الله يخليك , أنا بس بحاول أشارك بشوية أفكار بسيطة يمكن تفيد حد من الزملاء في المنتدى
مدى توافر عناصر الإنتاج الرئيسية المطلوبة للمشروع :
طبعا عشان نعمل مشروع ناجح لازم يكون موقع المشروع اما قريب جدا من المستهلك أو قريب جدا من المواد الخام و لو قدرنا نكون قريبين جدا من الاتنين يبقى تمام قوي , بس ده صعب و حالات قليلة اللي بيكون الخامو السوق قريبين من بعض .
ايه الخامات المطلوبة للطوب الطفلي ؟
1- خامة الطفلة ... بس أنهي نوع من الطفلة ؟
الطفلة الموجودة في مصر أنواع تختلف على حسب الشوائب الموجودة فيها بس كلها مناسبة لصناعة الطوب الطفلي ماعدا اللي فيها شوائب كربونات كالسيوم عشان دي لما بتتحرق بتعمل أكسيد الكالسيوم و ده لما تيجي عليه مياه ممكن يكسر الطوبة و يبوظها تماما .. طبعا اللي هيحدد نوع الطفلة المعمل اللي هنعمل فيه اختبارات قبل ما نسجل المحجر. يعني نقطة مش خطيرة في المرحلة دي .
2- المياه ... لو طريقة التصنيع معتمدة على الماء هنحتاج مصدر مياه بكميات كبيرة لكن لو هنشتغل بالطريقة الجافة مش هنحتاج مياه .
3- الغاز الطبيعي .... أكتر مصدر للطاقة محتايجنه لأن استخدام الغاز الطبيعي هيوفر 45% من تكاليف الفرن عن الحرق باستخدام المازوت .
4- الكهرباء .... محتاجين كهرباء بطاقة عالية ( هنحسبها بالتفصيل لما نجيلها ) لأن المعدات ضخمة و مستهلكة للكهرباء .
5- تلفونات , انترنت , صرف صحي , صرف صناعي , ....
مدة تنفيذ المشروع ::::::::::
بافتراض وجود الأرض المدة الزمنية من بداية الانشاءات الى بداية اختبارات التشغيل تتراوح ما بين 8 الى 10 شهور بالكتير ...
طيب احنا لا عندنا ورق و لا شركة لسه هناخد وقت قد ايه ؟
بص يا باشا بما ان احنا في مصر دي حاجة متقدرش تحددها بالظبط لكن بالتقريب لو انت هتعمل شركة فردية او شراكة من أي نوع ممكن تخلص كل التصاريح و الأوراق خلال 4 أو 5 شهور منهم شهرين أو تلاتة لحد ما تاخد الموافقة من جهاز تنمية المنطقة الصناعية . كمان في الوقت ده انت تكون حددت هتشتري معدات المصنع من مين في مصر و لا هتستورد المعدات و لا هتستورد جزء و تشتري جزء و تصنع جزء كل ده على حسب رأس المال اللي انت عايز تحطه و على حسب المعدة نفسها.
كمان الكهرباء هتاخد حوالي شهر في أحسن الأحوال و المياه زيها بس دول ممكن تخلص ورقهم بعد ما تستلم الأرض و تبدأ الانشاءات
يعني تقريبا من 8 الى 10 شهور المحامي بتاعك مطحون و دايخ بين الهيئات الحكومية عشان التصاريح بس لو صعب عليك انت اللي هتدوخ فبلاش يصعب عليك قوي ...
طيب ايه هيه الهيئات دي اللي هندوخ فيها 4 أو 5 شهور ؟
خد عندك يا باشا
السجل التجاري
الشهر العقاري ( عشان التوكيل بتاع المحامي و المحاسب القانوني )
الضرايب العامة
الضرايب على المبيعات
السجل الصناعي
جمعية مواد البناء
جهاز المنطقة الصناعية
الدفاع المدني
وزارة الداخلية
الجيش ( عشان المحجر)
هيئة الآثار ( برضه عشان المحجر )
وزارة الصناعة
هيئة الاستثمار
جمعية المصدرين ( لو عايز تصدر )
هيئة كهربة الريف
شركة توزيع الكهرباء
شركة الغاز الطبيعي
شركة الاتصالات
التأمينات الاجتماعية
التأمين الصحي
مكتب العمل
هيئة الصرف الصحي
وزارة البيئة
ايه تاني ........ لسه اللستة فيها حاجات تاني لما أفتكرها هضيفها
طبعا المصاريف لكل الأوراق دي هتكون تحت بند مصاريف التأسيس لأن أغلبها بيدفع مرة واحدة ...
