الموضوع: فضفضه ناتجه عن رعب شراء سيارة نيو أكسنت 2010

المشاركة الأصلية كتبت بواسطة ash257

على فكرة أنت قصتك تقريبا نفس قصتي مع اختلاف بسيط
يعني انا برضو مسافر وراجع في شهر سبعة وفلوس العربية دي فلوس غربة وشقا وتعب ومش عارف هاتتكرر تاني ولا لأ يعني من الآخر هاشتري حاجة مش هاقدر اشتريها تاني ولا أقدر اغيرها فكنت بدور كتيييييييير قوي على عربية فيها كل المميزات يعني الشكل الحلو من جوة ومن برة وكمان كماليات كتير وصيانة سهلة وقطع غيار متوفرة في السوق ورخيصة كان تفكيري محصور بين مجموعة من العربيات وهي كالتالي:
اسبرانزا m11 أو أحد موديلات اسبرانزا زي التيجو أو 516
رينو لوجان
كيا ريو
هيونداي نيو أكسنت (وكانت آخر أختياراتي)

أولا.. الأسبرانزا كنت مقتنع بيها بنسبة 100% شكلا وموضوعا إلى أن ظهرت مشاكل شبه متشابه مع 95% من ملاكها في المنتجى وصرفت نظر عنها رغم حبي الشديد ليها ولو كانت فلوسي كتير كنت اشتريتها واللي يحصل يحصل
وتلاها باقي موديلات اسبرانزا عشان المشاكل اللي ظهرت وعشان مشاكل التوكيل والصيانات الغالية والمبالغ فيها وصيانة 5000 ومضاعفاتها إجباري كل 3 شهور حتى لو عملت 1000 كيلو وصيانة 30000 غالية لأن بيغيروا فيها السيور وغيره يعني مكلفة جدا وكمان صيني (مع أني ماعنديش مشكلة مع الصيني لأن كان عندي عربية صيني قبل ما اسافر byd flyer)

ثانيا.. الرينو لوجان ماشاء الله سمعة جميلة جدا من ملاكها وتوكيل محترم جدا بس كان ليها معايا مشكلتين الأولى في قطع الغيار ونقدر نقول ان دي ممكن تتحل مع الزمن رغم ان عمرها ما هاتكون زي الهيونداي والثانية مع الشكل مش قادر اقبله تماما وخصوصا شكلها الداخلي ودي موضوع أذواق ولو عاجباك اشتريها بدون تردد

ثالثا.. الكيا ريو شكلها الخارجي جميل وشكلها الداخلي مقبول وكمالياتها متوسطة ومنرفزني جدا موضوع انها بالسعر ده وتكون من غير مرايات كهرباء وتوكيلها ممتاز المشكلة إن قطع غيارها قليلة بس ضمانها طويل 5 سنوات

رابعا.. النيو أكسنت(سبورت) شكلها الخارجي جيد جدا وشكلها الداخلي أخت السابقة وكمان انتشار أكتر منها وقطع غيار في كل حتة بس التوكيل تعبان رغم ان في ناس كتير بتشكر فيه بس انا لسة ما اتعملتش معاه

وفي النهاية كانت المقارنة بين الريو وبين الاكسنت فقررت انتي اختار الاكسنت لسبب توافر قطع الغيار لأن هانفرض جدلا إن العربية هاتقد معاك 12 أو 15 سنة (باتكلم على نفسي مش حد تاني) مدة الضمان سواء 3 أو خمسة مش هاتحتاج مصاريف كتير بس بعد كدة أحسن ليا اني اختار حاجة صيانتها سهلة وقطع غيارها متوفرة ورخيصة لأن المدة اللي من غير ضمان أكبر بكتيييييير من المدة بتاعة الضمان وحجزت النيو أكسنت سبورت من يومين وهاستلم لما أرجع على شهر 7 إن شاء الله
واللي فيه الخير ربنا يوفقك ليه ويوفقني ويوفق الجميع ليه
وآسف على الإطالة.....

