المشاركة الأصلية كتبت بواسطة MMamdouh
اكيد احنا بنرحب بيكى و بكل الاعضاء... مش عشان انتى بنت لكن عشان انتى عضو محترم فى مجتمعنا قبل كل شىء
يمكن لان العربيات من اهتمامات الجنس الخشن اكتر من الجنس الناعم فا كان طبيعى ان عدد البنات يبقى قليل... و غالبا زى ما قلتى البنات بتخش عشان تسال سؤال و بس فا مشاركتهم مش حتبقى كتير زى الرجال و بالتالى ممكن يبان ان مشاركتهم هامشية لكن هى فى الحقيقة مشاركة متلقى اكتر منها مشاركة ملقى
على فكرة القصة دى موجودة فى معظم منتديات السيارات مش نايل موتورز بس او فى مصر بس... انا افتكر فى السنين اللى فاتت كان فيه بنتين فقط فى دايوتك فورم و بنت واحدة على دايو تك ياهو جروب... و دول البنات اللى كانوا بيشاركوا فى المواضيع و يكتبوا رايهم و كدة لكن معم البنات التانية مكنش حد بيكتب الا لو عندة مشكلة
زى ما قلت دة اكيد راجع لطبيعة المنتدى اللى مرتبطة بالسيارات و بالتالى الجنس الناعم مبيبقاش مهتم اوى... حتى انتى اعجبتى بالروح اللى فى العام و الاجتماعى اكتر من المواضيع الفنية مثلا و كدة... و دا عادى و يمكن دة المنتدى الوحيد اللى لقيت فيه منتدى عام و اجتماعى و فيه هذا الكم من النشاط... يمكن عشان طبيعتنا كا مصريين او لسبب اخر بس فعلا دة المكان الوحيد اللى علاقة افرادة ببعض مش معتمدة على علاقة صاحب سؤال و مجيب للسؤال
انا شخصيا حسيت بكدة لما حصلتلى حادثة و بمكالمة تليفون لقيت الناس كلها جنبى و تليفوناتهم لم تنقطع للسؤال عنى بالرغم انى عمر ما شفت حد فيهم وجها لوجة و الحقيقة دة اكبر دليل على ان الرابط بينا مش عربيات و بس و دى حاجة كويسة
اما موضوع المعاملة بحذر و كدة فا دة ملوش علاقة بيكى لان الناس هنا محترمة بطبعها و دا العادى بتاعهم بغض النظر انتى بنت ولا لا... بالعكس انا لاحظت ان لو فيه موضوع عاملاه واحدة بنت بيبقى فيه ردود كتير و مساعدات كتير و دى طبيعة المصرى اللى بيبقى دايما شهم مع الجنس الناعم... لكن هما برضة جدعان اوى مع الرجالة
فى النهايه احب اقولك اهلا بيكى فى المنتدى و متحطيش فى دماغك اى فروق فى المعاملة و كدة لاننا كلنا اخوات فى الاول و الاخر
MMamdouh