الشروق جميلة بس خدمتها قليلة
العاشر من رمضان حلوة وخدمتها كتير حاول تشوف الأثنين
عرض للطباعة
الشروق جميلة بس خدمتها قليلة
العاشر من رمضان حلوة وخدمتها كتير حاول تشوف الأثنين
أولا أشكرك على دعوتك ولك المثل يارب ان شاء الله اللهم آمين
طيب أنا هشرح على الخريطه هيكون أوضح شويه
ده خريطة الشروق كل اللي لونه برتقالي فاتح يسمي حي وهي الفيلات وكل اللي لون أخضر يسمى منطقه وهي مناطق العمارات والاحمر خدمات طبعا أولا الاحياء أرقى من المناطق لانها فيلات ولكن المناطق ليست بالسيئه بالعكس هناك مناطق عمارات جميله جدا
وفي كل حي اومنطقه مقسم الى مجاورات وده الجهاز مقسمهم كده علشان سهولة التقسيم والتمييز في قطع الارض يعني مجاوره اولى تانيه تالته وممكن اكتر
http://2.bp.blogspot.com/_JdwxwHw-wN...9%821+copy.jpg
تعالوا نتكلم بالنسبه للشقق فاما أن تاخد شقه في عماره (تسمى منطقه)أو شقه في فيلا (تسمى حي) لان هناك فيلات في الاحياء بتكون قطعة الارض اللي هتبنى عليها الفيلا مش لشخص بتكون لشركه هو طبعا الموضوع ده قليل شويه في الاحياء بس موجود بتباع بها شقق يعني الشركات بتبنيها كفيلا وكشكل فيلا وبتقسمها وتبيعها كشقق صغيره الحجم نوعا ما يعني بتبدأ مساحات الشقه في الفيلا من 140 أو 150 متر وانت طالع وممكن ان توصل لانك تاخد شقه نص دوور في فيلا أو دوور كامل حسب المساحه اللي انت عاوزها وحسب مقدرتك الماديه والفلل أرضي ودورين فقط ورووف
أما في المناطق (العمارات) بتبدأ المساحات من 100 متر تقريبا الى 300 متر والعمارات أرضي وثلاث أدوار ورووف واحتمال فيما بعد المناطق تاخد تصريح من الجهاز بدوور رابع فلذلك الرووف في العمارات مش بيبيعوه دلوقتي منتظرين قرار الجهاز (اما الرووف في الفلل فبيباع وأكيد طبعا عارفين ان الروف تعتبر شقه مبنيه ومساحتها كويسه جدا وبيدي لك مساحه كبيره اضافيه لحرية التصرف فيها بتكون بتاعتك تبنيها او تقفلها وبتكون سعرها طبعا كويس ومريح بالمقارنه بالمكان والمساحه الكبيره)
طيب هنتكلم عن تقسيم المناطق من الافضل للاقل حسب كلام المهندسين وحسب ما شفته بنفسي في المناطق وما اجمع عليه الغالبيه وحسب المستوى الاجتماعي الافضل للاقل وطبعا أهم شئ حسب قربهم او بعدهم عن اسكان الشباب او الاسكان العائلي فكلما قربنا منهم قل السعر
الافضل في المناطق (العمارات ) بالترتيب
1-المنطقه السابعه عمارات (وهي من طريق السويس والاقرب لمدينتي وسعر المتر من 1700 الى 1950) حسب الموقع و الفيو وهلواجهه على العماره ام الشقه خلفي وهل ارضي ام دور متكرر وهل بحري ام قبلي والتشطيب ومستوى الشركه في البناء وقربها من طريق السويس او الرابط الثاني اللي بيربطها بباقي الشروق يعني طبعا كلما كانت اقرب للطريق او الروابط كانت اغلى
