الموضوع: أسئلة لأصحاب الجين 2

المشاركة الأصلية كتبت بواسطة IslamGen2

صراحة فرحت اوى لما لاقيت المنتدى دة ، قسم خاص بالكامل للجين تو والناس اللى فيه اصحاب العربية بنفسهم ، مش ناس تسوء سمعة العربية من غير ما يركبوها .

العربية صراحة جامدة آخر حاجة ، وداخلة دماغى اوى ، وكنت عاوز اسأل اذا كان حد اشتراها من المصرية للسيارات فى القاهرة ولا لأ ، لأنى بإذن الله ناوى اشتريها بالتقسيط ، انا عموما ً رحت لمعرض المصرية اللى فى ميدان الاسماعيلية ، واتكلمت مع واحد هناك ، قالى الفايدة 8.9% ، والسيارة مانيوال ب 85 ألف ، حسيت كدة إنه بيشتغلنى مش عارف ليه ...

- دى اول مرة اشترى أو أسوق فيها عربية ، فياريت تنصحونى ، ايه ياترى اجراءات التسليم فى المصرية ؟ ، وبستلمها من المعرض ولا الصحراوى ولا منين بالظبط ؟ ..

- بالنسبة للسعر انا قريت هنا إن الستاندارد إيديشن ب 80 ألف ، والسبورت ايديشن بتزود ألفين بس يعنى 82 ألف ، طب هى ازاى ب 85 ألف؟ وهل ال ب 85 ألف دى سبورت ولا ستاندارد ، لأن الراجل اللى كلمته فى المصرية دة تقريبا هو مش فاهم حاجة او بيشتغلنى ....

- انا ممكن استنى لغاية موديل 2008 ماينزل على اساس يكونوا تفادوا عيوب كتير ، بس لما آجى استلم ازاى اعرف إن العربية موديل 2008 مش 2007 مثلا ً ، ممكن يبعتونى بواحدة قديمة ...

- حاجة كمان الكاسيت بتاع العربية ، يعنى ايه أوديو سى دى وبتتعمل ازاى دى ؟ وبتشيل كام اغنية ؟ اقدر يعنى احط الاغانى اللى على الكومبيوتر على سى دى ؟ ، وسمعت إنه مش بيشغل إم بى ثرى ؟ أمال هيشغل ايه بالظبط ؟ ، دى مشكلة جامدة اوى ..

شكرا ً ..

السلام عليكم
أهلا بك يا أستاذ إسلام معنا في المنتدى
بالنسبة لأسئلة حضرتك و أستفساراتك
أسعار السيارة موديل 2007 كالآتي
81000 و ممكن تخلص على 80000 في حالة الدفع نقدا و من المقر الرئيسي لعز العرب بجوار داندي موة قبل بوابات ط القاهرة الأسكندرية
و السيارة الرياضية تزود من 2000 إلى 3000 جنيه تقريبا
بالنسبة لموضوع موديل 2007 و 2008 و العيوب
لو موديل 2008 هاينزل بنفس المحرك بتاع 2007 يبقى مفيش فرق كبير في المحرك و لا أي تجهيزات أخرى
أما لو موديل 2008 هاينزل بالمحرك الجديد سيكون أفضل بالطبع
أما موضوع العيوب
أولا العيوب ليست بالكارثة و ليست كثيرة و هذه العيوب وجدت في مودلي 2005 و 2006 و كانت عيوب بسيطة في التقفيل فقط
أما موديل 2007 لم يشتكي منه أحد اطلاقا
بالنسبة لموضوع القسط أسأل في التوكيل علشان أنت ممكن تقسط معاهم
بالنسبة لمعرفة سنة إنتاج السيارة
أولا بيكون مكتوب في ورق التخليص الجمركي و أيضا على رقاقة معدنية مثبتة عند باب السائق عليها بيانات السيارة و سنة الإنتاج ...... و تاريخ إنتهاء الصلاحية :p :p :p :D
-----------
كاسيت السيارة يقوم بتشغيل نوع من الاسطوانات يحمل في طياته حوالي 80 دقيقة من الغناء أو أي محتوى صوتي
يعني ممكن شريطين أو شريط و نص أو أكثر على حسب طول الأغاني الزمني
-----------
و ممكن حضرتك تعمل الاسطوانات دي على الكمبيوتر بواسطة برنامج نيرو لصناعة و حرق الاسطوانات
أو أي برنامج يحرق أو ينسخ أسطوانات ( في اللغة العربية حرق اسطوانة يعني نسخ اسطوانة )
و برضة الألبومات الجديدة بتتباع على اسطوانات أصلية و جاهزة للعمل مباشرة على أي جهاز مشغل اسطوانات و منهم الجهاز الخاص بالسيارة جين 2
....................
نقطة مهمة
عيوب السيارات ذات المحرك 1600
السيارة بتستهلك بنزين كتير في زحمة القاهرة الجميلة و يقل الاستهلاك و يكون عادي على الطرق السريعة الطوالي
--------------------
يبقى السيارات ذات المحرك 1300 مناسبة تماما للقيادة داخل المدينة و أيضا مناسبة للسفر
---------------------
أرجوا أن أكون أفادت حضرتك و ربنا يوفقك في شراء ما تصبوا إليه إن شاء الله