الموضوع: الفيرنا اوتوماتيك ستار ولا الساجا اوتوماتيك

مع احترامي الشديد لكل الاعضاء، انا هقول رأيي (انا)

الفيرنا عربية تركبها و توديم مشاويرك و متصرفش كتير و قطع الغيار الاصلية و المضروبة مرطرطة في السوق
بس طبعا مش للجري يعني أخرك 120 و بعد كده هتواجه مشاكل في الثبات و ده عن تجربة 3 اصحاب عندهم فيرنا (و ده رأي)
وفي مشكلة ان الفرامل مش مستحملة الموتور و ده سبب تاني يخليك متزودش عن 120
ممكن تجنط او لو جبت الاوتوماتيك غير مقاس الكاوتش (195 /55/15) هيظبطلك موضوع الثبات و شوية الفرامل، في ناس كتيرة جداعندهم فيرنا و ده هيسهلك موضوع الميكانيكا و الكهربا و الكلام ده، و طبعا يها معجبيها و محبينها و لهم كل احترام لأنهم زملاء في المنتدى الجميل ده


الساجا عربية تحبها و تدلعها و تديها اسم، فيها شوية كماليات حلوة -(باور ستيرنج - تكييف - زجاج كهرباء - قفل مركزى – سنتر لوك بريموت - نور خلفى إضافى - 1 اير باج للسائق - كاسيت و 4 سماعات - مرايات كهرباء - مصابيح ضباب -كمبيوتر رحلات - سينسور بارك - جنوط رياضيه

و على فكرة هي واسعة جدا من جوة و تعتبر عائلية بشنطتها الكبيرة، العربية فيها 3 حاجات لا خلا عليهم: موتور قوي 94 حصان او 98 كحد اقصى (دي اختبارات مش كلام من عندي) تاخد عفشة كويسة و ثبات وهمي زي اي عربية بروتون، فيها وسائل امان كويسة منها الفرامل و الايرباج و طبعا القضبان اللي في كل البيبان، التوكيل جيد و في حسن ملحوظ و بدأ يبعتلنا sms وده شيء كويس، الضمان بقى 100000 كيلو او 3 سنين و جه شيء كويس جدا، السعر منافس و الفتيس ميتسوبيشي و ده شيء ممتز

ومن ضمن الحاجات الكويسة ان الشباب اللي معاهم بروتون دايما جنبك، يعني انا لو عربيتي عطلت الساعة 4 الفجر او قابلتني مشكلة في التوكيل او اي حاجة ببقى متأكد ان في 5 على الاقل ممكن يفيدوني

مشكلتها قطع الغيار الغالية و مش متوفرة مقارنة بالفيرنا



استخير ربنا و القرار قرارك في الاخر