الموضوع: اخيرا ارتحت

الحمد لله
مشوار طويل جدا مع المزيكا الشعبى خلص النهارده الطقطقه الى فى العربيه
مش عارف اوصف شعورى انا نمت ساعتين بعد المجهود ده و قمت احكى مخصوص ليكوا و هخش اكمل نوم تانى
بدايه
صحيت الصبح مش لاقى حاجه اعملها قلت اروح اشوف بقه الطقطقه خصوصا اننا داخلين عالصيف و كل سنه و انتم طيبيين و طبعا السهر و الخروج بيكتروا و راس البر و اسكندريه علطول رايح جاى فمش معقوله هسافر و العفشه مش مطمن عليها
رحت لواحد عفشجى جمب البيت وقلت ابداء بيه قعد يحرك و يفرك بالعربيه و قلى يباشا الطقطقه دى بيض المقص اليمين هتجبلى مقص جديد او واحد استيراد و الاحسن يكون استيراد انا قلت فى نفسى المشكله فى البيض اغير المقص ليه ؟؟؟!!! قلت فى نفسى ده عفشجى بلدى ملوش فى العربيات دى
و قلت اسافر بقا طلعت عالمنصوره كلمت واحد قريبى قلتله عايز صنيعى عفشجى محترم قلى فكك من الى عندك انا هوديك للراجل بتاعى ثقه متقلش بقا و تنسى العفشه بتاعته رحت عنده منغير ميركب العربيه مس الدركسيون و كسر يمين عالاخر و شمال عالاخر و الصوت مطلعش معاه وافتكس وقال دى الاسكتره و دى شغل كبير و انا فكيت 50 سكتره قبل كده زى دى و متخفش و متقلقش بس تجبلى العربيه الصبح انا قلت خلاص يروح فعلا بكره الصبح يكبر دماغى لغايه مالاسكتره تجيب اواخر اغيرها
وبعد مروحت البيت وانا واقف قدام البيت كلمت واحد صاحبى فى البلد عندنا قلتله عايز عفشجى كويس قلى روح لفلان ده كويس ووصفه طبعا طلعت عليه اخد العربيه و قله هجربها و فعلا جرب العربيه و كسر العجل و جاب التكتكته او الطقه و قلى تجبلى كوبلن وقلتله انا عندى تزيق ورا بص و قلى هنعوز مساعدين كمان وره و اعملك شغل و مش عارف و فتح فى كلام كبير رغم ان المساعدين عندى حالتهم تمام و تضغط عليهم يطلعوا على طول و حالتهم كويسه و كذا واحد قلى المساعدين كويسين قلت فى نفسى ده صنيعى مش عايز يوجع دماغه هات جديد و ركب و ريح نفوخك بس اتبسطت لما اكدلى انها مش اسكتره قلت اطلع اجيب الكوبلن سافرت تانى عالمنصوره (بين المنصوره و المركز الى انا فيه 30 كيلو )وكلمت واحد زميلى كان عمل شغل فى عربيته وقلى على واحد وقلى ملوش حل و بيصلح و مبيستبدلش غير لما الحاجه تستدعى الاستبدال ورحت عليه خد العربيه و جربها و قلى كوبلن و العفشه عايزه تتربط و قلى اكشفلك عليها كلها قلتله شوف شغلك طبعا كنت تعبان و مش قادر قلتله شوف طلباتك و انا هنزل اجيبها لك من الحسينيه (دى منطقه متخصصه فى قطع الغيار الجديد و المستعمل ) قلى هات كوبلن و بيضه مقص و كوتشه كده جلبه قلتله استيراد ولا جديد قلى انصحك جديد اولا و تكون اليابانى الاصلى او النضيف و قلى بعد كده انتا بتجيب حاجه بتقضى معاك يعنى هتشتغل بس مش زى الاصلى طبعا فى المده
