لو انت مش مصري كنت هتختار تبقى ايه !!!

**hon** · 19-06-2010 10:45 PM

السلام عليكم ورحمه الله وبركاته
أذيك ياأستاذ أحمد مفيش أحراج ولا حاجة
أنا عندى 30 سنة الحمد لله وحضرتك كلك زوق والله وانا متأكد من كدا بالذات لما
شفت تعليقك على فيلم عسل أسود
تقبل تحياتى

**Ahmed Samy** · 19-06-2010 11:17 PM

انت اللي ذوق و الله

انا سألتك عشان فعلا عايز اعرف ان في ناس كبيرة و شغالة و عايشة في مصر

و فعلا مازالت متمسكة بالتاريخ و الأصل

انا الحقيقة ما عدتش باحس بالحاجات دي

نفسي احسها

بس مش قادر للأسف

**MohaMed_Refaat** · 19-06-2010 11:26 PM

ســــــــــــــويــــــــ ســرى او هــــــــــــــولــــــــ ــــنـدى

**eng_ahmedryad** · 19-06-2010 11:38 PM

المشاركة الأصلية كتبت بواسطة akramlail

ياباااااااااااااااااااااا ااااااااانى اكييييييييييييييييييد
بعد متفرجت على برنامج خواطر فى اليابان اتمنين اكون يابانى
الناس دى ناقصهم يسلموا بس الاخلاق والاحترام والعلم = حضارة =اليابان

+1111111111111111111

في اليابان إسلام بلا مسلمين

**Fouad Ezz** · 19-06-2010 11:47 PM

بمناسبة تمني تغييرالجنسية ... شوفت منظر يستحق النقل والمناقشة وإللى فكرنى به الموضوع ده ...
من كام إسبوع كنت فى مدرسة خاصة لغات عشان أقدم لإبني ... وكان فى ناس كتير منهم واحد ملامحة غربية : شعر بنى وبشرة فاتحة .... ومعلق الباسبور الأمريكى فى رقبته على شكل سلسلة (إفتكرته أمريكى) وفجأة لقيتة بيكلم والدتة بالعربى بلهجة عرفت منها إنه مصرى ... وقعدت كام يوم بعدها أفكر فى السبب إللى مخلية معلق الباسور كدة ... ولية لسم مصمم يقدم لأولادة فى مدرسة فى مصر؟؟؟؟ لكن لما ظهرت حادثة شهيد الأسكندرية ... عرفت لية الشخص ده معلق الباسبور الأمريكى على صدرة

**hon** · 19-06-2010 11:47 PM

الله يخليك يا أستاذ احمد
والله كلنا بنكافح عشان نربى أولادنا ونعيش عيشة كريمة
ومعنى انى بشكر فى البلد أنى مبسوط ومرفهه فيها بالعكس لكن حب الوطن معنى كبير

**Ahmed Samy** · 19-06-2010 11:50 PM

المشاركة الأصلية كتبت بواسطة hon

الله يخليك يا أستاذ احمد
والله كلنا بنكافح عشان نربى أولادنا ونعيش عيشة كريمة
ومعنى انى بشكر فى البلد أنى مبسوط ومرفهه فيها بالعكس لكن حب الوطن معنى كبير

ما هو أنا مشكلتي فى تعريف كلمة "وطن" دي

لأني فعلا حاسس انى مفتقد المعنى ده

طب ممكن أسمع منك انت شايف الوطن ازاي و هاقوللك رأيي انا كمان

**hon** · 20-06-2010 12:07 AM

بصراحة انا شايف الوطن فى بيتى وأسرتى
بتفائل بضحكة من أبنى وبحب أشوف علم بلدى
أحب أشجع المنتخب وبحب اكلة سمك حلوة من بورسعيد
وأتمشى على كورنيش الاسكندرية وفى حدايق المنتزة
بتوجع من الظلم وبستحمل والفساد بيحرق دمى
بكرة الفلوس الى عدنا بنبيع نفسنا عشانها وبدعى ربنا يصلح حال بلدى
وبلعن ابو البلد لما اتظلم ورجع أسامحها منا ابنها وهيا امى
والله يا أستاذ أحمد دى قرائتى للوطن يمكن مقصورة بس انا بيها سعيد
حاول تحس بالبلد فى صحابك وحبيبك يمكن تلاقيها فى المنتدى هنا بالوح الحلوة
المهم تلاقيها وتطرد احساس الغربة الى جواك لأنه لا يطاق هون الله عليك تحياتى

**Fouad Ezz** · 20-06-2010 12:36 AM

المشاركة الأصلية كتبت بواسطة ahmed samy

ما هو أنا مشكلتي فى تعريف كلمة "وطن" دي

لأني فعلا حاسس انى مفتقد المعنى ده

طب ممكن أسمع منك انت شايف الوطن ازاي و هاقوللك رأيي انا كمان

تسمحلى أنا أقولك شايف الوطن إزاي!!!
هو إحساس شخصى مش أكتر .. حسيته لما عشت فى السعودية 3 سنين
كنت طول الفترة دى خايف من كل حاجة وأى حد ... خايف أمرض .. خايف أموت .. خايف أتخانق مع حد ... خايف فلوسي تخلص ,اضطر أستلف من حد ... إحساس رهيب بعدم الأمان
وشعور أخر ... كنت كل مابشوف حاجة حلوة ونظام حلو أو شارع واسع ومسفلت ... أول تفكير يجى فى بالى إزاى مصر تبفى كدة ...
محسيتش زى ناس كتير هناك .. بإنى عايز أعيش للأبد فى السعودية ... بالعكس كنت كل لحظة أتمنى أن أنقل كل ما هو جميل هناك إلى مصر
ويوم ما قررت إنى أرجع نهائي كنت بعد الأيام زي المسجون إللى مستنى الإفراج ...
مع العلم كنت عايش عيشه معقولة جدا هناك وكان لى مستقبل كويس والناس إللى حواليا كانوا بيعاملونى بإحترام ... بس كنت حاسس إنى "سمكة إستوائية" عايشة فى حوض سمك جميل وغالى بس فى "أيسلندا"