كنت عاوز اعرف من حضارتكم عيوب الالنترا 2010 او 2011 لو نزلوا الموديل ,و كنت عاوز اعرف مميزاتها بردوا و استهلاكها للبنزين؟؟؟و ثبات العربية فى السرعات العالية؟؟
و شكرا....
عرض للطباعة
كنت عاوز اعرف من حضارتكم عيوب الالنترا 2010 او 2011 لو نزلوا الموديل ,و كنت عاوز اعرف مميزاتها بردوا و استهلاكها للبنزين؟؟؟و ثبات العربية فى السرعات العالية؟؟
و شكرا....
السلام عليكم النترا 2010 هي هي 2011 والثبات ممتاز في السرعات العالية؟
طب حضرتك معاك مانيوال ولا اتوماتيك؟؟؟
و استهلاك البنزين معاك عامل ايه؟؟؟و كمان كان فيه مشكلة بيقولوا اتحلت فى الموديلات الجديدة و هى ان الدريكسيون الباور كهرباء,المشكلة انه بش بيفصل على سرعات عالية,هل الموضوع ده اتحل ولا لا؟؟؟؟؟
و هل فيها عيوب حضرتك لاحظتها؟؟؟و ياريت حضرتك تقولى برده التكييف عامل معاك ايه فى الحر ده ؟؟؟؟
و شكرا
والله انا حب اقول رأيى
الألنترا عربيه كويسه جدا بس المشكله انى معايا 2000 سى سى يعنى مش هقدر اكلمك ع التسارع او الكلام ده لان اللى فى مصر 1600 سى سى بس ع العموم هى حلوه وسابته وانا عن نفسى مش ملاحظ اى عيوب فى الباور واللى معايا مانيول مش هيدروماتيك المشكله عندها ان العفشه لما بتبوظ بترجع لحلتها الأوليه بعد معاناه مش عارف ده غباء من الأخرين ولا ايه بس هوه ده اللى حصل معايا بالنسبه لأستهلاك قطع الغيار بتاعتها معمره ع الأخر
استهلاكها للبنزين بالنسبه لمثيلاتها من نفس الفئه ممتاز
وعلى فكره العربيه من جوه الخامات والتقفيل ممتازين وممكن نقول عليها ان هيا اكتر عربيه مريحه فى فئتها السعرية
التكييف زى الكورولا تلاااااااااااااااااااااجه ومن ساعه ما جبتها معملتلوش اى صياته غير تغيير او تنضييف الفلتر
متشكر يا باشا على ردك جدااا,و ربنا يباركلك فيها و يكفيك شرها
بس فى نقطة مفهمتهاش من حضرتك اللى هى حكاية العفشة,ممكن توضيح اكتر بعد اذنك فى الموضوع ده؟؟
هى بتنزل فى السعودية 2000 سى سى,كويس جدا على فكرة,معنى كده ان شاسيه العربية اللى عندنا يستحمل ماتور 2000,صح ولا ايه؟؟؟؟
و ربنا يعينك على الحر اللى فى السعودية
شكرا ليك
الموضوع مهم وشيق متابع
المشكله عندى فى العفشه ان اخويا كان واخدها وكان فيه يوتيرن بس مش حطين علا مات فاليوتيرن فتح فهوه افتكر ان الطريق هو اللى وسع ومشى جمب الرصيف ففى رصيف تانى قدامه عشان خلاص دى فتحة اليوتيرن فطلع ع الرصيف بسرعته واتهبد من الناحبه التانيه
بدات اسنع فى العفشه صوط تخبيط غيرت مساعدين اماميه الأتنين ب320 ريال والخبطه لسه موجوده
فى الأخر خالص وتظرا لان العفشه معقده اكتشفنا انها محتاجة تربيط بعد ما رحت للميكانيكى يجى ست او سبع مرات
اما بالنسبه لحر فدرجه الحراره كانت من 3 ايام 52 بس :stink[1]:
حكاية ال2000 سى سى دى فهى اوبشن من المصنع وطبعا الشاسيه يستحمل بس مابتنزلش مصر عشان فرق الجمرك رهيييييييييييب زى مانت عارف.
