الموضوع: قدر الله وما شاء فعل , عملت حادثة بالميجان

السلام عليكم ورحمة الله وبركاته ,
ازيكوا يا وحوش يا رب تكونوا بخير وصحة واحسن حال ..

انا ربنا قدرلي اني اعمل حادثة بالميجان 2 امبارح .. كنت ماشي في شارع رئيسي وطلع عليا واحد من تقاطع مع شارع فرعي دخل في العربية في جنبها الايسر وكان منشن على الباب بتاعي ,
انا بفضل الله لم اخدش ومع ان الباب مدمر إلا انه بيفتح وبيقفل !!

الأضرار معظمها في الباب اللي جنبي مش عارف هل هيستعدل ولا لازم يتغير , بإذن الله هوديها لسيادة العقيد خالد يقرر هو ما الأصلح .
الباب الخلفي فيه جزأ مطبق والرفرف اتحك والعتب السفلي شايف فيه تطبيقة صغيرة ومش عارف مش مطمن للقايم ربنا يستر ..

الغريب ان الراجل اللي خبطني كان ب 132 ورغم كده عربيته تدمرت اكصدام و كبوت ورفارف و رديتير والابواب مش عايزة تفتح مع انها كانت بعيدة خالص عن الحادث بس الرفارف ضغطت عليها !!
كان المنظر غريب جدا لما الراجل اللي خبطني مش عارف ينزل من عربيته الا بعد ما الناس قعدت تشد في الباب وانا بفضل الله فتحت الباب ونزلت وقفلته ثاني !!

دعواتكم ليا ان العربية تتصلح وترجع احسن من الأول , انا بإذن الله هطلع بيها لسيادة العقيد اول ما انتهي من مواويل المحضر والنيابة , ربنا يسهل .. ويا رب يبعد عنكم شر الحوادث ..