السلام عليكم

انا النهارده روحت لورشه محمد عبده لاول مره علشان اشوف المشاكل اللي عندي في الانوس وكمان اعملها

صيانه والحمد لله قابلت هناك الاسطي حسن الكبير بجد منتهي الذوق والاحترام من ساعت ماشوفني
المهم ,, كانت العربيه عندي بتفصل لما اجي اهدي السرعه وسحبها قل عن الاول فنضفلي شويه اسلاك وضفاير كهربا علي فوق علي الشمال تحت الكبوت وغيرلي البوجيهات NGK سعره 28ج وطلعنا جربنا والحمد لله كله تمام بس هوه حب يتأكد ان كل حاجه سليمه فرحنا لكهربائي في شارع الدقي اسمه محمد سمير او احمد سمير مش فاكر
جربها علي جهاز السكنر قالي الحساس الايدل مش مظبوط عندك كان قاري تقريبا 22 (وده قالي قليل اوي) ووراني لانوس تانيه كانت واقفه عنده وراني القرايه بتاعتها لقيناها 43 (قاللي ده رنج الطبيعي) و قاللي حساس الشكمان عندك محتاج يتظبط بس مش دلوقتي قولتله ماشي.

المهم روحنا لابو الحسن بتاع قطع الغيار علشان الاسطي حسن قاللي ان طقم الدبرياج عندك محتاج يتغير بعد ما جرب يسوقها بنفسه فقولتله ماشي وقاللي هايضبظ موضوع السحب معاك برده المهم جبنا طقم الدبرياج ب275 ج (اسطوانه +ديسك+بليه) والفروش ب 50 ج وجبت فلتر زيت ب 20 ج وزيت باكم شيل ب 15 ج

روحنا الورشه تاني وفكلي طقم الدبرياح وركبلي الجديد قاللي لازم تغير زيت علشان الزيت اسود اوي فغيرته مع انه كان فاضله 6الاف كيلو وقاللي في سائل اسمه Motor Flush بيتحط علي الموتور بزيته القديم لمده 3 دقائق وبعد كده تقفل العربيه وتنزل الزيت وتعيره هوه والفلتر.

الحمد لله طلعنا جلربنا الانوس وجربت الدبرياج وكله تمام احسن من الاول بكتير الحمد لله وقعدت اهدي بالعربيه كذا مره والحمد لله مبطلتشي خالص الحمد لله وسحبها بقي تمام برده هوه لسه في صوت خفيف كده من تحت ده قاللي عليه لازم نعمله عند الخراط علشان في مسمار فيه بوش

بس والحمد لله روحت وانا مبسوط وكفايه انهم ناس كويسين بصراحه ومحترمين.

والحمد لله من حظي اني قابلت محمد ممدوح هناك وكنت اول مره اقابله وهوه بصراحه شخصيه محنرمه وكفايه انه وصفلي ورشه محمد عبده اللي فيها ناس كويسين وفاهمين.


انا حبيت ارفعلكم صور الحاجات اللي اشتريتها بس في خطأ في الرفع عمال يظهرلي معرفشي من ايه بس هاحاول ارفعهم في اقرب فرصه ان شاء الله