.
الحجم التقريبى للاستثمار :
ده طبعا متروك لسيادتك دي فلوسك و انت اللي هتحدد ممكن تستثمر فلوس قد ايه في المشروع ده .. لكن لو احنا عايزين نعمل مشروع متوسط الحجم ( طاقة انتاجية مليون طوبة سنويا ) هنحتاج معدات كالتالي :
1- صناعة مصرية ( معدات جديدة ) حوالي 2 مليون جنيه
2- صناعة مصرية ( معدات مستعملة ) حوالي 1 مليون جنيه
3- صناعة صينية ( جديدة ) حوالي 2 مليون جنيه
4- صناعة روسية ( جديدة و بالطريقة الجافة ) حوالي 4 مليون جنيه
5- صناعة غربية ( مستعملة ) حوالي 2 مليون جنيه
طبعا كل بند من دول ليه مميزات و عيوب ممكن نناقشها واحدة واحدة لكن ده مش موضوعنا دلوقتي .
عايزين نقدر تقريبا حجم الانشاءات المدنية ... اللي هيه ايه ؟
مبنى اداري , عنبر انتاج , مخزن مستلزمات انتاج , مبنى للعمال , أسوار , ميزان بسكول , ورش , مباني في المحجر ....
كل دول .حطلهم 2 مليون جنيه تاني ....
تعالى بقى نجمع كده المصروفات الاجمالية بالتقريب عشان نقدر نحدد حجم رأس المال مع الوضوع في الاعتبار مصروفات التأسيس و تمن الأرض .... مابين 4 و 7 مليون جنيه ....
.
نفقات التشغيل :::
مصروفات التشغيل هتكون اجمالي مرتبات و مصروفات الشركة و المصنع لمدة سنة لأن دي صناعة محتاجة وقت على ما تقدر تعمل اسم في السوق و ان كان من السهل تحقيق مبيعات جيدة من أول شهر من بدء التشغيل لكن متوسط المبيعات الشهرية مش هيغطي المصروفات الشهرية قبل 6 شهور عشان كده محتاجين عدد العمالة في المصنع يكون أقل ما يمكن و مدة التشغيل أقل ما يمكن عشان نقلل استهلاك الطاقة قدر الامكان , كمان مش عايزين نملى المخزن و مانلاقيش مكان نخزن فيه , و خلي بالك ان سوق المعمار في الصيف أكثر طلبا من الشتاء فلازم نظبط مواعيد بداية التشغيل قبل نهاية الشتاء عشان نقدر ناخد الموسم من أوله و تعمل اسم تقدر تبيع بيه في الشتاء و انت مستريح ...
طيب ايه حجم العمالة المطلوب ؟
الملف ده يوضح حجم العمالة الكلي في حالة التشغيل 3 ورادي يوميا كل وردية 8 ساعات
clay-bricks-staff.pdf
و في البداية يمكننا أن نبدأ بأقل من ربع العدد من باب توفير المصروفات و كمان عشان مفيش حجم الانتاج اللي محتاج العدد ده كله
محتاجين نعرف متوسط مرتبات الناس دي كلها :::::::::
مش عارف ازاي أعمل جدول هنا بس من الملف ده هتلاقي كله
clay-bricks-staff.docx
طبعا سيادتك أول ما هتشوف العدد و الأرقام هتقول عليا مجنون و بخرف و من كتر السهر مش عارف بكتب ايه ..... استنى بس يا صاحبي لو فاكر احنا قلنا في الأول ممكن نبدأ بربع العدد و كمان ممنك نختصر بعض الوظائف القيادية و طبعا ده على حسب ظروف كل مشروع و كمان المرتبات دي في المتوسط يعني ممكن تقل عن كده بس لو انت عايز طقم ادارة ممتاز اوعى تحاول توفر في المرتبات بتاعة قيادات الشركة ممكن تقلل عددهم و تشيل كل واحد أكتر من وظيفة بس لو عايز الشركة تنجح في وقت قياسي هات ناس خبرة و فاهمين على الأقل واحد خبرة في كل قسم . عشان انت اللي هترتاح بعد كده
كفاية كده النهاردة انا قربت أفصل و نكمل بكرة لو عايزين .................. مستني آرئكم في الجزء اللي فات ...
