حصل معايا مره موقف في محطه رمسيس من كام سنه
كنت انا وصديق ليا نازلين القاهره نجيب حاجات للشغل
المهم
اتنين مخبرين وقفوه في محطه القطر (محدش فيهم كلمني لسه)
وقالوله بطاقتك لو سمحت
طبعا انا مسكتتش
قولتله ليه وانت مين
قالي طيب لو سمحت بطاقتك انت كمان
قولتله انت مين اصلا وبتطلب البطاقه بانهي حق
قالي انا المخبر او المساعد فلان وطلعلي الكارنيه بتاعه وراهولي فاديته بطاقتي وقالي حضرتك بتشتغل ايه فقولتله مهندس كمبيوتر (عدوها)
وقالي لو سمحتم اتفضلوا علي مكتب الظابط
دخلنا علي الظابط وهو شاب محترم جدا
قالي خير يا محمد
قولتله خير طبعا بس انا عمري في حياتي ما حد قالي بطاقتك ولا مد ايده في جيبي
قالي والله لو عليا انا مفتشش حد
بس عاوز اقولك ان بالنسبالنا قط اسكندريه يعني حشيش داخل القاهره
وعاوز اقولك اني ماسك 5 كيلوا حشيش مع دكتور جامعه
ومع بنات بنلاقي حشيش
فاسمحلي افتشك انا بنفسي ومش حخلي حد من المخبرين يلمسك علشان متزعلش ولو لقيت معاك حشيش لشربك الشخصي حسيبه معاك ومش حتكلم وحعتزرلك بنفسي وابوس راسك كمان علشان متزعلش
قولتله خد الجاكيت فتشه براحتك بس فعلا انا عمري ما اتفتشت
قالي طيب انت طلعلي اللي في جيوبك واسمحلي اتاكد ان الجيب مفيهوش حاجه
وفعلا
ذوقه واحترامه اجبرني اني اثبتله اني ماشي نضيف
والراجل قفل باب المكتب علشان محدش يتفرج علينا من الناس الي في المحطه حفاظا علي كرامتنا
وفي الاخر قالي انا اسف ويا ريت متزعلش مني بس انا فهمتك الوضع
وفعلا الموضوع حز في نفسي شويه
بس فعلا دا شغلهم
ومحدش اهاننا
-----------------------------
التفتيش المهين بقي انا شوفته في القسم كنت قاعد مع واحد صاحبي ظابط
عاوز اقولكم ان المخبرين بمدوا ايديهم في اماكن حساسه وثنايا الجسم علشان يشوفوا المجرمين مخبيين ايه
بس شكل البني ادم برضه بيكون عليه عامل كبير في بعض الاحيان
---------------------------------------
نصيحه مني ليكم
متعملش مشاكل مع الامن وتبهدل نفسك وتقول كرامتي نقحت عليا ومقدرتش امسك نفسي
لان اهلك حيتبهدلوا وحتتذل كرامتهم لو انت دخلت الحجز
-احرص علي انك متتواجدش في اماكن فيها مشبوهين او ناس ممكن يكون اي حد منهم محرز لحاجه زي مخدرات او سلاح
زي نوعيات كتير من النت كافيه بقت ملجاء للصيع
-لو مخبر قالك بطاقتك كلمه براحه وقوله فين الظابط بتاعك واديله البطاقه وروح للظابط افهم الموضوع
-طووووووووول ما انت لوحدك ومحدش معاك يقدر يكلملك واسطه او يكلم اهلك في ساعتها او يتصرف متلجاش للاستفزاز معاهم
وفعلا محدش بيتاخد وهو ممعهوش حاجه غير في حالات نادره جدا
متعملش ثوري وانت مش قد المعركه اللي حتدخلها
-الظابط مش حيسيب المخبرين في العربيه مريحين وييجي يقولك بليز بطاقتك يا كابتن لا هو بيقعد والمخبرين بيجيبوله البطايق او الرخص
------------------------------------------
وربنا يسلمنا جميعا علشان اهالينا مش حمل بهدله او قهره علينا
دول ما صدقوا علمونا وكبرونا وبيفتخروا ان عيالهم محترمين
انا مش مع السلبيه
بس برضه انا ضد التهور والخوض في معارك خسرانه
-----------------------------------------
لو عملت مشكله مع ظابط اوعي وحذاري انك تطورها لمد ايدين
حتتفرم وحقك حيضيع
فيه وسائل وطرق رسميه انك تاخد حقك
زي انك تروح تعمل شكوي في التفتيش في مديريه الامن