الموضوع: تقرير عن اوتوماك 2010 , و لكن الاهم الصور :) قولولي رأيكم

رحت الجمعة الماضى معرض اوتوماك اخبار اليوم , الافتتحته باريس هيلتون يوم الاربعاء في حفلة , للأسف سمعت عنها انها كانت حفلة مليانة شرب و خمور و عيال صغيرة

بس احنا رجالة مواتير :) , احنا ملناش غير العربيات و بس

مبدأيا دي افضل دورة لاوتوماك حتى الآن و افضل معرض سيارات اقيم في مصر

التنظيم كان جيد الى حد كبير , الشاركات كلها كانت عملة مجهود كبير و صارفين على الديكورات كويس , و اكتر حاجة عجبتني ان كل شركة كانت بتحاول تجذب الناس بطريقتها و هواريكم دة في الصور

بما اني اصبحت من هواة التصوير , و بحاول احترف الموضوع , فقررت اني احاول اطلع شوية صور كويسة من المعرض

هعرضها عليكم و بانتظار ارآئكم عنها

بسم الله الرحمن الرحيم

طبعا اول لما تخس المعرض تعدي على منطقة الاكسسوارات و قطع الغيار الرافعين فيها لوح مكتوب عليها Made In China , في كل حتة , و لأني مش عايز اشتري و لأن الحاجات الهناك شكلها ردئ فعديتها

تركب الاوتوبيس و تروح على القاعات الكبيرة الفيها العربيات , القاعات دي بيتوسطها جنينة , استغلتها Jeep استغلال اكثر من رائع

كانوا جايبين كذا عربية رانجلر الجديدة , و عاملين مطالع و منازل او ملاهي بمعني اصح و بيخلوا الناس تطلع و تنزل بالعربيات

و دي افضل دعاية بصراحة دة غير ان العربية اصلا انتشرت جدا

و بعدها نخش اول قاعة , لنجد فيات و بيجو على اليمين و سبرانزا على الشمال

فيات و بيجو كانت جايبين تقريبا كل موديلاتهم و كانوا عارضينهم بطريقة جيدة , مع ان بيجو كانوا عاملين شغل قليل اويييي مش زاى فيات

بصراحة موديلات فيات كلها تتمتع بالجمال , من الفيات 500 للبرافو للايفو لللينيا

بيجو كان عندهم موديلات كتير بس اغلبها عادية , الا ال3008 الجديدة بس معرفتش اصورها عشان كان في حواليها ناس كتير اوي

نعدي القاعة دي و نوصل لقاعة هيونداي , كان في برده سوزوكي و لكن موديلاتهم كانت عادية جدا و مفيش اي جديد

اما هيونداي فقد تفوقوا على نفسهم , كان في اقبال قوي على الجينيسيس كوبيه و على السوناتا طبعا

و بعد كدة نخرج من القاعة دي و نخش على قاعة العملاق بورشه

هي قاعة صغيرة جدا و فيها بورشه بس , الديكور هو هو البيعملوه كل مرة و نفس الاضاءة الوحشة جدا برده , و لأني بستخدم كاميرا فيلم فلازم الاضاءة تكون كافية و دة مكنش متوفر فهي دي صور الطلعت حلو ة و صور الكاسسن طلعت مهزوزة اوي , آسف

و بكدة يكون الجزء الاول انتهى , و هكمل حالا , و هنخش على قاعة العمالقة و افضل صور صورتها في المعرض

ارجو عدم الرد لحين اكتمال الموضوع

تسلم ايديك فعلا صور جميله وبصراحه فيات عامله شغل الى اوى

نكمل

بعد كدة نخش على قاعة العمالقة , افضل قاعة في المعرض

ندخل القاعة لنجد اودي على اليمين , الديكور كان بسيط و لكن انيق جدا و يليق بعلامة اودي و سياراتها
















و بعدين نخش على السيارة سبايكر , الهي تبع توكيلها هو توكيل اودي و فولكسفاجن



العربية روعة روعة في كل شئ , من الشكل الخارجي للداخلي للحاجات المستخدمنها جوة العربية









يا جماعة العربية دي من جوة حاجة تانية !!



و بعدين نيجي لتالت علامة في التوكيل

و دول صورتين لعشاق فولكس فاجن ارجو ان تنال اعجابهم





مصورتش كتير في جناح فولكس فاجن لأن باقي العربيات كانت شداني جامد غير ان هما مكنوش حاجة تشد , التوارج الجديدة شكلها اوحش من القبلها بكتيير و البولو استهبال رسمي في السعر مقابل انتريور فقير جدا


و بعدين نبص بقى على الكلام التقيل .. قوي :)



قمة الشياكة و الفخامة و الجمال , عندما تألقت ايطاليا ,, حلوين الكلمتين جول مش كدة :)







و هنا كانوا حاطين ستاند , حضرتك تتفضل تختار الوان القماش و نوعه و الخشب و الوانه , جميل الموضوع دة :)




و هنا ينتهي الجزء الثاني , انتظروا الجزء الثالث حالا , مع باقي العمالقة :)


ارجو عدم الرد لحين اكتمال الموضوع

نكمل مع باقي العمالقة

جاجوار



عربياتهم فخمة جدا , و فيها حاجة زيادة عن عربيات مرسيديس مش عارف ايه هي
يعني بصراحة اجيب جاجوار عن المرسيديس و انا مغمض



