أخيرًا و الحمد لله وبعد فترة بحث طويلة استمرت كذا شهر, و فترة أطول في اتخاذ قرار شراء عربية جديدة, صلّيت استخارة و الحمد لله ربنا يسرلي الموضوع واستلمت انهارده جين 2 زرقاء.

طبعا العربية واقفة تحت لسة في انتظار الورق عشان الترخيص وده غالبا هيبقى الاتنين الجاي.
كل حاجة اتشيكت عليها زي موضوع محمد عبد العال الجامد قوي.


نيجي بقى للانطباعات الأولى, العربية ما شاء الله على الطريق تحفة وعايزة تجري قوي بس أنا كنت ماسك نفسي واخري كان عند 3 rpm.

مفيش اصوات كانت ظاهرة الحمد لله من أي نوع, وأنا تعمدت اقفل الازاز وركز مع أي حاجة بس الحمد لله مفيش حاجة.

ملاحظة كده عالسريع:


1- صوت الأكرة اليمين قدام رخم شوية في الفتح غير التلت بيبان التانيين, يعني مش سلس في فتحه كده.

2- ده حاجة بقى قلقتني شوية...بعد ماوصلت والجو زي مانتوا عارفين كان حر انهارده, المهم المروحة اشتغلت بعد ما ركنت العربية وفضلت شغالة بتاع 4 أو 5 دقائق كاملة, لدرجة إني شكيت إنها علقت ولا حاجة.

يا ترى ده طبيعي ولا ايه ؟

غير كده الحمد لله في ال 10-15 كيلو اللي عملتهم ملاحظتش أي عيوب الحمد لله.

بالمناسبة كانت عاملة 47 كيلو وقت الاستلام, و اتفولت 42 لتر ب 75 جنيه.

في النهاية أحب أشكر كل الناس اللي في القسم هنا اللي ساعدوني في اختيار العربية وإن شاء الله يبقى اختيار موفق و أنا انضميت ليكم رسميا خلاص.

اللي عايز يسأل على حاجة يقول ميتكسفش.

تحياتي
محمود