الحمدلله حجزت سيراتو وهاستلم بكره باذن الله

**M.Moustafa** · 06-06-2010 02:57 PM

الف مبروك يا باشا بس مع احترامي الكامل لحضرتك انا بايع اختها اول امبارح ب 110 الف نفس المواصفات بالظبط

عموما الف مبروك يا باشا كمان مرة

**AmrStYliSh** · 06-06-2010 03:09 PM

المشاركة الأصلية كتبت بواسطة m.moustafa

الف مبروك يا باشا بس مع احترامي الكامل لحضرتك انا بايع اختها اول امبارح ب 110 الف نفس المواصفات بالظبط

عموما الف مبروك يا باشا كمان مرة

الله يبارك فيك يا باشا بالا بقى مالناش حظ فى الالف جنيه دى

**M.Moustafa** · 06-06-2010 03:15 PM

يا باشا الف مبروك كمان مرة وربنا يباركلك ان شاء الله

**Hosam_Optrawy** · 06-06-2010 08:40 PM

الف الف مبروك

**Tamer86** · 06-06-2010 10:12 PM

انشاء الله تكون مبروكة عليك و تشوف بيها كل خير

استلمت و للا لسه؟؟

عالعموم بأكد عليك بالتشييك الكامل و خاصة الولاعة و الطفاية و المثلث و الاسعافات
أصل الحاجات دي بيتتاخد بسهولة و من غير ما تحس

أنا وقت بيها

خود بالك..

**bolok** · 06-06-2010 10:18 PM

المشاركة الأصلية كتبت بواسطة tamer86

انشاء الله تكون مبروكة عليك و تشوف بيها كل خير

استلمت و للا لسه؟؟

عالعموم بأكد عليك بالتشييك الكامل و خاصة الولاعة و الطفاية و المثلث و الاسعافات
أصل الحاجات دي بيتتاخد بسهولة و من غير ما تحس

أنا وقت بيها

خود بالك..

السعودي مفيش فيه ولاعة وطفاية
مفيش مكان للولاعة أصلا ... قال ايه صديقة البيئة

بس هما عموما غير مؤثرين على الإطلاق

**Tamer86** · 06-06-2010 10:34 PM

المشاركة الأصلية كتبت بواسطة bolok

السعودي مفيش فيه ولاعة وطفاية
مفيش مكان للولاعة أصلا ... قال ايه صديقة البيئة

بس هما عموما غير مؤثرين على الإطلاق

أنا يا صاحبي كان بيها الولاعة و الطفاية الاساسية وشيك أوي و عجبوني بصراحة مع اني مش مدخن
شفتهم و أنا بشيك العربية

بس لما رحت المكتب و مضيت و سلمت الفلوس كانو خدوهم و ماعرفش ازاي مخدتش بالي تاني غير بعد يومين أو تلاتة عشان ما بدخنش و لقيت مكانهم فاضي للأسف

انا معايا sli كوري مش سعودي
و هي برضو صديقة للبيئة و بيجي عليها ستيكر أخضر
بتاع ثاني اكسيد الكربون و المصروف و كده....

**AmrStYliSh** · 07-06-2010 09:02 AM

المشاركة الأصلية كتبت بواسطة hosam_optrawy

الف الف مبروك

المشاركة الأصلية كتبت بواسطة syr_eyes

الف مبروك يا باشا ربنا يديك خيرها ويكفيك شرها باذن الله

المشاركة الأصلية كتبت بواسطة tamer86

انشاء الله تكون مبروكة عليك و تشوف بيها كل خير

استلمت و للا لسه؟؟

عالعموم بأكد عليك بالتشييك الكامل و خاصة الولاعة و الطفاية و المثلث و الاسعافات
أصل الحاجات دي بيتتاخد بسهولة و من غير ما تحس

أنا وقت بيها

خود بالك..

