صيانة ال 10000 كيلو فى كيا القطامية و تقرير الزيارة ؟؟؟
السلام عليكم جميعا. انا كنت عملت موضوع من كام يوم بستفسر عن صيانة ال 10000 اعملها فين و فى الردود لقيت عضو من الاعضاء بيقولى على كيا القطامية و انى لما اروح اكلمه المهم اتكلت على الله و كلمت العضو المبجل lolly 136 و اتجهت الى القطامية حوالى الساعة2 ظهرا و دخلت المركز و قابلنى المهندس صلاح عيد- مهندس الاستقبال- راجل بشوش جدا الصراحة و اخد منى المفاتيح و الرخصة و كتيب الضمان و بعدين ورانى تكاليف الصيانة كانت حوالى 358 جنيه و راحت العربة داخلة الورشه علشان يبتدى الشغل .
نزلت الورشة لقيت حوالى 8 او 10 عربيات الناس شغالة فيهم و المهندس محمد هاشم- شاب لذيذ و فاهم شغله كويس- المهم طلع العربية على الكرين و ابتدى فنى يشتغل فيها و يغير الزيت و يكمل بقية نقاط الصيانة .
المهم قعدت مع المهندس محمد هاشم و مدير صيانة القطامية المهندس محمد سمير راجل فاهم و اتكلمت معاه عن الفرق بين القطامية و ابورواش .
نرجع لتقييم العربية بعد الصيانة :-
1- الموتور : طبعا بعد تغيير الزيت الصوت بتاع الموتور بقى اهدى نسبيا و انعم كتير
2- العفشة : بعد تربيط العفشة و الفحص الشامل انا شايف ان العفشة اختلفت كتير عن الاول و بمرور الوقت هيبان الكلام ده.
3- غسيل الموتور و جسم السيارة بالواكس: بصراحة الواكس بتاعهم مختلف تماما عن الواكس اللى احنا بنستعملوا , عبارة عن سائل بيتحط على العربية بعد الغسيل بس ليه نفس الفاعلية بتاع الواكس المتعارف عليه.
تقييم مركز الخدمة :
1- الناحية التقنية :الاختلاف الوحيد بينه و بين ابورواش عدم وجود ورشة سمكرة و دوكو لكن من ناحية الحرفية و مقدار الدراية بسيارات كيا اعتقد ان الاتنين نفس المستوى
2- خدمة العملاء: على اعلى مستوى من الترحاب و التفاعل مع العميل و الرغبة فى ارضاء العميل تماما
3- صالة انتظار العملاء :جيدة للغاية و متاح بها انترنت لاسلكى
4- صالة الاستقبال : صغيرة نسبيا و تحتاج الى اعادة نظر
و فى النهاية جزيل الشكر لكافة افراد مركز خدمة كيا القطامية
م- محمد سمير
م- محمد هاشم
م- صلاح عيد
و كافة الفنيين و موظفى الاستقبال و كذلك العضو lolly 136 على تك التجربة الشيقة