دايو تيكو vs ماروتي 128 .. أي عربية فيهم أفضل وهل الـ800 سي سي مشكلة ؟؟؟

**TransParancy** · 03-06-2010 07:04 PM

[gdwl]بسم الله الرحمن الرحيم

ياجماعة انا عايز اخد رايكم في العربيات دي

انا عاجبني مواصفات الدايو تيكو الموديال 96 يعني هي سعرها عامل بين 17 : 19 ألف وفيها تكييف وسنتر
بس مشكلتها إنها 800 سي سي مش عارف إمكانيات موتورها إيه كمان يعني تستحمل مشوار من القاهرة للأسكندرية مثلا ؟ وموتورها نفسه يستحمل الجري ولا هيبقى صوته عالي ومشاكله كتير ..

وعايز أعرف الفرق بين الدايو تيكو الموديل96 وبين الماروتي من حيث أن الاتنين 800 سي سي ,, ومابين الدايو و128 كموتور وعربية بشكل عام وقطع غيار .. هو طبعا ال800 سي سي أقل في استهلاك البنزين لكن كموتور .. يعني انا بصراحة قلقان من أنها 800 سي سي بس حاسس انها هتبقى موتوسيكل مش عربية الواحد يعمل بيها مشاوير طويلة أو لو فكر يسافر بيها متسافرش ..

محتاج رأيكو جداًااااااااااا عشان اخد القرار النهائي لأني معروض عليا اتنين دايو تيكو واحدة ب19 وواحدة ب17 والاتنين موديل 1996 بس في واحدة حالتها زي الزيرو محتاجة حاجات بسيطة جدا من بره وواحدة محتاجة شغل كتير ..
[/gdwl]

**TransParancy** · 03-06-2010 08:20 PM

ياريت يا جماعة تفيدوني بأرائكو لأنها مهمة جداً بالنسة لي

**Raul_7** · 03-06-2010 09:52 PM

أنا كان معايا Tico زمان فترة.

هي فعلا 800 cc ولا 850 مش فاكر بس كانت 4 نقلات بس وكانت عند 120 بيبقى متورها صوته علي قوي وتحس إن شوية هوا بيلعبوك عالطريق...وسألني أنا عشان أنا كنت باخد المحور كل يوم.

التكييف بتاعها كان كويس عالطرق الطويلة, يعني مش هيقول لأ عالصحراوي...لكن كانت مبتقدرش تستحمل يوم زحمة جامدة في وسط البلد بالتكييف, كان لازم يتقفل.

آه وعلى فكرة كانت رخمة شوية في قطاع الغيار..يعني مرة اجيبلها حاجة من الماروتي ومرة من ماتيز, بس الحاجة مكنتش بلاقيها بسهولة.

بالنسبة للماروتي ما عنديش فكرة عنها بصراحة لا هي ولا ال 128.

بس نصيحتي ليك, وعن تجربة....بلاش التيكو.

تحياتي.

**TransParancy** · 03-06-2010 10:36 PM

120 وبتعلي صوتها ومش ثابتة .. انا كنت متوقع كدا والله من شكل العربية بس لأنها قليلة أوي وحاسس إن موتورها ال800 سي سي على قده جداً ..
هي كدا فعلا متنفعش معايا خالص لأني بروح اسكندرية مرتين في الشهر وطبعا لو بالشكل دا يبقى هروح اسكندرية في 10 ساعات :)) .. أنا هعمل بنصيحتك وخلاص هصرف نظر عن العربية دي ولا خاب من استشار .. ألف شكر ليك ..

وياريت لو حضرتك تعرف انواع عربيات كويسة تنفع في السفر وتستحمل مابين 15 : 20 ألف تقولي

**eng_ahmedryad** · 03-06-2010 11:36 PM

شوف كده الجولف 1 1400 سي سي لو ماعندكش مشكله تجيب تمنينات

**AMA** · 18-07-2010 07:38 AM

أسف جدا أنى رفعت الموضوع لكن برضة عشان أوضح لحضراتكم حاجة بتحصل و هيا النصب فى الموديلات النادرة زى التيكو و الداتشيا نوفا والامريكانى النادر و غيرهم و غيرهم و بيضربوا فى العلالى أوى و طبعا أغلبهم تجار يا أما واحد بيستغل أن عربيته سعر سوقها مش معروف بين الناس و فى الأخر المبرر الوحيد يقولك أنا مش مستعجل

دا أعلان و دى صورته تم مسح الرقم و الأيميل منه عشان متبقاش دعايه و سعرها 13 ألف و نص

ملحوظة بس
الأعلان دة بيتحط بقاله أكتر من شهرين و دا واضح أن العربيه كمان سوقها تقيله جدا

و يا جماعة خليكم مصحصحين شوية للأسعار دى ألاف بتطير فى الهوا يا أخوانا
واللهم بلغت اللهم فأشهد