نزلت الصبح لقيت الأريال مسروق، أنا كنت مركبه فى المقطم من سنة ب 150 جنيه، ياترى هحتاج اركب اريال كامل ولا الجزء المعدنى بس على الموتور الموجود و لو هجيب اريال جديد، ياترى حد يقدر ينصحنى اجيبه منين و بكام لأنى عارف ان 150 جنيه على اريال مش أصلى كتير.
عرض للطباعة
نزلت الصبح لقيت الأريال مسروق، أنا كنت مركبه فى المقطم من سنة ب 150 جنيه، ياترى هحتاج اركب اريال كامل ولا الجزء المعدنى بس على الموتور الموجود و لو هجيب اريال جديد، ياترى حد يقدر ينصحنى اجيبه منين و بكام لأنى عارف ان 150 جنيه على اريال مش أصلى كتير.
للاسف هتجيب الاريال بالماتور وفعلا ب 150 جنية ومش اصلي حرام بس هنعمل اية بقي
وانا باكد علي الاريال يكون نازل دايما لما اكون راكن العربية في اي حتة
وربنا يبعد عننا الحرمية
كان نازل، اللى خلعه استخدم مفك او مطواة و خلعه من جدره بالجزء البلاستيك الأسود و كحت حواليه.
بس بجد عاوز اعرف هيعمل بيه ايه؟
غريبة دي..أول مرة أعرف إن الإريال بيتسرق !!!!! يالله فداك...المهم انا لسه جايب اريال كهربا من أكسسورات خالد (الحي السابع مدينة نصر عند رضا الكهربائي) بـ100 جنيه بس ومن غير فصال وركبته بنفسي
انا الاريال الكهرباء اتكسر منى مرتين فى اقل من اسبوع بسبب اطفال الشوارع فجبت البيركب على الازاز و ريحت دماغى
حيركبه على ميكروباص أو عربية كاروه
حسبى الله و نعم الوكيل ناس معندهاش دم
اللواء حسام صباح الفل جنابك
لازم تنشر دوريات امن حول العمارة وتشدد الحراسة على عربية سعادتك يا فندم
صباح الفل
بص
افتكر من سنتين كانت زميلة ليا في الشغل معاها لانوس اتكسر منها في شجرة اول اسبوع بالعربية
خدت العربية نزلت الحرفيين مالقتلهاش عقل خالص وقالو مش بتنزل
المهم جبت اريال صيني ب 90 جنية الموتور بالعقل بتاعتة وركبته ب 10 جنية عند كهربائي
شغال لحد النهاردة من سنتين وزي الفل
بتاع الازاز عملي بس شكلة تاكسيات فعلا فسيك منه
لو محتاج اي خدمة او عايز تعد هنا نجيبهولك وتعملة تامر يا فندم
صباح الفل وسلملي على ليليا
لواء ايه بقى يا كريم ده ساب كل العربيات اللى مركونة و نشن على عربيتى، الحمد لله على كل شئ، ان شاء الله و انا مروح افوت على ش دمشق اركب واحد وخلاص و على رأى المثل، سرقوا الأريال يا محمد لكن موتوره معايا.
معلش يا فندم ماهم من غيظهم من ظباط الشرطة واللي بيعملوة فيهم
اكيد سمع عنك انك لواء فقال اخلص تار الشعب
المهم ما تستغلاش وانت بتجيب من دمشق لان المشكله كلها في العقل بس
اصل الانوس زي الاكسيل الاريال في حتة ملطش
افتكر لما كانت معايا الاكسيل والاريال فيها في الرفرف قدام على الطريق كرتونة طايرة قطمته وغيرته كله برضه
الله يعوض عليك
معلش يا كيمو لسه متغدى و مفيش دم واصل للمخ، ياريت توضحلى انت قصدك اجيب الغالى و لا اجيب الرخيص؟
صحيح هم يبكى و هم يضحّك.
ربنا يعوض عليك
انا بقى كنت لسه شارى العربية ما كملتش ال 1000 الأولى وواحد إبن حلال رسملى خيطة الطريق بآلة حادة على جنب العربية من الفانوس الأمامى لحد الفانوس الخلفى و خطين زجزاج عرض الخط بتاع 3 او 4 مللى .
إعتبر اللى حصل زكاة عنك و عن أولادك
رحت اركب اريال جديد و لما فكينا جدار الشنطة لقينا الموتور و العقل سليمة، يعنى اللى فك خد الفبرة السوده اللى بره و الصامولة، المهم فرحت و قلت بسيطة بس مطلعتش بسيطة لانى ملقتش لافبرة و لا صامولة تركب على الأريال الموجود عند 3 محلات و جربنا ناخدهم من اريال عادى برضه منفعش.
دلوقت ايه رأيكم، اروح الحرفيين ادور عليهم استيراد و لا اجيب واحد جديد و خلاص.
المضحك بقى انى لقيت نفس الأريال عند ال3 محلات، واحد قالى 120 و التانى 180 و التالت 200
عشان كده انا شيله خالص بلها راديو
مفيش فيدة في الحقد اللي موجود في معينه من المصريين (اللي عايزين الحرق)
باشا .. الاريال انا عن نفسي لو مكانك هاجيبه كله استيراد ...ببساطه لاني مابشجعش المنتج المضروب .. و طالما عندك الموتور سليم و شغال .. فالاريال اللي هاتجيبه يكون هوه هوه حتي لو بايظ و جبته بسعر رخيص و تاخد منه اللي ناقصك ...انما ادفع 200 جنيه في اريال انا عارف انه صيني دي لاء ..
كنت فى الهرم النهاردة و فوت اجيب اريال جديد من عند واحد فى أول فيصل اسمه المنير، لقيت عنده نوع كورى ب 130 جنيه و كنت هشتريه بس لما حكيت للبياع قالى خسارة و دلنى على كهربائى فى الشارع اللى جنبه و لقيت عنده الفبرة بالصامولة و ركبتهم و كله اتكلف 20 جنيه.
بركه .. مصلحه ...و وفرت تحط بيهم بنزين .. ده احنا في زمن وحش هههه
مبروك يا حسام وربنا يعوض عليك
على فكرة انت عارف مين إللى عمل معاك كدة - هو بغبوتة :-)
ياةةةةةةةةةةةة دة أنت دجرست جميع الحلول كمان - انت هولمز بجد
حبيب قلبي ما تقلش في الاكل قوي كدة
اخوك على مد البصر ورا السندباد باصيني باي حاجة سوتيه
ها ها
قصدي تجيب الرخيص طبعا وكويس انك لاقيت الفيبرة
مانا كنت هاقوللك نجيبها من الحرفيين ب 20 جنية تقريبا برضه
صباح الفل
قوللي بس وابعتلك الاوفيس بوي ساعة الغداء ياخد الزيادة
بالهناء والشفاء
يا باشا ان تأمر، بوفيهاتنا كلها تحت امرك