باركولي جبت تيدا و استفسار مهم

**Opelvectra** · 14-06-2010 07:53 PM

السلام عليكم يا شباب انا زميلكم الجديد احمد و كان معايا فيكترا و بعتها و جبت نيسان تيدا بعد الكلام الهايل اللي عليها و هيا فعلا عربية ما شاء الله عليها ربنا يحفظها جميلة بجد و جبتها من سمير ريان و عملي تخفيض عن السبع ب 3000 جنية
بس ليا كذا استفسار و يا ريت الرجالة ترد عليا دلوقتي انا شايف ان ثبات العربية مش تمام ياعني بتلعب فوق ال 100 يا ريت اعرف لو مقاس جنوط 16 مثلا اية و لو حد جرب علشان موضوع الثبات دا علشان فعلا في فرق رهيب بين الفيكترا و النيسان
ثانيا الفوج لايت عاوز اركبها علشان انا جايب الفئة اللي مفيهاش يا تري اشتريها من بره و اوديها التوكيل علشان ضمان الكهرباء ولا اية

يا رييييييييييت تفيدوني في الموضوعين دول و انا شاكر ليكو جدا مقدماااااا و ياريت متنسوش تقولو بقا معاد المقابلة اللي جاية علشان ان شاء الله مش هفوتها
و السلام عليكم

**Ahmed.TV** · 14-06-2010 08:11 PM

استاذ احمد الف مبروك وربنا يعطيك خير ويكفيك شرها

مينفعش تقارن ثبات التيدا بالفيكترا , لان طبعا الفيكترا تكسب نظرا لارتفاع التيدا عنها , ولكن

التيدا معايا والعربية ولا تبرقص ولا بتلعب ولا اى حاجة, ده يمكن بتمشى مؤدبة جداا ههههههههههههه, وبجيب بيها يوميا مش اقل من 120 وا130, ومفيش اى حاجة ابدا , وبصراحة ثابتة مع الدريسكيون الكهرباء كمان , وده اللى انا مستغربه , لانى شكيت ان ده دريكسيون كهرباء من ثباته وتقله
المرة الوحيدة اللى زودت وعديت ال160 حسيت بيقل الثبات فعلا , فمتهيالك الموضوع ده عشان بس فرق تغير العربية , ودوس واجرى وبراحتك مفيش مشكلة , وربنا يحميك من الجرى ويستر طريقك

بالنسبة الى موضوع الشبورة , كان نفسى اقولك ركبه بره التوكيل ولكن عشان الضمان ومش يلعب فى الكهرباء
فخاليك فى التوكيل اضمن واحسن , وفى موضوع فى القسم مثبت عن سعر الشبورة , وكمان فى موضوعات عن الكماليات اللى بتركب جوه التوكيل حتلاقى فيها حاجات ممكن تنفع ليها فى مسالة الشبورة والزينون والحاجات دى عشان تعرف الاسعار

وبالنسبة الى الجنوط انا معرفش موضوع الضمان لو ركبت 16 , عشان بس الabs لان مفروض انهم قالولوى قبل كدا ان الabs بيشتغل على مقاس جنط معين ولو تقل او زاد بيحصل خلل , وده كلامهم والله واعلم
واذا عاوز تركب جنوط انصحك بال15 او لو عاوز تخاطر ب16 دى ترجعلك فاسال فيها فى التوكيل او باقى الاعضاء

وبالنسبة الى المقابلة الجاية حتكون قريب جدا وفى موضوع حينزل ليها النهاردة باليل او بكرة بالكتير وان شاء الله تشرفنا وتنورنا ونتكلم فى موضوعات كتيرة لما نتقابل عشان حيكون موجود فى المقابلة ملاك التيدا وكل اعضاء نيسان

ومتنساش تدخل تعرفنا عليك فى موضوع ملاك التيدا

**Bishoy.Girgis** · 14-06-2010 09:00 PM

اولا الف الف الف مبروك يا استاذ احمد فكترا بعربيتك التيدا الجميلة و علي فكرة احمد مصطفي قام بالواجب و رد فعلا علي استفساراتك لأنه انسان محترم جدا جدا .
و انا هزودلك حاجه صغيرة خالص خالص بالنسبة للفوجات
اشتري الفوجات من بره التوكيل لأنها اكيد اكيد هتكون اقل سعر من التوكيل و خدهم و ركبهم في التوكيل نفسه
و نصيحتي اللي اوعي تعمل غيرها ......
اكيد الفوجات جاي معاها كتاوت ... اوعي تستعمل الكتاوت اللي جاية معاها او كابلات الفوجات ديه ... لكن التوكيل عنده الكتاوت الاصلي بتاعتها و هتغنيك عن انه يكون في اي اسلاك او كابلات جديده تكون ظاهرة لما تركب الفوجات ديه لأن مكان الفوجات هتلاقيه جاهز بكبلاته مركبة في العربية
اخيرا ... لازم تركب الفوجات ديه جوا التوكيل و هما مش هيمانعوا و ممكن تفاصل معاهم في مصنعية التركيب
علي فكرة انا عملت كده في عربيتي النيسان صني و نتمني نشوفك في المقابلة الجاية
و اي خدمة يا باشا

**sskarim** · 14-06-2010 09:18 PM

السلام عليكم,

مبروك علي التيدا وربنا يرزقك خيرها ويكفيك شرها.

بالنسبة للجنوط يمكن تركيب جنط 16 كما هو موضح بالكاتالوج والمقاس في هذه الحالة للكاوتش سيصبح
195/55/16
بدلا من الأصلي وهو
185/65/15
وده لايخرج السيارة بره الضمان ولايؤثر علي ال abs

بالنسبة للثبات..ملحوظ ان لو فيه ويند...العربية بتحس فعلا باهتزازها بعد ال 100..وزي ما أحمد باشا وضح مشكورا..لاتقارن الاوبل بالتيدا في الجزئية دي...الايروديناميك بتاع التيدا متأثر بأرتفاعها..وصغر قاعدة العجلات بالمقارنة بالفكترا...وأكيد وزنها أقل من الاوبل..

ان شاء الله ادائها يتغير مع الوقت و مع التليين ...للأحسن ..

في أقرب فرصة بأذن الله هاحاول أعرض الكاوتش ..

**Opelvectra** · 14-06-2010 09:34 PM

والله انا متوقعتش الردود السريعة دية و الف شكر ليكو يا شباب والله انا علي العموم عارف طبعا ان مينفعش الفيكترا تتقارن بالتيدا مش علشان التيدا وحشة لأ علشان فئة مختلفة ياعني مش نفس العلو عن الارض ولا نفس العرض عموما انا ان شاء الله هسأل في التوكيل بردوا علي موضوع الجنوط و ان شاء الله هبقا ابلغكو بالرد
و الف شكر مرة تانية علي الردود السريعة

**د.أحمد السعيد** · 14-06-2010 10:56 PM

الف مبرو ك على العربيه و ربنا يديك خيرها و يكفيك شرها
اضبط هوا العجل اول ما تمشى بيها الصبح بكرة ان شاء الله و هتلاحظ الفرق فى موضوع اللعب
و لو حطيت نيتروجين بدل الهوا هتتظبط اكيد اكتر...