السلام عليكم ورحمة الله وبركاته
النهارده ياجماعه كنت هقتل واحد
الواحد ده عباره عن عيل صغير حوالى 13 او 12 سنه
كنت واقف فى البنزينه قبل كوبرى الاميريه فى امان الله وده راكب توكتوك هو وعيل تانى قده برضه والواد واقف ورايا وعمال يدى كلاكسات وانا بمون وفرحان انه راكب التوكتوك
المهم بقوله يابنى انت مش ناقصه صداع
بكل بجاحه لاقيته بيرد هو كده
قولتله بطل دوشه بالكلاكس ده بدل ما اكسرهولك لاقيته بيقولى متعرفش تعمل حاجه
قولتله ماشى وسكت على كده
لاقيته شغال اكتر من الاول
بعد ما مونت لاقيته بدل ما يمون طلع ورايا من البنزينه وممونش قولت يبقى ناوى يخبط العربيه بالتوكتوك ويجرى
قمت واقف بالعربيه مره واحده قام لبس فى العربيه من ورا بالتوكتوك
ماحسيتش بنفسى وانا بنزل من العربيه وشيلت الواد من التوكتوك ورزعته حته قلم على قفاة ووشه وشيلته ورزعته فى ارض البنزينه
لاقيت الواد ولا كان فى حاجه ولا كأنى بضربه اصلا !!!!!!!!!!!!!!!!!
بيبص على التوكتوك لاقاه الصاج بتاعه اتعوج اتصدم والواد اللى معاه كان هيعيط ولاقيته بيقولى استنى بقى لما ابويا يجى وشوف هيعمل ايه
الناس اللى فى البنزينه حاشونى عنه وخلونى امشى وسيبه وبس على كده
والحمد لله بصيت على عربيتى ملقيتش فيها حاجه
بس بصراحه دمى اتحرق لما لاقيت عيل لسه مكملش 13 سنه وطالع بلطجى امال لما يكبر هيعمل ايه؟؟؟؟؟