رحت فعلا جبت كوبلن جديد ب95 جنيه تيوانى لانى لقيت اليابانى 250 سالت على الكوبلن ده قلولى مش اقل من 30 الف كيلو شغل قلت ماشى الحال و بيضه مقص قطعت 70 جنيه و جلبه 20 جنيه ورحت عالعفشجى و قلتله انا هروح اتغدى فى المطعم الى جمبك و اسيبك تشتغل قلى ماشى الحال طبعا الراجل ده ورشه مجهزه وواسعه و شغله فى بيته مش فى الشارع وشغال عنده حوالى 8 من صنيعيه كبار و صبيان تخش العربيه تلاقى الى بيجرى و الى يفك و الى يعمل مش عارف ايه المهم العربيه تتفك و يشتغلوها فى مفيش انا على متغديت (كنت واقع جدا و المدام كانت عايزانى اجيب سمك و انا جاى و انا كبرت دماغى و كلت تلت مشكل محترم ) خلصت ورحت للراجل لقيته خلاص بيربطوا القفايز على الطاسات و رحت قلتله عملت ايه ربط العفشه ورا و قدام كامله و ركب الكوبلن و ظبط الجنوط الحديد كانت فيها رفه و نضف التيل الخلفى و ظبط فرامل اليد و بص على المساعدين بتوع العربيه ورا و قدام و قلى رجع البيضه بتاعه المقص انا نضفت الى فى المقص و زيتها و شغلتها و اطلع جرب العربيه و تعلالى طلعت بالعربيه شعور جميل اول مره اكسر شمال و احمل فرمله و فى مطلع و العربيه متكتكش انا كنت بحس قبل كده بالوقت الى ممكن العربيه تكتك فيها عارف انتا بقا لما خلاص تقول لنفسك هتكتكتك اهى وتلاقيها اوت يا سلام شعور جميل انك فقدت زميل غلس كان معكنن عليك فى العربيه و كمان التزيقه الى ورا الى كان الراجل العفشجى بيقلى هتغيرلى مساعدين ورا و كلام فاضى راحت هيا كمان رجعت لصحابنا و قلتله تسلم ايك الحساب بقا قلى الى تجيبه قلتله انتا عايز ايه حوار الى دايما بيحصل بين الزبون و الصنايعى قلى 50 جنيه قلتله مش هزعلك اتفضل وطلعت و كلى فرحه و دخلت جوه زحمه المنصوره و اضرب فرامل ايه الى يحصل اسمع صوت ترزيع فى قدام و طقه قدام وانا ماشى اقنع نفسى مش من العربيه تقوم تكسفنى و تحصل تانى و انا قلبى يخفق و الدنيا تدور بى لسه هعيد المشوار من جديد اكسر شمال جامد العربيه مطقطقش قلت ايه الى حصل انا تعبان و مش قادر و خلاص بقنع نفسى ان دى مشكله فى بيض المقص و انا هبقا اعملها فى اى وقت لكن المهم ان الكوبلن اتصلح و بعدين قلت فى نفسى تعب بتعب انا راجع تانى و لفيت و رجعت تانى لصاجبنا وزى متكون العربيه اصيله جدا و مش عايزه تكسفنى اروح اقف قدام الورشه و امسك فرمله و يطلع الصوت قعد يضحك الراجل و قلى متقلقش ركب العربيه و دخلها الورشه وحل الفرده الى يمتها الصوت و جمد الربط على تيل الفرامل طلع الصوت ده من الفرامل و بعدين دخل العربيه بقا على جهاز بتاع ظبط الزوايا الى بيبقوا الصنايعيه تحت و العربيه فوق و قعد واحد يطلع بالعربيه و يضغط فرامل جامد و يرجع و يعمل نفس الحركه و تحت الصنايعيه شغاليت تربيط جامد و سامع التربيط لغايه مالصوت اختفى نهائى طلعت بالعربيه و احلى شعور بقا اكسر ملفات و اقف مره واحده لدرجه ان كان فى واحد هيلبس فيا من الوقوف المفاجىء و انا مش واخد بالى و انتهى الصوت و انتهت معاه المعاناه وحسيت احساس جديد العربيه ماسكه نفسها و مفيهاش مزيكه حسب الله

شكرا ليكوا جدا و انا حبيت اشاركوا هذا الموضوع لانى اتعودت على كده فى نايل موتورز و من الاعضاء المحترمين الى هدفهم و هدفنا كلنا اسره واحده بتساعد بعضها وى واقفين جمب بعض
اشكركم جميعا و زورو و احمد فؤاد
ومعلش ان كنت طولت عليكوا