عزل العربيه ممتاز جدا والتكييف مدوره مش مدوره ملناش دعوه
اتصلت بالتوكيل و عرفت ان النترا موديل 2011 موجود وهو نفس الشيب اللى ف 2010 .... يعنى الشيب الجديد منزلش ف 2011
مش عارف هل لسا احتمال ينزل زى ما كانو قالوا ... ولا هيبقى ينزل ف 2012
عندى استفسار تانى بالنسبة للفيرنا الأوتوماتيك .... هل هى عفشتها خفيفة ؟؟
وهل الأفضل أجيبها دلوقتى ولا استنى 2011 ... مع العلم ان موديل 2011 لسا مفيش أخبار هينزل امتى و كمان غبور عامل عرض دلوقتى على 2010 بتمن أقل 2000 جنيه (72500) ... ايه رأيكوا ؟؟
شكرا على ردك
هما فعلا قالوا ان الشيب الجديد حينزل موديل 2011 و ده اللى سمعته يعنى مش متاكد منه الصراحة
بس تقريبا بدل نزلوا موديل 2011 يبقى ممكن يكون فى 2012,عشان انا ما شوفتش شركتين بتنزل موديلين لعربية واحدة و بشيب مختلف
اما بقى بخصوص موضوع الفيرنا,فانصحك انك تبعد عنها,لان حصل مع واحد صحبى حكاية وحشة اوى معاها
الاحسن تفكر فى حاجة تانية احسن و بتتجمع بره,و لو حينزلوا فيرنا 2011 و جاية من بره يبقى تجيبها,لكن اللى بتتجمع هنا,ما انصحكش تشتريها
أشكرك على الرد .... هما فعلا قالو الشيب الجديد هينزل 2012 ... فى 2011 عملوا الشبكة اللى قدام نفس لون جسم السيارة ... ومش عارف حلوا مشكلة الباور ولا ايه ... لكن لما سألت عن عفشتها قالوا ان عفشتها متميزة و مختلفة عن مثيلاتها ...مش عارف هل أهل الاختصاص ممكن يشرحولنا الموضوع ده أو يأكدوه ولا ايه .... بصراحة هى مريحة من الداخل جدا ....
المهم أنا رحت بنفسى التوكيل ...و ركبت الانترا 2011
بصراحة عربية شكلها متميز جدا .... بس محتاج مساعدة الالنتراوية فى التقييم الشامل للسيارة
مع توضيح أهم المميزات والعيوب .... وجزاكم الله خيرا
وأشكر إدارة المنتدى المتميز على هذه الروح الجميله بين الأعضاء
فعلا انتم متميزين جدا ....
من خلال مقارنتي الموسعة جدا والتفصيلية بين الالنترا وكل السيارات في فئتها ابتداءا من الصني الى الهوندا سيفيك : الالنترا ( تنفرد بالآتي )
1- اكبر انتشار ونسبة مبيعات في مصر ومعظم الدول العربية
2-توفر قطع الغيار ورخصها نسبيا .
3-العفشة ثم العفشة ثم العفشة المميزة جدا واللي من خلال بحثي لقيت انها تتفوق على عفشة الهوندا سيفيك اللي ب 160 الف جنيه
نظام التعليق الامامي مكفرسون وده عربيات كتير فيها النظام ده وده نظام تعليق ممتاز بيخفف الصدمات بشكل جيد عن جزء السيارة الامامي
نظام التعليق الخلفي حيث يمكن سر التميز والجودة في الالنترا حيث يتكون من نظام متعدد الاذرع ( مستقل ) وهو نظام يتميز بالآتي :
- امتصاص الصدمات بشكل رائع جدا وانسيابي
-ثبات على السرعات العالية عند تغيير الحارة بشكل مفاجئ ( غرزة )
-معقد جدا ميكانيكيا وصيانته مش سهلة
-مكلف جدا صناعيا وده نقطة تحسب لجودة هيونداي.
لو بصيت على نظام تعليق خلفي لاي عربية في فئة الالنترا مش هتلاقي النظام ده ولا حتى في السيفيك الا انه في السيفيك قريب منه ولكن لا يصل الى كفائته.
4- مريحة جدا في السفر والطرق الطويلة وذات صالون واسع
ده الحاجات اللي بتنفرد فيها الالنترا عن كل السيارات في فئتها .
