امبارح كنت في الاستاد.. اه والله..بقى لي بتاع عشرين سنة ما رحتش ماتش في الاستاد. رحت من غير تذكرة ودخلت اولى علوي علشان اتأخرت..لو كنت رحت بدري كنت دخلت مقصورة!!! على الرغم من كمية القلق والأمن حوالين البوابات إلا إن واحد صاحبنا يعرف حد في إدارة الاستاد قِدر يدخلنا ببلاش..طبعا كمية مجاملات بالعبط بتحصل هناك..لو تعرف مصور صحفي ممكن يدخلك على النجيلة وتقعد على الخط وتجري ورا إللي هايجب جول كمان.
طبعا عيب الدرجة الأولي (اول مرة اقعد درجة اولى) إن المشجعين مش بيشجعوا..دول بيتفرجوا!!! فاكرين نفسهم قدام التليفزيون..بس الظريف إن اغلبهم عائلات. وكمان في عيب خطير هو موضوع السجاير دا!!! الناس مقعدين اطفال على رجليهم وبيدخنوا في وش اطفالهم!!! بس الجو العام امبارح كان ممتاز. المتعة في الاستاد إنك ها تترحم من رخامة المعلقين والاعلانات وفلسفة المحللين
اما عن التراس دول، فانا معجب بالأولاد دول جدا..دول مش صييَع زي ما بيقولوا. بالعكس..مدرج التراس كان الدرجة التالتة بس انا كنت متابعهم. المشكلة ما كانش في دخلة علشان مانعوا دخول الأعلام حتى من غير عصاية!!!! بس التراس دول ما بطلوش تشجيع طول المباراة تقريبا. وكانوا هم يقودون التشجيع في الاستاد كله من مدرجهم. وكانوا بيشجعوا أكتر بعد هدف الحرس الأول.
مش بس كدا دول سقفوا للفريق (الاهلي) بعد المباراة وحييوهم. ونادوا على فضل وشجعوه، وكمان نادوا على طارق العشري وفريق حرس الحدود وشجعوهم. يعني لا كسروا كراسي ولا عربيات علشان فرقتهم اتغلبت
اما عن المباراة، فهي كانت ممتعة للغاية..أنا اهلاوي ومبسوط على الرغم من الخسارة. مبارة حلوة تستحق تكون نهائي كأس مصر.