فضفضه ناتجه عن رعب شراء سيارة نيو أكسنت 2010

**OSaMa.GHaMrY** · 07-06-2010 05:15 PM

السلام عليكم ورحمة الله وبركاته

انا من فتره كبيره وانا بدور على عربيه مستعمله تكون كويسه من ساعة ماكان المبلغ اللى معايا 20 الف وصل بفضل ربنا ل 38 الف انى الاقى عربيه كويسه ملقتش ، مش عارف بقى بس تقريبا العيب فى تدويرنا احنا على العربيه

المهم والدى جه من السفر ودخلت دماغه نجيب عربيه زيرو اهى هتبقى افضل من المستعمل جداا وروحنا سألنا فى معرض وفيه تقسيط مباشر معاهم بس حسبنا لاناهم هياخدو فوايد كتيير على العربيه ام 100 الف

المهم روحنا بالصدفه معرض اوتوماك عشان عمى كان شاف عربيه صينى اسمها ليفان 620 ب 72 الف ، هى من ادام بي ام دبليو التالته ومن ورا مرسيدس او اوبل تقريبا المهم العربيه شكلها تحفه ومنفوخه اوبشن وشنطه وكل حاجه بس وحاشتها انها صينى ودخلت دماغ والدى جدا جدا وصمم اننا نشتريها بس انا قولت لأ عشان صينى وعمرى ماشوفتها ماشيه وكفايا اللى بنسمعه عن الصينى والحكاوى اللى الناس كلها عرفاها دى فقولت واقنعتهم اننا ممكن بنفس المبلغ نجيب على الاقل حاجه كورى اهى نزلت مصر وانتشرت واهو هتبقى احسن من الصينى المهم صليت استخاره ونمت وتانى يوم روحنا المعرض تانى واقنعتهم بنيو اكسنت 2010 مانيوال فول اوبشن ام 75900 جوند وركبناها واتكيفوا منها جدااا جدااا والمهم سألنا عن امكانية تقسيط بس اسلامى لقينا بنك ابو ظبى الوطنى فرع التعاملات الاسلاميه واقروا انهم فعلا بيشتروا العربيه من الوكيل وانت بتقسط عادى مع البنك ( مش عارف بقى )اتفقنا على 3 سنين وانا ان شاء الله قبل انتهاء السنه الاولى هكون مخلص السنتين التانيين عشان نرتاح من الفوائد والقسط ، المهم الموضوع خلص فى خمس دقايق وعجبتهم العربيه جدا جدا جدا وخلاص خلصنا ودفعنا 1000 جنيه حجز والبنك بيستفسر عننا اليومين دول وان شاء الله خير ويتم الموضوع ، لحد هنا تماام وفرحانين فرحة جزمة العيد اووى لان كان نفسنا فى عربيه من تسعين سنه بسبب مرمطه المواصلات والحبسه فى البيت .

المهم بعد بحثى عن العربيه وشكر ناس كتير جدا فيها ومناسبه جدا لينا وبالنسبه لسعرها ، لكن النهارده وانا عمال ادور تانى لقيت فى مجموعة مشاكل لمجموعة من الناس مع الوكيل " غبور " ومع العربيه نفسها وعيوب الصناعه ومحدش عارف ياخد حقه والناس بقت تسب لغبور وهيونداى وانيو اكسنت وللحكومه وانا بقيت قلقان اوى لاحسن لاقدر الله يحصل اى حاجه من دول معانا ، مش عارف ساعتها هتصرف ازاى اصل والدى شغال بره وهنقعد بعد الصبر ده كله نتعذب حتى بعد الزيروو ، يارب انت عالم بحالنا لو العربيه دى فيها خير لينا يسرلنا امرها وبارك لنا فيها يارب العالمين .
وانا بدعى لكل الناس اللى وقعوا فى مشاكل عربيات منهم ابو مارو انا قرأت موضوع المشكله بتاعته كلمه كلمه وربنا يختملوا الموضوع على خير يارب