لكن بشكل عام فيها مميزات تانية كتيرة قد تكون موجودة في عربيات تانية لكن يبقى السعر هو عامل التميز والفيصل .
المحرك قوي جدا لكن السيفيك اقوى بقليل . االالنترا 121 حصان والسيفيك 125 . لكن السفيك ذات جير بوكس خماسي النسب
الثبات رائع جدا خصوصا بعد ال 100 كم /س بيكون الدركسيون شبه متجمد ( باور كهرباء ) esp
التكييف قوي جدا وفعال ولكن اكيد عزم العربية بيقل لما يكون شغال
صوت المحرك هادئ جدا
اقتصادية جدا في البنزين 230 كم / 20 لتر ........ قيادة مختلطة
العزل ممتاز وفوق الممتاز كمان مقارنة بالصني ( عن تجربة )
جودة التقفيل جيدة جدا
اعتمادية عالية جدا وعمر افتراضي طويل لقطع الغيار
الاكثر انتشارا في الخليج والسعودية خصوصا كتاكسي يعمل ليل نهار في اجواء السعودية المعروفة.
وفي النهاية السعر من اهم العوامل في تميز السيارة اذا كانت بتديك مميزات كتير وجودة عالية وبسعر منافس جدا ................
متشكر جدا يا طارق على ردك
هو انت معاك موديل كام؟؟و مانيوال ولا اتوماتيك؟؟؟؟
و هل حكاية الدريكسيون دى بجد انه esp ؟؟؟؟و بيتقل فعلا بعد ال 100؟؟؟؟
و هل العربية واطية فعلا بحيث بتحك فى المطبات,لانى سمعت ده من كذا واحد؟؟؟
و هل هى مصفحة من تحت ولا لا؟؟؟؟
و شكرااا
متشكرين
2009 اوتوماتيك
انا نسيت برضه من ضمن المميزات هو الباور الكهربا esp ادائه ممتاز وبيتقل تدريجيا عند زيادة السرعة وبيحسسك بثبات العربية بعد ال 100 كم/س
لو جينا للعيوب بكل صراحة وعدم تحيز فهي كالآتي :
- البلاستيك بتاع فتحات التكييف بيصدر اصوات طقطقة في المطبات او الطرق الغير ممهدة ولما تشغل التكييف في الحر.
-العربية لما بتحملها حمولة كاملة 5 أشخاص + الشنطة فيها حاجات فعلا بتوطى جامد ولازم تاخد المطباات الغشيمة بميلان . .لكن اذا حملت شخصين ورا بس بتبقى عادي جدا حتى لو 3 بس اوزانهم مش تقيلة بتوطى بمقدار طبيعي . وفي ناس بتبالغ اوي في الموضوع ده .
-العربية مش مصفحة من تحت .
-لما يكون في عواصف شديدة وانت ماشي على سرعة عالية لازم تنتبه لان العربية بتنحرف شيء قليل عن مسارها حسب اتجاه الرياح . والحل للموضوع ده هات الالنترا اللي فيها اوبشن esp اللي هو نظام الثبات الالكتروني اللي بيرجع العربية لمسارها بمجرد اي انحراف بسيط.
- صاجها خفيف زي معظم السيارات الجديدة ( كورولا - سيفيك - صني - لانسر ....) والدليل ان كل العربيات ده اوزانها متقاربة جدا ويمكن الالنترا وزنها اعلى من بعضهم.
ده العيوب اللي انا شايفها من خلال استعمالي للعربية لمسافة 20 الف كم
وانا جربتها في كل الظروف ( سفر - زحمة - طرق مكسرة .... ) والحمد لله ادائها مرضي جدا في كل الظروف.