هو فعلا فى كزه عربيه فى الفئه السعريه دى بس فعلا انا بردو فضلت النيو اكسنت بينهم كلهم
وشكرا جزيلا وربنا يباركلك فيها يارب وترجع بالسلامه ان شاء الله

المشاركة الأصلية كتبت بواسطة seanmichaels

باشا إركب فيرنا أو لانوس أو أفيو5 أو جيتز, وريح دماغك, البروتون و اللوجان برضو حلوين بس قطع غيارهم أغلى شوية, أنا مجرب

شكرا على النصيحه الحلوه دى جزاك الله خير

المشاركة الأصلية كتبت بواسطة kasten

توكــل على الله

شكرا جزيلا وربنا يتمم بخير ان شاء الله

المشاركة الأصلية كتبت بواسطة nasa

بصراحه يا باشا انا العربيه معايا من سنتين وكنت جايبها زيرو
و اقدر اقوللك بمنتهي الامانه اتوكل علي الله و ان شاء الله فيها الخير
علي فكرة ان حصل معايا عيب في الصيانه مش من الصناعة كان السبب في ان العربيه جابت وش سلندر
وكان ممكن اقعد اشتملك في التوكيل و اللي بيعمله بس الشهاده لله الناس بمنتهي الادب و الاحترام غيرو كل حاجه محتاجه تتغير بحاجات جديدة تماما ولانني كنت رحت بالعيب ده 3مرات اصريت انني احضر العمليه الجراحيه كلها ةدلوقتي ماشاء الله كانها رجعت جديده .بالمختصر المزيد.اتوكل علي الله وعلي فكره اخويا وحمايا معاهم النيو اكسنت الاسبورت اول دفعه وماشاء الله تبسطك .طولت عليك

ربنا يباركلكم فيهم يارب وشكرا على النصيحه وبإذن الله الموضوع يتم على خير

المشاركة الأصلية كتبت بواسطة حماده المصري

لو تقدر تزود وتجيب اوبترا يبقى زي الفل وهي عربيه زي الفل


النيو اكسنت انت دلوقتي متهيالي عارف كل حاجه عنها من المنتدى


واستخير ربنا وتوكل على الله

الاوبترا جميله فعلا بس بصراحه انا عجبانى النيو اكسنت اكتر والمشاكل اللى موجوده مع مجموعة اقلية انا هتوكل على ربنا واللى نصيبى هاخده واكيد الاستخاره قبل كل شئ

شكرا جزيلا وجزاك الله كل خير

المشاركة الأصلية كتبت بواسطة attaromar

النيو اكسنت هي بداية العربيات المحترمة و هي كلها فئات سعرية في امكانيات واحدة و بتختلف من ماركة للتانية...لو عايز نفس الإمكانيات حتلاقي و بالأسعار كلها...في الرخيص و في الغالي و الغالي تمنه فيه....على فكرة البروتون ساجا تعتبر نفس المواصفات...بس 1400 سي سي و الأوتو بتعمل 69000و أي حد ممكن يعمللك من الفسيخ شربات بالنسبة للوكيل....و انا رايي الشخصي ممكن تعمل مقارنات زي مانت عايز في المنتدى و الناس هاتقولك نتاج خبراتها
بروتون ساجا
هيونداي فيرنا اوتو
رينو لوجان
رينو سيمبول
هيونداي اكسنت
بيجو 206 سيدان
سوزوكيsx4
سبيرانزا m11
و ده للمثل و ليس للحصر و ليس للترتيب اولوية و أظن ان العربيات دي في نفس الفئة...قوة محرك و سعة و هيكل داخلي و قاعدة اطارات

اكيد طبعا الغالى تمنه فيه وانا لو معايا اجيب غالى كنت جبت على طول ، مانا كانت وخدانى الاحلام انى لا اركب كورى ولا صينى يا يابانى يا اوربى وانا صلا كنت هجيب مستعمل بس والدى بقى اللى قال اجيب جديد هيبقى افضل ففسيبتنى بقى من حكاية كورى وصينى والحجات دى واستخرت ربنا وروحت تانى يوم خلصنا فى النيو اكسنت فى اقل من خمس دقايق والعربيات دى كلها جميله وان شاء الله ربنا يباركلى فيها لما الموضوع يتم بخير بإن الله

