الموضوع: قرار بالانفصال

اخواني واخواتي الأعزاء يمكن عشان المنتدى ده بحس اني فيه وسط أهلي هحكي تجربة حصلت لي الفترة اللي فاتت .

الحاج والحاجة انتوا عارفينهم كويس اول ما الواحد بيستقر في حياتو العملية وبياخود مركزو يبدأ موضوع الزن في الارتباط والجواز المهم طبعا شفت كتير نظام صالونات , لغاية ما لقاء من اللقاءات الصالونية اتعرفت على بنت من خلالو واعجبت بيها على الرغم اني في فرق سن ما بينا حوالي 7 سنين بس حسيت انها انسانة كويسة وباباها راجل محترم وهادي واخواتها البنات على الرغم انهم اكبر منها ومش متزوجات بس حسيت من تعاملي معاهم انهم بجد اخواتي ( مامتها متوفية) .
المشكلة اللي كنت شايفها في الاول على الرغم انهم متربيين كويس نقطة الحجاب وانا اعرف ان في بنات كتير مش محجبات واكثر تدين من بنات محجبة ومش محجبة في طريقة اللبس والتعامل وكل حاجة وربنا يهدينا جميعا .
المهم عملنا قراءة فاتحة وقلنا نخلي الخطوبة بعد شهرين لأن ماما كانت تعبانة شوية وكان صعب انها تتحرك وتنزل من البيت .
وبدأت اتعرف على البنت وبدأت اثير نقطة الحجاب ليها ان باباها بياخود ذنبها ولازم تتحجب عشان ده فريضة شرعية , في الاول كانت بترفض رفض تام وبتقولي مش هتحجب خالص وبعد كده تقولي سيبني مع نفسي وانا هاجي اتحجب في وقت ما .. وعلى الرغم من كده كنا بنتخانق كتير بسبب الموضوع ده ,
الأيام مرت ونزلنا نجيب الشبكة مع بعض وكانت اختي معايا واختها الكبيرة كمان معانا , كانت يومها لابسة جيبة عند الركبة ونص كم طبعا انا اتخانقت معاها وقلتلها ازاي تنزلي كده من البيت كده مينفعش وقلت اعدي الموضوع لغاية ما اليوم يعدي وجيت بعد كده راجعتها في المنظر ده وقلتلها انا مش من الرجالة اللي تكون مبسوطة ان خطيبتو او مراتو في المستقبل تمشي كده في الشارع ، ردت وقالتلي انا بلبسلك كده عشان تكون مبسوط قلتلها العكس هو الصحيح عمري ما اسمح انك تنزلي كده عشان انتي هتكوني حته مني وانا مينفعش ولا اقبل ان الناس تبص عليكي .. المهم الموضوع قفل بخناقة بس قالتلي خلاص انا بعد كده هلبس طويل ومش هلبس اللبس ده بعد كده ( السؤال اللي بسألو كان فين باباها في الوقت ده وهي بتنزل كده , مامتها اكيد لو كانت عايشة ربنا يرحمها اكيد كانت رفضت الشكل ده في نزولها ) .
شوية بشوية وانا بتعرف عليها قالتلي انا ليا اصحاب جروب بنات واولاد وبنزل مع بعض بس في مشكلة صغنونة ان الولاد والبنات دوول بيشربوا سجاير وبيشيشوا بس انا ولا بشرب معاهم سجاير ولا بشيش انا مجرد باجي اقعد معاهم ........... طبعا اول ما سمعت كده تنحت وكنت مذهوول وفضلت واقف شوية كده مش مستوعب الكلام وبعد كده بدأت الرد وقلتلها طبعا اكيد سيادتك بتقعدي معاهم في غرزة مش مكان محترم قالتلي لأ ده مكان واماكن محترمة جدا قلتلها واضح وطبعا كالعادة الموضوع قلب خناقة وفضلت فترة متكلمش معاها لغاية ما وعدتني انها خلاص هتقطع علاقتها بالعيال ده خالص .
وربنا وحدو اعلم اني كنت كل شوية بقولها وبسألها صليتي فروضك قرأتي قران لأننا لازم نشجع بعض على التقرب من الله .
هي مش بتاعت شغل اشتغلت حوالي شهرين ومستحملتش وكل شوية تيجي متنرفزة ومتعصبة فا قلتلها طالما مبسوطة من قعدت البيت خلاص اقعدي وانا فعلا كنت ناوي اقعدها بعد الجواز وكنت بشجعها على الشغل في الفترة ده عشان تسلي نفسها بدل من قعدت البيت وهي فاضية كده .