مع احترامى لحضرتك .... انت متحيز قوى للالنترا على السيفيك
انا معايا النترا 2010 و بقالها معايا 4 شهور تقريبا
العربية جميلة و ناعمة بس من الظلم انى اقارنها بالسيفيك
انما لو قارنتها مثلا بالبوما فهى انعم بكتير و العزل فيها احسن كتير و بتجرى عن البوما قوى (الموتور بتاعها فايق على طول )
و لو هاتقارنها بالصنى و القتفيل المصرى و استهلاك البنزبن الغريب فى الصنى و نشوفية العربية اكيد الانترا افضل
و لو قارنتها بالسيراتو اقولك ان العربيتين واحد (نفس الشاسيه و نفس التقفيل و نفس المكنة و نفس التعليق الامامى كمان الفروق بينهم :
السيراتو شكلها احسن و اوبشنز اكتر بس تعليقها الخلفى torsion beam و ده بيخليها ناشفة كتير عن الانترا اللى عفشتها multi link ده غير انى شايف ان ميزة الباور الكهرباء دى كبيرة جدا و الانترا بتجرى شوية عن السيراتو عشان فرق الوزن اللى بينهم
انما بقى اقارنها بالسيفيك ......... حرام حرام ..... انا اول مرة ركبت السيفيك اتوهمت بكل حاجة من ثبات ممتاز و عفشة ناعمة جدا جدا و عزل غريب للصوت اللى بره و تكنواوجيا جديدة جدا و كفاية عوامل الامان اللى فيها و شكلها و شكل التابلوه بتاعها .... و عفشة السيفيك الخلفية معقدة جدا عن عفشة الالنترا لانها 3 اذرع و ده اللى بيديها ثباااااااات غريب مع نعومة برده يعنى مش حاجة على حساب حاجة
الالنترا معايا و مبسوط جدا انى اشترتها و كل يوم بحبها اكتر من الاول بس فرق كبير قوى بينها و بين السيفيك
فرق السعر الرهيب هو اللي واهم الناس ان الفرق كبير
انا مبقلش ان الالنترا احسن من السيفيك لكن النقاط اللي بتتفوق فيها السيفيك على الالنترا متستهالش فرق السعر ده
ونقاط تفوق السيفيك هي الآتي :
-نظام الايرودينامكس في السيفيك افضل حيث تعطي معامل احتكاك للهواء اقل من الالنترا بفرق 0.03
-المحرك اقوى بفارق ليس كبير . السيفيك 125 حصان والالنترا 121
- وفي حاجات تانية اقل اهمية لكن دول اهم حاجتين لكن ميستهلوش فرق 50 او 60 الف جنيه !!!
عشان كده هتفضل نقطة تفوق هيونداي المهمة على معظم السيارات هي السعر ثم السعر.
وده رابط مقارنة مفصلة ومجدولة وبأرقام وحقائق مش كلام عابر ولا مجازي هتعرف قيمة العربية اللي انت راكبها ومستواها بره في العالم . مع تحفظي ان مواصافات هيونداي المصرية اسوأ مواصافات في العالم
http://www.nilemotors.net/Nile/144598-a.html
شكرا يا طارق على ردك و اسف للتأخير فى الرد
بالنسبة لصوت الطقطقة اللى فى البلاستيك بتاع فتحات التكييف,قولت للتوكيل عليه ولا لا؟؟؟؟و كان تصرف الوكيل معاك ايه فى الحكاية دى؟؟؟هل حلها ولا لا؟؟؟؟؟
هو فيه النترا فيها esp ما اعتقدش هنا فى مصر بتنزل؟,ممكن فى دول الخليج,لكن مصر معتقدش
هو وزن العربية كام؟؟؟؟
و سؤال اخير معلش,هل لما بتكون محمل على الاخر,بيحصل حاجة فى العربية من تحت لما تحك فى المطبات؟؟؟؟
صوت طقطقة البلاستيك اعتقد مش حالة فردية وعموما هو مش مزعج
ال esp موجود في مصر في الالنترا gls .
وزن العربية 1187 وفي مصادر تانية بتقول 1215 كجم.
لما تكون محمل على الاخر اللي بيحصل ان العربية بتحك من العتب بس وبتسمع صوت الحكة انما الماكينة وكارتيرة الزيت في امان
جامد يا ابو سديرة و حببتنى فى العربية بجد :)
القلق الوحيد من التوكيل ..
يعنى ايه ؟؟ يعنى فيها esp وللا لأ ؟؟
ما ترسو على حل يا رجالة ..
لا لما رحت مركز الصيانة مقلتلهمش على صوت الطقطقة.