المشاركة الأصلية كتبت بواسطة amgadtoma

بص انا معايا النيو أكسنت 2010 استلمتها من شهرين، كل الى اقد اقولهولك انك تروح التوكيل وتشوف بنفسك ايه الى بيحصل فى عربيتك بداية من انك تتصل ب 16101 وتحجز دورك فى اليوم المحدد فى ساعه محدده وكمان مهندس يسأل عليك او ما توصل و تكييس و تأمين السياره قبل دخولها الورشه لميعاد مظبوط تستلم فى عربيتك لمكان كويس ترتاح وتستنى عربيتك وكمان تطمن عليها لانك بتشوفها بيحصل فيها ايه من فوق كل ده يؤكد كفائةالتوكيل مقارنة بأى سياره تانيه كمان ياريت تبص للمستوى البعيد بمعنى سعر الهيونداى بعد مثلا خمس او ست سنين هيكون كام مقارنة بأى سيارة تانى فى السوق مهما كان نوعها كل ده مكاسب
اما بالنسبه للنيو أكسنت انا شايف انها عربيه ممتازه جدا ربنا يوفقك ومتقلقش منها عربيه جميله وناعمه بس قول ربنا يستر عليها من الخرابيش ومن شر حوادث الطرق ومن شر الحوادث حتى وهى واقفه
توكل على الله وانشاء الله مش هتندم

ربنا يباركلك فيها يارب ويطرح فيها البركه وانا بدعى ربنا يتمم بخير والواحد يحاول يحافظ عليها على اد ما يقدر واستنى بقى زعلة اول خربوش فيهااا
جزاك الله خير

المشاركة الأصلية كتبت بواسطة hdabawy

العربية بقالها معايا 10 شهور والحمد لله ما شوفتش منها حاجة وحشة
ماشاء الله العربية جميلة وهتحبها جدا وتحس انها عشرية
توكل على الله
والله الموفق

الحمد لله وربنا يباركلك فيها يارب ويطرحلك فيها البركه ، شكرا جزيلا

المشاركة الأصلية كتبت بواسطة 2faster

توكل علي الله وانزل دلوقتي استلم بس فلي العربية حتي حتي

اكيد طبعا ، وانا بفكر استعين بأى حد من اللى معاهم نيو اكسنت سليمه يفلى معانا عشان لو فى حاجه كده ولا كده

وشكرا جزيلا

المشاركة الأصلية كتبت بواسطة smalltoto

وروحت تانى يوم خلصنا فى النيو اكسنت فى اقل من خمس دقايق والعربيات دى كلها جميله وان شاء الله ربنا يباركلى فيها لما الموضوع يتم بخير بإن الله

لا حول و لا قوة الا بالله يعنى كل المشاكل اللى انت شوفتها فى المنتدى من اسوأ توكيل فى مصر و مع ذلك مش همك و روحت اشتريت اكتر سيارات ورق فى مصر انا ليا شكوى للاستاذ عاطف مندوب التوكيل هنا و اتحدى انه يقدر يبرر اللى حصل فى عربيتى دى عربيات ورق بمعنى الكلمة ربنا معك و ياريت تقدر تحافظ عليها و تعمل الصيانة برا التوكيل احسنلك

المشاركة الأصلية كتبت بواسطة dayun

لا حول و لا قوة الا بالله يعنى كل المشاكل اللى انت شوفتها فى المنتدى من اسوأ توكيل فى مصر و مع ذلك مش همك و روحت اشتريت اكتر سيارات ورق فى مصر انا ليا شكوى للاستاذ عاطف مندوب التوكيل هنا و اتحدى انه يقدر يبرر اللى حصل فى عربيتى دى عربيات ورق بمعنى الكلمة ربنا معك و ياريت تقدر تحافظ عليها و تعمل الصيانة برا التوكيل احسنلك

شكرا جزيلا على ردك وعلى نصيحتك وربنا معاك فى مشكلتك وتتحل بإذن الله
انا صليت استخاره واكيد مفيش افضل من استخارة ربنا