انا قولت افضفض شويه عشان القلق مبهدلنى لو حد عنده اى افاده يتفضل بيها :)

اعتذر عالاطاااله

**ابو فرح** · 07-06-2010 06:46 PM

بص حضرتك مفيش عربيه بتنزل كامله لازم يكون فى عيب والحالات الموجوده فى المنتدى حالات منفرده انا عن نفسى معايا العربيه والحمد الله مريحانى جدا وبعمل صيانتها فى ميعادها وفى ناس كتير زى معاهم العربيه ومريحاهم
استخير وتوكل على الله

**OSaMa.GHaMrY** · 07-06-2010 07:35 PM

جزاك الله كل خير يا استاذ ابو فرح وربنا يباركلك فى العربيه كمان وكمان
والله ردك ريحنى كتيير
شكرا جزيلا

**ash257** · 07-06-2010 08:12 PM

على فكرة أنت قصتك تقريبا نفس قصتي مع اختلاف بسيط
يعني انا برضو مسافر وراجع في شهر سبعة وفلوس العربية دي فلوس غربة وشقا وتعب ومش عارف هاتتكرر تاني ولا لأ يعني من الآخر هاشتري حاجة مش هاقدر اشتريها تاني ولا أقدر اغيرها فكنت بدور كتيييييييير قوي على عربية فيها كل المميزات يعني الشكل الحلو من جوة ومن برة وكمان كماليات كتير وصيانة سهلة وقطع غيار متوفرة في السوق ورخيصة كان تفكيري محصور بين مجموعة من العربيات وهي كالتالي:
اسبرانزا m11 أو أحد موديلات اسبرانزا زي التيجو أو 516
رينو لوجان
كيا ريو
هيونداي نيو أكسنت (وكانت آخر أختياراتي)

أولا.. الأسبرانزا كنت مقتنع بيها بنسبة 100% شكلا وموضوعا إلى أن ظهرت مشاكل شبه متشابه مع 95% من ملاكها في المنتجى وصرفت نظر عنها رغم حبي الشديد ليها ولو كانت فلوسي كتير كنت اشتريتها واللي يحصل يحصل
وتلاها باقي موديلات اسبرانزا عشان المشاكل اللي ظهرت وعشان مشاكل التوكيل والصيانات الغالية والمبالغ فيها وصيانة 5000 ومضاعفاتها إجباري كل 3 شهور حتى لو عملت 1000 كيلو وصيانة 30000 غالية لأن بيغيروا فيها السيور وغيره يعني مكلفة جدا وكمان صيني (مع أني ماعنديش مشكلة مع الصيني لأن كان عندي عربية صيني قبل ما اسافر BYD Flyer)

ثانيا.. الرينو لوجان ماشاء الله سمعة جميلة جدا من ملاكها وتوكيل محترم جدا بس كان ليها معايا مشكلتين الأولى في قطع الغيار ونقدر نقول ان دي ممكن تتحل مع الزمن رغم ان عمرها ما هاتكون زي الهيونداي والثانية مع الشكل مش قادر اقبله تماما وخصوصا شكلها الداخلي ودي موضوع أذواق ولو عاجباك اشتريها بدون تردد

ثالثا.. الكيا ريو شكلها الخارجي جميل وشكلها الداخلي مقبول وكمالياتها متوسطة ومنرفزني جدا موضوع انها بالسعر ده وتكون من غير مرايات كهرباء وتوكيلها ممتاز المشكلة إن قطع غيارها قليلة بس ضمانها طويل 5 سنوات

رابعا.. النيو أكسنت(سبورت) شكلها الخارجي جيد جدا وشكلها الداخلي أخت السابقة وكمان انتشار أكتر منها وقطع غيار في كل حتة بس التوكيل تعبان رغم ان في ناس كتير بتشكر فيه بس انا لسة ما اتعملتش معاه