العربية كلها بتوطى ومن الخلف بشكل اكبر فعلا بس العربية لما بتحك بتحك في المطبات بتحك من منطقة المنتصف لان العجل الامامي بيكون عدي المطب والخلفي لسه فبيكون منتصف العربية هو اللي معرض للحك.
انا اقصد ان الماتور والكارتيرة في امان من المطبات مهما كانت العربية واطية .
لكن احذروا البلاعات المرتفعة نصيحة بلاش تعدوها من نص العربية عشان في واحد زميلنا عمل كده وخبطت في العفشة لان في الحتة الحديد بتاعة الجر منخفضة وكمان ممكن تكسر كارتيرة الزيت.
امال فيه شكاوى كتيرة من ثبات العربيه ليه ؟
ده طبعا غير و سائل الأمان اللي شايلها الحاج كعبور من العربية
بصراحة الأمان مهم جدا في العربية - يعني انا شايف الجين 2 تتفوق كتير علي الأنترا في الموضوع ده رغم فارق الرفاهية الكبير لصالح الانترا
فرق كبير قوى بين الالنترا و الجين 2 ..... ماينفعش نقارن العربيتين ببعض اصلا .... و لو على عوامل الامان ما الاسبيرنزا ال m11 كلها عوامل امان ... نقوم نقارنها بالالنترا بقى ؟؟؟؟؟؟
و بعدين عوامل الامان هنا فى مصر تعتبر حالة من الرفاهية .... بره الطرق جميلة يعنى العربية لو عملت حادثة هاتفضل عالاسفلت و ده اللى بيساعد عوامل الامان انها تشتغل
انما تعالى هنا بقى فى مصر اى حادثة يا عربية بتتقلب يا بتقع فى ترعة يا 7 او 8 عربيات بيطبقوا بعض .... تفتكر عوامل الامان هاتفرق فى الحالات دى
و يافرحتى بعربية فيها 10 airbags و لما تيجى تعمل حادثة و لا airbag واحد يفتح و دى حصلت كتير و قدامى ....
ربنا يكفينا شر الطريق و يرحمنا من الحوادذ و الحاجات دى بس بجد بقيت بتضايق من عوامل الامان اللى بنقارنها فى الفئة دى
لو هاتتكلم على عربية بعوامل امان يبقى تتكلم فى الالمانى بقى ( airbags >>> Abs ><>> EBD >>> ESP
غير كده فاكسسسسسسسسسسس
http://www.nilemotors.net/Nile/162630-2010-2011-a.html انتظروا الصاروح القادم من هيونداى النترا 2011 روعه
شكرا يا باشا على الرد,بس انا فعلا معايا حوالى ثمن الالنترا اتوماتيك اول فئة ده بعد الخصم كمان
و انا محتار بين الاتنين عشان تقريبا قريبين من نفس السعر,بس مافيش المانى بالسعر ده
و على فكرة وسائل الامان بتنفع جدا,انا عملت حادثة قبل كده و فعلا لو كان معايا ايرباج للراكب اللى جنب السواق كانت فعلا انقذت اللى قاعد جنبى,و بعدين على فكرة بروتون بش وحشة,عندك ماتور بريطانى و عفشة تقارن بالعفشة الالمانى و ثباتها يكاد يكون قريب منها
يعنى بش بتكلم فى حاجة صينى,لان فيه فرق بين الصينى و الماليزى كتيييير و منها الجودة
انا معاك ان مصر تعتبر وسائل الامان فيها رفاهية,بس فعلا العربيات اللى تنزل مصر تنزل بوسائل امان غير كده ما تنزلش,شوف الدول اللى بره بش بياخدوا اى عربية و خلاص,لا,بيعملوا ليها اختبار الامان و اقل حاجة تحصل على 4 نجوم تقريبا عشان تدخل البلد,يعنى هناك بيخافوا على ارواح الناس
و ربنا يكفينا شر الطريق و يبعد عنا الحوادث يا رب
و ارجع و اقول الفلوس هى العامل الاساسى برده عشان الواحد يشترى حاجة كويسة
و شكرا و اسف للاطالة
حد عاوز يضيف حاجة تانية؟؟؟؟؟؟؟؟؟؟؟؟
انا عاوز أعرف حاجة تانية :
أولا : يعنى ايه esp ??
