الموضوع: تقييم الفانتازيا يا جماعة أخيرا

المشاركة الأصلية كتبت بواسطة amrsabet

انا بشكرك جداعلى ردك وياريت لو تفدينى بردك على بعض الاسئلة زى :

• استهلاك البنزين جوا البلد وخارجها فى الصفيحة 20 لتر بتعمل اد ايه

بصراحة محسبتش الإستهلاك لكن هي بشكل عام إستهلاكها ممتاز

• اخبار التكيف ايه معاك لو الجو حر اوى وبيقعد اد ايه وقت عشان يسقع العربية

تكييفها رائع وفي ظرف 3 دقايق تحس بيه بجد مهما كان الجو حر.

• السرعة القصوى 203 كم كانت فى طريق ايه والثبات كان ممتاز لحد سرعة كام وبعدين جيد من سرعة كام وهل بالتكيف ولا لأ ؟ ووقت اد ايه عشان تجمع على الطريق السريع يعنى بعد 100كم

السرعة دي كانت علي طريق مصر إسماعيلية والثبات ممتاز لحد 180 أو 190 كمان وتحكمك فيها هايل ( كنت بسيب الدريكسيون علي 160 ) بالنسبة للتجميع فبصراحة بردو محسبتش وقت.لكن أقدر أقولك إنها غير أي عربية.يعني التجميع بعد الـ 100 أحسن من التجميع بعد قبل الـ 100.

• انا سالت على الجنط 16 فى ارابكوم ولقيته ب 4000 من غير كاوتش هل ده كويس ولا ممكن بالثمن ده اجيب 17 استيراد او بسعر اقل من غير كاوتش

إستيراد أفضل من وجهة نظري بشرط حالته.

• البلوتوث صوته حلو ولا ايه

صوته حلو جدا وأحسن مكان تحط فيه التليفون درج الطابلوه الصغير اللي من فوق.الصوت بيكون نقي جدا ساعتها.

• الكراسى مريحة فى السفر ولا بتوجع الظهر.

هي بالنسبة ليا الحمدلله مش متعبة نهائي مع العلم إن أنا عندي مشكلة في ظهري.. وكراسيها حلوة كبيرة.

• هل فى محلات بتبيع قطع الغيار بره التوكيل وتكون قطع غيار اصلية

للأسف مقدرش أفيدك أوي لأن صيانتي في التوكيل علي طول...لكن اللي أقدر أقوله إن حاجتها مرمية في الحرفيين.

• هل فعلا اصوات الهواء بعد120 بسيطة زى الجيتا كده .

أنا سوقت الجيتا مرة بس معدتش الـ 90 بس لحد السرعة دي العربيتين زي بعض في العزل معرفش فوق أخباره إيه لكن أظن بردو هيكونوا زي بعض.

• هل العربية بتحك فى المطبات لو محمل 3 والشنط .

مهما حملت فيها لا يمكن تحك في أي مطب.

• هل تسارع العربية بيقل بالتكيف

لا

معلش سامحنى انا زهقتك من كتر الاسئلة بس انا بشكرك فعلا على تعبك وردك عليا

يا باشا تحت أمرك وتوكل علي الله بس متنساش تستخير ربنا.

المشاركة الأصلية كتبت بواسطة amrsabet

ياباشا انا بشكرك فعلا والحقيقة انا كل يوم بعمل صلاه استخارة ومستنى اللى ربنا يوفقنى لى
هو حضرتك عملت صيانه 10 , 20 فى التوكيل وياترى كلفتك كام بالزيت والفلتر وايه اللى حاجات اللى بتتعمل فى صيانه 10 وال 20

شكرا

علي ما أفتكر صيانة الـ 10 والـ 20 كل واحدة كلفتني 500 وشوية,,,وصيانة الـ 30 كلفتني 1800 جنيه لأن غيرت تيل فرامل أمامي وخلفي وزيت موتور وفلتر تكييف وفلتر زيت وفلتر هواء وتنظيف رشاشات.