المهم فعلا سابت الشغل وقعدت في البيت واكتشفت انها مدمنة على الــ (Facebook)وده بردو كان احد الخناقات لأن كان ليها اصدقاء علييه كتير بنات واولاد وكانوا عايشين فضى فظيع بردو عليه وكل اسرارهم على الفيس بوك
جيت واتكلمت معاها وقلتلها مينفعش كده ولازم تخفي منو شوية انا مش بقول تسيبيه بس بلاش كده لأنك مدمناه زائد الاولاد اللي عليه وطريقة كلامهم قلتلها مينفعش حد يتكلم معاكي بالمنظر ولا بالشكل ده خالص لازم يبقى في احترام في التعامل
لغاية الجمعة اللي فاتت كان عيد ميلادها وبدأت بردو العيال ده يبعتولها تهنئة بمناسبة عيد ميلادها وكنت بشوف التعليقات (كل سنة وانتي طيبة يا جميل ، يا حلوة ، يا أمورة ، واحشاني اوي ) وده كانت تعليقات اولاد للاسف – كرامتي ساعتها ورجولتي نقحت عليا واتخانقت معاها خناقة كبيرة وقررت اني اروح لباباها اتكلم معاه واقولو على كل الكلام ده طبعا كلامو كان مسكن بس ومش كلام حاسم اللبس وقولها لازم يكون محتشم (طيب انت فين ) انت ولي أمرها ؟؟؟ , الفيس بوك قلتلوا لازم تمسح العيال الفاضية ده وتقلل من استخدامو شوية .. طبعا مردش , الحجاب وقلتلو لازم تتحجب قالى قولها عليه وشوية شوية هتعمل كده بس متفرضش عليها ومينفعش انك تشرط عليها انها تلبس الحجاب قبل كتب الكتاب . المهم اديتها هديتها وخلصت الزيارة ورجعت البيت وقررت اقفل الموبايل بتاعي .
وفضلت يومين مش بكلمها خالص وحتى لما كنت بفتحو عشان اعمل تليفون بيجيلي منها ميسد بس مكنتش برد عليها .
لغاية ما اخدت قراري يوم السبت اني انفصل عنها بعد فترة اختبار شهرين
قبل فترة الخطوبة وكان فاضل على الخطوبة اسبوع واحد .
طبعا هي جالها الخبر زي الصاعقة عليها وحاولت تكلمني ومش برد لدرجة انها جابت تليفون شغلي على الرغم انا مش مديهولها وكلمتني في المكتب رديت وقلتلها مينفعش نتكلم الكلام ده هنا قالتلي طيب كلمني على الموبايل . المهم كلمتها وقلتلها انا قررت القرار ده لمصلحتي ولمصلحتك انا مش هخنقك بكل اللي بطلبو منك وانتي كمان طريقتك مش هتتناسب معايا انا انسان متربي تربية محافظة وحاجات كتير اعترضت عليها من البداية وانتي مش مستوعبة ده بردو عشان كده انا اخدت القرار بالابتعاد وربنا يوفقك يارب , ردت وقالتلي انا هعملك كل اللي انت عايزو وهتحجب وهقطع علاقتي بأي صداقات فيها اولاد وهقفل الفيس بوك , رديت وقلتلها كنتي لو فعلا بتحبيني كنتي عملتي كده الحب مش كلمة بتتقال وبس ده احساس وشعور وتفاني واخلاص لكل طرف عشان يسعد الطرف التاني وانتي كنتي عارفة كويس اوي اني راجل شرقي ومش بقبل بكل الحاجات اللي كنتي بتعمليها وبردو اصريتي عليها . وقفلت معاها وطبعا حاولت تكلمني كتير ومسجات بس كنت أخدت القرار خلاص .

قولولي رأيكم انا حابب اسمعو خصوصا انا كنت عامل زي القطة المغمضة واكتشفت منها حاجات كتير وسلوكيات غريبة في المجتمع المصرى وانا معرفش عنها حاجة بحجة انها انفتاح وتطور .

الحاجة التانية الجواز مش لعب ولازم كل طرف يدرس الطرف التاني كويس اوي لغاية ما يحس انو فعلا شريك حياتو وهو الانسان اللي هيعيش معاه بقيت عمرو اللي ربنا سبحانه وتعالى كاتبو ليه وخصوصا الزوجة لأنها هتكون ام اولادي وهي اللي هتربيهم وهي اللي هتحفظني في عدم وجودي