ثانيا: الالنترا فيها esp وللا لأ ؟؟
ثالثا: أيها أفضل ؟ البيرسونا وللا الالنترا ؟؟
الخوف على ارواح الناس مش بييجى من وسائل الامان لواحدها
ده اول حاجة بيعتمد عليها الطرق اللى بنمشيها فيها و سلوك الناس اللى سايقة
معلش هنا فى مصر اى حد بيسوق و اى حد بيكسر على اللى جنبه و اى حد بيجرى بالعربية و هو مش عارف بيعمل ايه
انا عربيتى الجديدة و القديمة ماتخبطوش الا و هما واقفين .... لما يبقى عيل صغير راسه مش باينة من الدركسيون و تلاقيه راكب عربية و ماشى يخبط فى الناس
لما يبقى مفرق مقفول و تلاقى عربية كارو قاطعة الشارع بالعرض عشان تطل من فوق الرصيف و عسكرى المرور واقف
اما ابقى ماشى على 100 بس على الطريق و لاقى واحد راكب حمار بيعدى قدامى ب 5 متر ... و لولا ستر ربنا ماكنش حد عارف ايه ممكن يحصل
اما عربيات موديلات خمسينات و ستينات و ماشية تولع فى الطرق
لما سواق تاكسى ييجى يعديك من اليمين و يكسر عليك و يخبطك و بعد مايعدى يقولك ابقى امسك يمين يا باشمهندش
لما سواقين تريلا يبقوا ماشيين شاربين و لا حد بيقولهم ايه
و الله لو عملولك الحماية اللى كانت فى كراش مش وسائل الامان بس ماهتفرق
الامان فى الاول و فى الاخر بييجى من التحكم فى الطرق و الناس اللى ماشية عليها
اى حد دلوقتى بيطلع رخصة حتى و لو ماكنش بيعرف يدور العربية .... و هانروح بعيد ليه .... اخويا معاه رخصة و المرة الوحيدة اللى ساق فيها عربية دخلها فى سور ....
و فى الاخر احنا ماشيين و الله بتساهيل ربنا و ربنا يرحمنا برحمته .....
Electronic stability program
نظام الاتزان الاليكتروني .
http://en.wikipedia.org/wiki/Electro...bility_control
إلنترا لا يوجد بها هذا النظام في مصر ،أعتقد انها أحسن من البروتون بس المشكلة إن الشكل دة خلاص على وشك التغيير .
الأمان مش رفاهية خالص - دى روحك و روح اسرتك و حياتهم
علشان ما نقدرش نتحكم في طرق مصر و لا في سواقينها يبقي مهم يبقي معاك ايرباجز و فراما مانعة للانزلاق
و عربية ثباتها ممتاز
وكلاء العربيات عودونا علي ان احنا نشترى درجه تالتة و بقت الكماليات فى اعلاناتهم (حامل اكواب- تكييف- جنوط-درج للتخزين !!!!!!) و اكتر من كدا يبقي :36_6_3[1]:خسارة فينا
الأنسان اشرف و اغلي مخلوقات الله تعالى
و ليس العربيات او الوكلاء الحرامبة
انا عايز اقول حاجه ع الثبات من غير ماحد يضرب
دلوقتى الكورولا الجديده هنا فى السعوديه بيقولوا انها خفيفه ومش ثابته (محدش قال عليها فى مصر كده ليه) وطبعا انتوا عارفيين الخلجيين بيحبوا اليابانى قد ايه وخصوصا التويوتا
والله الكلام ده سمعته اكتر من مره بيقولوا ان الألنترا اثبت وماكينتها اكبر
هو فرق السعر هو اللى بيغير دماغ الناس
اليكم المفاجئه الكبرى الألنترا ال2000 سى سى تمنها اقل من تمن الكورولا 1800 سى سى 6000 ريال فقط
يعنى فرق السعر اللى فى مصر هو اللى بيحكم ع العربيه يعنى الكورولا مفيش حد بيتكلم عليها ولا كلمه والألنترا على طول مش ثابته عشان رخيصه؟؟؟؟؟؟؟؟؟؟؟؟؟؟؟