الموضوع: تجارب الاعضاء مع شركات التأمين ؟ ( هام للغاية )

حسب معلوماتي موضوع السرقة بالتامين موضوع طويل ولة جوانب كثيرة لازممحاضر وبححث وبحث خاص من شركة التامين وحاجة زي المخبر لتقصي الحقيقة وموااااااااااااااال هيطول شوية
وبعدين تقدير القيمة الي اخرة
النفس الطويل شوية في موضوع السرقة لانة يختلف عن الحادث
ربنا يعوضك خير منها ...ولا تحزن عسي ان تكرهو شي وهو خير لكم
واحتسب عند الله

المشاركة الأصلية كتبت بواسطة tot

يا عم انت بتقوله يجيب الونش و يشيل العربية و بعدين بتقوله اوعى تحرك العربية
المفروض تتصل بالنجدة لو حادثة كبيرة هتعدي ال 5 الاف و ييجوا يعاينوا مكان الحادثة من غير ماحد يتحرك و بعدين تطلع القسم و تكمل المحضر و تاخد صورة مختومة منه و تاني يوم تعمل اخطار حادث فى الشركة و لازم يكون الاخطار فى خلال 72 ساعة م الحادثة و الا مالكش حاجة عندهم، و لو عملت الاخطار بالتليفون تاخد صورة منه
و فى المحضر يستحسن تقول عربية مجهولة خبطتك و طلعت تجري عشان لو فى طرف تاني المفروض هتستنى نتيجية التحقيقات لو هو اللي غلطان
و لو الشركة اللي انت مأمن فيها دي مش عاجباك ممكن تلغي الوثيقة و تاخد بقية فلوسك شوف باقيلك كام شهر ، بس بشرك ماتكونش طالبت باى حاجة من بداية الوثيقة

شكرا على المعلومات .
يا ليت تكتب رقم النجدة .

ايه يا باشا حد مايعرفش رقم النجدة، حضرتك مش عايش في مصر ولا ايه ،ع العموم هو 122 و المكالمة ببلاش يعني لو موبيلك مافيهوش رصيد اتصل عادي

مساء الخير

محدش يا جماعة عنده فكرة عن شركة قناة السويس للتامين؟؟

السلام عليكم،
الاخوة الأفاضل، كل سنة وانتم طيبين

قبل ما ابدأ احكي عن تجربتي مع بيت التأمين المصري السعودي عايز ابص معاكم على موضوع التأمين من وجهة نظر مختلفة.

أولا، عشان محدش يفهمني غلط انا مهندس إتصالات وشغال في مجال الشبكات، وعندي فيرنا سوداء مأمن عليها في الشركة المذكورة أعلاه.
انا رأيي ان مشاكل التأمين في مصر يتحملها الجانبين (الشركة والعميل)
1- الشركة: في الغالب بتكون عايزةالفلوس في اتجاه واحد بس ---- من العميل إلى الشركة وليس العكس. فبتكون السياسة العامة ليهم محاولة التملص من أي جزء من التكلفة قدر الامكان واستخدام كل الأساليب عشان ده يتحقق. وطبعا الأعتماد على جهل اغلب العملاء بالبنود السرية في الوثائق. حاحة كمان (ودي حسيتها مع الشركة اللي انا مأمن معاها) انهم بيتعاملوا مع العميل في البداية وكأنه صاحب الشركة، لكن لما بييجي يبلغ عن حادث لا قدر الله، بجد بتحس انك متهم بحاجة (تكشير وقلبة وش ومحاولة تزهيق...الخ)
2- العميل: السؤال اللي بس حابب كل واحد يسأله لنفسه هل لو العربية مش متأمن عليها، هتتعامل معاها بنفس الأسلوب بالظبط؟ أكيد محدش بيكون نازل من بيته وناوي انه يعمل حادثة، بس هل بيبذل كل المطلوب منه عشان يحافظ على عربيته، ولا بيقول عادي ما هي في شركة تأمين هي اللي تشيل الليلة؟ وعلى فكرة أنا أعرف اللي دخل بعربيه في سور عشان يغير الاكصدام وشوية حاجات... وأهرف اللي كسر بربريز عربيته عشان كان في نقرة طوبة صغيرة جدا واللي الفانوس اتشرخ فراح مكمل عليه... يعني بحس دايما أننا بصفة عامة بنستخدم بعض المميزات المتاحة لينا بشكل سيء .. اللي بيخليها تتقلب ضدنا مش ميزة لينا.


وعن تجربتي مع بيت التأمين المصري السعودي: انا مأمن معاهم من 12/ 2007 ولحد دلوقتي عملت عندهم حاجة واحدة بس وهي اني نزلت يوم أصلي الجمعة لقيت البربريز الخلفي مفروم ... رحت بلغت، مندوبهم عاين، وقالي اتفضل اعملها وهاتلنا الفاتورة واحنا نطلعلك الشيك بعدها مش عارف باسبوعين ولا ايه... المهم اتفاجأت طبعا ولأول مرة ان الوثيقة فيها نسبة تحمل 4 جنيه في الالف 0.4%من ثمن العربية اللي في الوثيقة (71000) يعني حوالي 280 جنيه طبعا دي كانت مفاجأة ليا... حسيت ساعتها طبعا اني اتنصب عليا...ولو العربية هتتعمل في التوكيل سيادتك تدفع الاول وبعدين هما يطلعولك شيك .... لكن لو هتعمل عند الورش المعفنة اللي هما بيتعاملوا معاها يبقى هما اللي يحاسبوا .... اسلوب حقير بردو

ليا بردو رأي أخير جايز يزعل مني ناس كتير (وخصوصا أصحاب مكاتب التأجير)، انا شايف ان المكاتب دي المفروض يكون ليها معاملة خاصة بأي شكل (نسب تحمل اعلى، مبلغ تأمين أكبر) لكن أنا شايف انه مش من العدل ان العربيات الايجار (وانتم عارفين العربيات دي بيحصل فيها ايه) تتعامل زيها زي عربية واحد بيحافظ عليها جدا (لانها ملكه وهو اللي بيسوقها)

أتمنى ان محدش يزعل مني، ولو رأيي ده زعل حد اتمنى انه يسامحني....ويتحمل راي مخالف لرأيه :)
لسة الموضوع ليه بقية لو أحيانا ربنا

أخوكم مهندس/ أحمد فؤاد