منافس الS-class و الفئة السابعة الجديد .... Jaguar XJ الجديدة





و طبعا الجميلة , جاجوار XKR الجديدة






و دلوقتي نيجي لأكبر عملاق , بسيارتان فقط استحوذت بنتلي على اكبر اقبال في الصالة

اتفرجوا على اللوووووووووووون







يا جماعة هي دي العربيات البجد




و بعد كدة كان موجود فورد



و طبعا معاهم لينكلن



و مكنش فيهم حاجة تشد خالص


اما الناحية التانية كانت سكودا



الجديد عند سكودا كان السوبيرب








بعدين دخلنا قاعة مازدا و سوبارو , و لكن طبعا بعد كل الشفته و خصوصا ان الاضائة في القاعة دي كانت شبه معدومة و مكنش في اي حاجة جديدة , فمكنش ليا نفس اصور

و بعديم دخلنا قاعة تويوتا و هوندا , القاعة كانت كبيرة و متقسمة بالنص , بس هوندا مكنوش مستعلين المساحة خاااالص , و عاملين الحركة بتاعت كل مرة و هي انهم يحطوا السيفيك على منحدر و تكون مايلة لقدام , و حطين كام موتوسيكل

تويوتا برده مكنوش عاملين شغل اوي , بس موديلاتهم كانت اكتر










و بكدة نكون انهينا هذا الجزء , و انتظروا الجزء الاخير حالا

و بعدين نيجي لآخر قاعتين

منصور كان ممكن يعما اكتر من كدة , جايب عربيات كويسة اوي , بس مفيش شغل معمول في الجناح

و كانت نجمة نجاح منصور , شيفرولية فولت







العربية اليشوفها يقول عليها مستعملة بقالها 3 سنين على الاقل , مش عارف ليه كدة !!





و بعدين نيجي لاوبل



و مكنش في غير الكورسا المستفزة و الاسترا الجميلة , قصدي الجديدة







و كان الناحية التانية موجود نيسان , كانوا عاملين شغل كويس , و الجديد كانت القشقاي , عربية شكلها حلو من بره , و للاسف انا نفسي معرفتش اشفها كويس من كتر الناس البتتفرج فمفيش غير الصورة دي العرفت اصورها , بس بصراحة طلعت حلوة اوي اوي :)



و بعد كدة نيجي بقا لجناح كيا , جناح جميل تحس فيه بالبهجة عشان الالوان المستخدمة , ابيض و احمر فاتح , و الغريب ان الاقبال على جناح كيا مكنش قوي اوي , كان عادي

السبورتاج الجديدة روعة








و الناحية التانية كان جناح رينو



برجه مكنش في حاجة تشد و مكنش في جديد غير الداستر و بصراحة العربية شكلها يغم , و لما قعدت فيها , قلت بصراحة في اختيارات كتير احسن , و كدة كدة الظروف البتحتاج فيها الدفع الرباعي العربية دي مش هتأدي برده

من الآخر عربية غير مفهومة


و بعدين في القاعة الاخيرة كان فيها ماهيندرا و جريت وال و بريليانس , و ميني و BMW

جناح ميني كان صغير جدا و مفيهوش غير عربيتين و الديكور كان في فكر بس ضعيف او تحس انه اتعمل كروتة



و كانوا حاطين واحدة شكلها سئ الى ابعد الحدود , و شكلها بيقول "انا ضفدعة"
هي الفي الصورة دي من تحت




و بكدة يكون فاضل جناح BMW , جناح في منتهى الروعة

انتظرونييييي ههههههههه :)

نيجي لآخر جزء و بكدة .... يكون بقالي 4 ساعات بعمل في التقرير

المهم , برده احد اجمل الاجنحة التحس ان انت مش عايز تمشي منها كان جناح BMW



جايبين عربيات كتير , طبعا كان اميزهم الفئة السابعة الجديدة



و الجاية دي من احلى الصور الصورتها :)



الكلمة المكتوبة في الفانوس دي جننتني , BMW Dynamic Xenon


و بعدين نيجي للفئة الخامسة الجديدة , بصراحة لما شفتها على النت قلت اكيد القبلها اجمل بكتييييييير , بس يعد ما شفتها على الحقيقة فكرتي عنها اتحسنت كتير , بس يرده مفهاش الروح الكانت في القديمة









طبعا العربية فيها ابداع من BMW و لكن الشكل مفيهوش روح او تعب , يعني تحس انهم استسهلوا الشكل عكس القبلها تماما



عموما بكدة ينتهي التقرير , هو متعب فعلا بس الواحد بيحاول يعمل حاجة للمنتدى الجميل دة
انا آسف جدا انا عارف ان التقرير مش وافي و ان في عربيات كتير مصورتهاش
بس دي العربيات بصراحة الي الواحد رايح المعرض علشانها و الباقيين ممكن نشوفهم في اي حتة

و مستني ارآئكم عن الصور ان شاء الله و ارجو انها تكون عجبتكم

و نختم بالصورة دي


و السلام عليكم

تغطيه رائعه ومميزه

والصور بجد تحفه

بس الصوره دى الصراحه انت تفوقت على نفسك تحفه بجد