الله يبارك فيكوا يا جماعة .....انا الحمدلله استلمت فعلا امبارح (الاحد) الساعة 9.30 باليل والمفاجاة انى كنت عامل حسابى انى هاخد ورق الافراج بعد يومين او حاجة لقيتهم سلمونى ورق الافراج مع العربية....بصراحة ناس محترمة جدا وخصوصا انى لقيت الكماليات كلها موجودة (طفاية الحريق-المثلث-شنطة الاسعافات-عدة العربية) بس هيا فعلا مفيهاش ولاعة ولا طفاية سجائر لانها عربية صديقة للبيئة......الحقيقة انا قبل ماخد قرار شراء السيراتو كنت محتار بينها وبين اللانسر البوما و اللانترا

.....امبارح لما سوقتها من المعرض (مصر الجديدة) لحد البيت (المعادى) حمدت ربنا وشكرته انى خدت قرار شراء السيراتو بصراحة القعدة جوا العربية و خوصوصا لو انت اللى سايق فيها فرق الف مرة بينها وبين اللانسر واللانترا....قعدة السيراتو افخم وتابلوها فعلا تحفة.....انا لما كنت بالتفت على اى عربية سيراتو ماشية فى الشارع او راكنة كنت فاهم ان ده لجمال شكلها الخارجى بس بصراحة التابلوه والصالون من جوه حاجة تانية وخصوصا باليل والتابلوه منور.....فرق شاسع جدا بينها وبين تابلوه لانسر ({غم انى احد عشاق لانسر بوما) بس انا كنت خايف من احساس انى جايب عربية زيرو وحاسس انها قديمة (وده بصراحة اللى كنت هاحسه لو ركبت اى سيراتو مع حد من قرايبى او صحابى) طبعا المسافة كانت قليلة جدا كانت حوالى 25كم بس كنت مستمتع وانا سايق على غير العادة بالرغم من العادة المصرية المحببة للسواقين لما يلاقوا عربية جديدة يكسروا عليك ويلزقوا فى العربية والكلام ده بس بردو ماتضايقتش..............انا عارف ان انطباعاتى مش هتزود حاجة خصوصا ان وحوش السيراتو هنا قالوا كل حاجة بس انا بردو احي اقول اللى حسيته و خصوصا انى دى رابع عربية اركبها فى حياتى بعد الشاهين (اتعلمت عليها وهيا دى اللى خلتنى اتعامل مع السواقة المصرية) و البولو 96 1300ccطبعا كانت طيارة وهيا دى اللى خلتنى اعرف يعنى ايه غرز و البروتون ويرا ودى جبتها زيرو واخير السيراتو الحمدلله...

**AmrStYliSh** · 07-06-2010 09:19 AM

1- العربية قدام واسعة ماشاء الله و فيه مسافة حلوة جدا بين السواق واللى راكب جمبه وبردو فيه مسافة حلوة بين السواق واللى راكب وراه الا لو السواق طوله معدى 185سم ....
2- انوار التابلوه والكاسيت خصوصا باليل بتدى شياكة جميلة محستهاش حتى فى الكورولا الجديدة
3- صوت الكاسيت نقى جدا والسماعات قوتها مناسبة فعلا الا لو سيادتك من هواة رج الشارع وانت ماشى..
4- العربية بجسمها ده كنت خايف من المناورة بيها بس لقيتها الحمدلله بتاخد المناورات والمنحنيات بسلاسة و خدوا بالكوا انى كنت راكب ويرا 2005 كانت لازقة فى الارض عشان كده انا اتعودت على قدر (كبير بصراحة) من الثبات فى المناورات..
5- الباور كويس وان كان اتقل من الويرا شوية بس مش تقيل بردو لان باور الويرا هو اللى كان ناعم بزيادة...
انا طبعا مش هاتكلم ولا فى موتور ولا فى تكييف لانى طبعا لسه ماجربتش حاجة فيهم العربية بتلين بس بردو احب اقول انى امبارح (غصب عنى والله) كبست بنزين لقيت العربية عملت كيك داون حسيت منه ان الموتور ده نفسه يجرى (ربنا يستر عليه منى وعليا منه)...
بصراحة مش هينفع اشكر فيها كل ده لازم بقى اقول نقطة سلبية وهيا الرؤية الخلفية فعلا انا ماكنتش متصور انى ممكن اخد كل الوقت ده وانا باركن بس فعلا الرؤية الخلفية بتاعتها مش حلوة وخصوصا انى مش جايبها بحساسات ركن لكن متهيألى مع التعود الموضوع هيبقى اسهل....عموما الحمدلله ان ربنا وفقنى واسف لو كنت طولت عليموا بس الصراحة انا فعلا مبسوط بقرارى ....وربنا يجازيكوا خير