنا منها على خير
كان نفسي اجى معاكم فى غارة فيلا الطويل بس مينفعش لانى شغال كل ايام الاسبوع مفيش اجازات

**Abdo_Eldesokey** · 23-05-2010 03:56 PM

آه صحيح .. انت عندك في الـ n97 بوصلة ، يبقى كده المغناطيس أكيد هيأثر عليها

**michohat** · 23-05-2010 11:33 PM

طب هل فى تاثير للمغناطيس على سماعات الموبايل ممكن مثلا يمغنطها او يسبب اى ضرر لانه ان كان بيأثر على البوصله فانا خايف يبقى ف تاثير ع مكونات الجهاز

**Abdo_Eldesokey** · 24-05-2010 06:14 AM

المشاركة الأصلية كتبت بواسطة michohat

طب هل فى تاثير للمغناطيس على سماعات الموبايل ممكن مثلا يمغنطها او يسبب اى ضرر لانه ان كان بيأثر على البوصله فانا خايف يبقى ف تاثير ع مكونات الجهاز

طبعاً السماعات فيها ملف لكنه صغير جداً ومش شرط يكون ممغنط ، إلى جانب المايك بردوا ساعات بيكون فيه ملف

لكن معظم الناس بيقولوا إنه مش بيتأثر

الموضوع فيه اختلافات كتيرة في الآراء على جوجل

بس أنا خلصت من البحث إن طالما المغناطيس مش كبير يبقى مش هيأثر على التليفون