وفي النهاية كانت المقارنة بين الريو وبين الاكسنت فقررت انتي اختار الاكسنت لسبب توافر قطع الغيار لأن هانفرض جدلا إن العربية هاتقد معاك 12 أو 15 سنة (باتكلم على نفسي مش حد تاني) مدة الضمان سواء 3 أو خمسة مش هاتحتاج مصاريف كتير بس بعد كدة أحسن ليا اني اختار حاجة صيانتها سهلة وقطع غيارها متوفرة ورخيصة لأن المدة اللي من غير ضمان أكبر بكتيييييير من المدة بتاعة الضمان وحجزت النيو أكسنت سبورت من يومين وهاستلم لما أرجع على شهر 7 إن شاء الله
واللي فيه الخير ربنا يوفقك ليه ويوفقني ويوفق الجميع ليه
وآسف على الإطالة.....

**seanmichaels** · 07-06-2010 08:14 PM

باشا إركب فيرنا أو لانوس أو أفيو5 أو جيتز, وريح دماغك, البروتون و اللوجان برضو حلوين بس قطع غيارهم أغلى شوية, أنا مجرب

**seanmichaels** · 07-06-2010 08:15 PM

لو ينفع تجيب أوبترا برضو جامدة, قسط مع بنك ناصر هما بيشتروا العربية و انتا بتقسط لهم يعني مش قرض, بنك ناصر فايدة6% و كمان مش بياخدو تأمين عربية

**kasten** · 07-06-2010 08:30 PM

توكــل على الله

**nasa** · 08-06-2010 01:48 AM

بصراحه يا باشا انا العربيه معايا من سنتين وكنت جايبها زيرو
و اقدر اقوللك بمنتهي الامانه اتوكل علي الله و ان شاء الله فيها الخير
علي فكرة ان حصل معايا عيب في الصيانه مش من الصناعة كان السبب في ان العربيه جابت وش سلندر
وكان ممكن اقعد اشتملك في التوكيل و اللي بيعمله بس الشهاده لله الناس بمنتهي الادب و الاحترام غيرو كل حاجه محتاجه تتغير بحاجات جديدة تماما ولانني كنت رحت بالعيب ده 3مرات اصريت انني احضر العمليه الجراحيه كلها ةدلوقتي ماشاء الله كانها رجعت جديده .بالمختصر المزيد.اتوكل علي الله وعلي فكره اخويا وحمايا معاهم النيو اكسنت الاسبورت اول دفعه وماشاء الله تبسطك .طولت عليك

**حماده المصري** · 08-06-2010 03:45 AM

لو تقدر تزود وتجيب اوبترا يبقى زي الفل وهي عربيه زي الفل

النيو اكسنت انت دلوقتي متهيالي عارف كل حاجه عنها من المنتدى

واستخير ربنا وتوكل على الله

**attaromar** · 08-06-2010 05:45 AM

النيو اكسنت هي بداية العربيات المحترمة و هي كلها فئات سعرية في امكانيات واحدة و بتختلف من ماركة للتانية...لو عايز نفس الإمكانيات حتلاقي و بالأسعار كلها...في الرخيص و في الغالي و الغالي تمنه فيه....على فكرة البروتون ساجا تعتبر نفس المواصفات...بس 1400 سي سي و الأوتو بتعمل 69000و أي حد ممكن يعمللك من الفسيخ شربات بالنسبة للوكيل....و انا رايي الشخصي ممكن تعمل مقارنات زي مانت عايز في المنتدى و الناس هاتقولك نتاج خبراتها
بروتون ساجا
هيونداي فيرنا اوتو
رينو لوجان
رينو سيمبول
هيونداي اكسنت
بيجو 206 سيدان
سوزوكيsx4
سبيرانزا M11
و ده للمثل و ليس للحصر و ليس للترتيب اولوية و أظن ان العربيات دي في نفس الفئة...قوة محرك و سعة و هيكل داخلي و قاعدة اطارات