معلش ردي هيضايقك .. الموضوع كله غلطتك .. فكرة الجواز لمجرد إنك تتجوز و زن الأهل و الأسلوب المصري بتاع إتجوز عشان إنت وصلت سن الجواز و لازم تستقر أكنك وصلت لسن الرخصة ولا البطاقة.

إنت رايح لواحدة ولا تعرفها ولا تعرفك قبل كدة و تقولها إنتي هتبقي حتة مني إعملي كذا .. معلش يعني علي أساس إيه هتخاف علي شعورك أوي؟ و هل إنت متخيل فعلاَ إنها مصدقة "هتبقي حتة مني" دي! مفيش في الحاجات دي كلام بيتصدق بصيغة المستقبل .. هي مش هتصدقك و توافقك علي أي حاجة غير لو حاسة مصدقة إن كلامك حقيقي .. و عمر كلامك ما هيكون حقيقي لأن أصلاَ مفيش حاجة إنت رايحلها صالونات! إنت شايف إنها هتبقي حتة منك لأن ده المفروض! لأنها هتبقي مراتك! إنت لو واحد مكانك جه إتقدملها و قالها نفس الكلام لن يتغير شئ .. يعني بالبلدي كدة متزعلش مني لو إتشلت و إتحط واحد مكانك لن يتغير شئ لأن إنت و هي لسة متعرفوش حاجة عن بعض و لسة بتكتشفوا بعض و مفيش مشاعر .. مينفعش ده ييجي خلال و إنتوا أصلاَ واخدين قرار بالإرتباط .. الإرتباط ده تتويج لعلاقة و فكر مشترك متبادل مش لحاجة لسة بتفكروا تعملوها.

و بعدين متزعلش مني برضه هي شكلها متفتحة عنك و متفتكرش إنها مكنش ليها تجارب قبل كدة و مش هتقولك لأنكوا أصلاَ مش قريبين من بعض عشان تقولك .. إنت عايز تتجوز عشان وصلت لمرحلة عايز تتجوز فيها فا تتجوز واحدة عايزة تتجوز؟ هل إنت فعلاَ عايز كدة!؟

انا عارف كلامي رخم شوية بس ده شوية من الواقع المصري الخلطبيطة في موضوع الجواز و الصالونات .. الصالونات دي أفشل إختراع في التاريخ و هي اللي طلعت أسر مستمرة فقط عشان العيال اللي بينها و رجالة و ستات نايمين جنب بعض مش طايقين بعض و ناس مستنية لبعض عالواحدة عشان تتخانق و البيت يولع لتنتج في النهاية شباب ملهمش أي لازمة و أسرة محطمة و ناس عايشة و خلاص .. إنسي موضوع "حتة مني" دي لو هتتجوز كدة .. هتلاقي نفسك تحولت لحاجة و خلاص في البيت و هي هتبقي نفس الشئ بالنسبة لك.

عيش حياتك أحسن .. و أتجوز برضه بس مش بالطريقة دي .. إعتبرها نصيحة بشكل صريح زيادة عن اللزوم مش قلة أدب