تصبحوا على خير
جهد مشكور جدا
بس 7 مليون جنية تكلفة مبدئية عايزة رجل اعمال مش شاب مبتدأ
عموما ربن يوفقك ولما تكمل ان شاء الله وبعدين نشوف مشروع من اللى قاتلك عليهم
بس يكون تكلفة الانشاء حاجة حنينة كدة
(من اللى بيقولوا عليها مشروعات صغيرة أو حتى متناهية الصغير )
وعلى فكرة نوعية المشروعات دى بدأت بيها الهند والصين و شوف حالهم ازاى دلوقتى
مستنى تخلص علشان نبدأ سوى وكلى حماس
يمكن ننفذ المشروع ونبقى رجال وسيدات اعمال كبار
والبركة فى نايل موتورز مش حننساه برضو
أغلب المشروعات اللي عملتلها دراسات كانت مشروعات كبيرة أصغرها راس ماله 3 مليون جنيه و كنت مسؤول عن الجانب الفني في الدراسات دي .. انا عارف انها مشروعات صعب جدا ان حد في المنتدى ياخد كلامي ده و يحوله لمشروع قبل ما يرجع لمكتب متخصص في اعداد دراسات الجدوى لأن ده هيكون مشروع كبير مش خسارة أدفع فيه 100 و لا 150 ألف لدراسة الجدوى بتاعته .
فيه مشروع كنت عملت الدراسة بتاعته و كان مطلوب مني عمل دراسة لمصنع ألمونيوم ( أدوات منزلية ) كان رأس ماله أقل من 500 ألف جنيه ممكن نناقشه مع بعض ...............
ممكن ناخد موافقة ادارة نايل موتورز و ننزل ماركة باسمهم من منتج هنعمله .....................
.
طيب لو فكرنا نبحث عن مشروع اصغر سوى
و نقرأ عنه و نتعلم
وبخبرتك فى دراسة المشاريع
نحاول ندرسة من الصفر
ايه رأيك عندك استعداد
طبعا
امال أنا لما لقيت أحد أعضاء المنتدى بيتكلم عن دراسة جدوى للمشروعات سخنت و قلت أقول معلومة عندي يمكن تفيد حد بيفكر يعمل مشروع ...
و لو انت قريت الموضوع كويس من الأول هتلاقيني كاتب ان دي مراحل اعداد دراسة الجدوى لأي مشروع مهما كان حجمه أو رأس ماله و الطوب الطفلي أنا حاطه هنا مثال عشان نفهم منه مع بعض مراحل الدراسة ازاي مش بعرض مشروع على حد يستثمر فيه , دي حاجة المنتدى مش مجالها , تسويق المشروعات ليه طرق و أسس مختلفة خالص عن اللي أنا بعمله هنا ...............................
مش عارف يمكن انت مفهمتش أنا قصدي ايه من الموضوع ده , و بكرر كلامي الموضوع ده مثال عملي و تجربة شخصية لمشروع صناعي معتمد على خامات طبيعية من البيئة المحيطة لعدد من المحافظات ..
و خلي بالك من حاجة المشروع الصناعي ينقسم لحاجة من اتنين :
1- معدات مكلفة جدا يقابلها خامات رخيصة و عمالة غير ماهرة
2- معدات رخيصة يقابلها خامات غالية و عمالة ماهرة مكلفة
مش هتلاقي مشروع صناعي رخيص , هتلاقي مشروع صناعي تكلفة انشاؤه قليلة بس خامات تشغيله مكلفة و معتمد على توفر عمالة ماهرة .... و درونا كمهندسين أو دارسين للمشروع تقليل التكاليف قدر الامكان و ايجاد منتج عالي الجودة في نفس الوقت ...........
اولا/ بالنسبة لسعر المتر بيعمل من 5000 الى 20000
على حسب المكان فى المعادى
بس ممكن اجيبلك ارض قريبة من المكان دة بس بسعر اقل
بس هاتكون خارجة عن نطاق المعادى تماما
يعنى فى المنطقة الصناعية فى عرب ابو ساعد
جنوب طريق الاوتوستراد من حلوان
والتراخيص سهلة والدنيا هناك زى الفل
وكمان فى اسماء شركات كبيرة هناك
وانا شايف ان دة انسب مكان قريب من منطقة حلوان والمعادى
وسعرة فى الحنين
وكمان كل الامكانيات والخدمات هناك متاحة ومتوفرة
لو فى كلام ممكن تتصل حضرتك على رقم موبايلى هابعتة لحضرتك على الخاص