ربنا يفرج همك ان شاء الله ,,,
بس حاول على اد متقدر تخرج من المود ده ومتطولش فيه,,, عشان بيعود باثر سلبى على البيت كله سواء مراتك او اولادك وربنا معاك ..
ربنا يفرج همك ان شاء الله ,,,
بس حاول على اد متقدر تخرج من المود ده ومتطولش فيه,,, عشان بيعود باثر سلبى على البيت كله سواء مراتك او اولادك وربنا معاك ..
إن رحمة الله قريب من المحسنين
روق يا باشا وصلي على النبي وادعي وخد اجازة كده وحاول تغير جو وطبعا صوابعك مش زي بعضها زي مافي ناس وحشة برده في ناس حلوة
والله ياجماعه بجد انتوا اللي هتخلوني اعيط من كميه الحب والاخلاص اللي ببلاش وبدون مقابل مش زي اي حد تاني
الحمد لله النهارده احسن مش علشان الموضوع اتحل لا علشان الواحد ايمانه بربنا اكبر من كل حاجه بس بجد حاسس بالرضي بطريقه عجيبه علشان كده بنصح كل الناس اللي يواجه مشاكل مع الناس خليك مع رب الناس عمره ماهيسيبك ولا هيضيمك
وبرضه علشان مابحبش الالغاز والناس تبقي فاهمه
المشكله مع اخواتي احنا شركاء بالتساوي ولاكن طول الوقت بأعاني من التحجيم والتقليل من دوري ومن رآيي طبعا اكتر من مره اتكلم ان كده مينفعش وحتي انا لو مديلك ثقه لازم تستشيرني خصوصا انك لو عملت اي حاجه انت بتتصرف في مالي علشان كده مينفعش طبعا كل مره يصدرولي امي وتقولي اخواتك وتقف بينا طبعا انا مش برضي ازعلها وبقولها طالما انتي عايشه عمري ماهزعل حد فيهم علشان خاطرك
المهم من اسبوعين اتعرض عليا اشتري عربيه لفودافون بعقد ايجار 3000 جنيه في الشهر ومصاريف التشغيل عليهم طبعا انا مش معايا عربيه خاصه احنا معانا في البيت عربيه اسبرانزا a620 بتاعتنا كلنا طبعا انا بحب الخصوصيه ومش بحب اركبها كتير ولقيت الحكايه دي فرصه منها عربيه هتسد قسطها من نفسها وبعد فتره هيكون معايا عربيه ملاكي ببلاش المهم رميت حمولي علي ربنا وابتديت في التدوير والموازنه وبعد كده استقريت علي اللوجان سعرها حلو عربيه جامده توكيلها جنب البيت وكمان اللي ماسك التوكيل صديق عزيز عليا المهم رحت البنك اسحب لقيت حسابي صفر ؟؟؟؟؟؟؟؟
البيه اخويا سحب بالتوكيل كل الفلوس اللي في البنك ((55000)) وحجز باسمه شقه في مدينتي وكمان لما جيت بقول ليه ياشباب ماقلتوش بيقولولي ((علشان مانزعلكش ثم انت ليك الربع في الشقه )) طبعا دمي فار واتعصبت بس مسكت نفسي في نفس اليوم قاعد مع واحد سمعت منه ان فيه ارض معروضه للبيع جنب الارض بتاعتنا ((ارض ورث)) وبعد ساعه من التدقيق اتضح انها ارضنا اللي معروضه للبيع لا وكمان اللي زاد عن كده سمعت اننا لينا 11 قيراط عند خال ابويا تم الاتفاق علي تسليمهم لينا من شهرين ومحدش قالي طبعا ده كله علشان انا بسامح وكل مره مش بزعل من حد بس الموضوع دلوقتي اشبه بصفعه قويه هزت كياني وخلتني افوق من وهم اهل الثقه المزعوم والدم اللي عمره مايبقي ميه
معلش دوشتكوا بس انا الحمد لله دلوقتي خلاص سلمت امري لله ومش زعلان علشان خاطر امي طالما اشتريت خاطرها يبقي خليني للنهايه مراضيها
وده ميمنعش اني اللغي توكيلات عاملها لاخواتي
ما دوشتناش ولا حاجة
ربنا معاك وإن شاء الله تحل مشاكلك
بس لازم تصر انك وفي اسرع وقت تسترد حقوقك كلها
ولو الشراكة مسببة مشاكل بلاش منها
وكل حاجة بينكم لازم تبقى على ورق
ما حدش ضامن عمره ولو - فرضا- هم محل ثقة فهم مش ضامنين اعمارهم ومحددش عارف اللي جاي بعدهم ممكن يعمل ايه
المهم دلوقتي حضرتك لازم ورقك يبقى مضبوط
ولازم تصر يرجعوا فلوسك والغي التوكيل ولو حتستمر معاهم خليك دايما في الصورة وما تسيبهمش يتحكموا في مالك
انا حصل لي حاجة شبيهة بس في حاجة أصغر وطلعت عيني سنين لحد ما عرفت ارجع الفلوس بس بقى هم استفادوا من الفوائد واقول ايه بس غير حسبي الله ونعم الوكيل
احنا في زمن الناس فيه بقت صعبة جدا وغير محل ثقة للأسف
ربنا المستعان
عين العقل
و ربنا معاك و حاسس بالمرارة اللى انته فيها و معلش ان امكن حاول تنفصل عن الشراكة دى لأنك الوحيد الخسران و خليكوا حبايب بعيد عن الفلوس
لأننا كلنا سمعنا عن مآسى بين الاخوات و بعض و هتلاقى كل واحد زوجته بتملى دماغه
ابعد أحسن
فى مثل فلاحى جه على بالى .... يغور الشرك و لو كان على كوباية مية
انا بالفعل دلوقتي عامل مشكله علشان اعرف ليا ايه وكام وفين لان كل حاجه متلخبطه في بعض
وبالنسبه للتوكل هلغيه بكره ان شاء الله
بالنسبه اني اللغي الشراكه ده مقدرش اعمله لان احنا وارثين الشغل عن الحاج وامي شايفه تعب ابويا في الشركه دي وطبعا مناها اننا نفضل مع بعض طبعا علشان ارضيها لازم استمر في الشركه غصب عني
اما بالنسبه ليهم انا خلاص اخدت وقفه ومش هتنازل عن حقي ومش همشيها بالساهل زي الاول
كلها تهون اهم حاجه رضي الوالدين
بتحب التغيير يا نوبي ؟