2-المنطقه الثامنه عمارات (وهي جنب التامنه عمارات ولاتفرق كثيرا عن السابعه وبرضو ترى مدينتي وستستفيد من خدمات مدينتي كالسابعه لانها جنبها ولكن علشان خلف السابعه على طول فسعر المتر يقل فقط 50 جنيه عن السابعه أي بيتراوح ما بين 1550 الى 1850 جنيه للمتر برضو حسب الفيو بتاعها ومدى قربها من الرابط يعني هل الشقه داخله لجوه اوي ولا لبره شويه)وفي ناس بيفضلوا المنطقه التامنه لانها ارضها مرتفعه شويه عن السابعه فبيعطي جو افضل وللعلم يا جماعه الشرووق كلها ارضها مررتفعه عن سطح البحر 100 متر و 50 في المئه منها حدائق علشان ترطب الجو وتجعله صحي فجوها كويس جدا ده غير ان مدن القاهره الجديده عموما جوها افضل بكتير من جوه البلد واكيد الاسباب مفهومه
3- المنطقه السادسه عمارات والسعر غالبا قريب من سعر المتر في التاسعه عمارات
4-المنطقه التاسعه عمارات (وده اقرب الى طريق الاسماعيليه يعني من الجانب الاخر وما يميزها قربها من نادي جرين هيلز وكارفور الشرووق اللي سيفتح قريبا وايضا قريها من طريق الاسماعيليه وسعر المتر من 1400 الى 1650 وبرضو حسب المكان وخلفي أم واجهه والمواصفات السابقه
أما باقي المناطق فمستواهم زي بعض ممكن الخامسه عمارات افضلهم بس حسب قرب الشقه فيهم من المناطق الأخرى أو الروابط الرئيسيه داخل الشروق
والمشاركه الجايه هكلمكم عن الاحياء على اد معرفتي ومعلوماتي عنها
وان أصبت فمن الله وان اخطأت فمن الشيطان
وأرجو ممن استفاد مني ان يدعو لي دعوه حلوه بظهر الغيب لاني يعلم الله ان لم ابخل
وانتظروا الحديث عن الاحياء وترتيبها باذن الله
مشكور جداً على الافادة ... ربنا يباركلك ويجله فى ميزان حسناتك .
بس أيه اللى انت استريحتله من المناطق والمشاريع اللى شرحتها فوق ومناسبة فى نفس الوقت من حيث السعر والموقع ... ومنتظرين البقية .
الاحياء في مدينة الشروق
قبل ما اتكلم عنها في معلومتين مهمين
الاولى ان الاحياء عمرانها اقل من المناطق يعني لسه بتتعمر رغم انها فيلات طبعا السبب الاول ان الجهاز مكنش حاطط مهله للبناء دلوقتي جهاز المدينه وضع شروط ومهل للبناء في الاحياء فتلاقيها البناء قام فيها وابتدى العمران يزيد وطبعا زي ما قلت من قبل ان المنطقه اللي فوق في الخريطه اللي هي من طريق مصر اسماعيليه سواء احياء كانت او مناطق فهي متعمره عن المنطقه اللي ناحية مدينتي الاعمار فيها أقل بس بيقوم برضو
والثانيه ان الشركات مش بتقسط في الاحياء اكتر من 5 سنوات يعني في المناطق بيكون في تهاود شويه اما في الاحياء ماسكين في ال5 سنين بالعافيه وفي كتير مش بيقبل اكتر من 4 سنوات او 3 كمان ومساحات الشقق في الاحياء كبيره نوعا ما فده بيعطي عدم راحه سواء في القسط لانه مضغوط بعدد سنين اقل او في الاجمالي للمبلغ لان المساحه كبيره شويه وكمان سعر المتر عالي وحتى ان مش عالي اوي يعني في احياء سعر المتر 1900 او 2000 لكن تقع المشكله في الوقت اللي سيدفع فيه القسط بيكون صغير فبيكون كبير الا اذا امكانيات الشخص تسمح بكده وربنا يرزقنا يارب والجميع ان شاء الله
ولاحظوا انه على الخريطه الشروق مقسمه شرق وغرب
والغرب طبعا اللي تقع في المنطقه الغربيه على الخريطه بس مش مكتوب عليها غرب
والشرق مكتوب عليهم شرق يبقى المقابل له الغرب
وبرضو لاحظوا ان غالبية الغرب في الاحياء متعمر عن الشرق واكتره خدماته مكتمله ومستقبله افضل وسعره اعلى
ونيجي بأه لافضل الاحياء في الشروق
1-الحي الخامس والسادس ودوول كلهم كمبوندات يعني غالبا مفيهمش فلل مستقله للبيع ولا عن طريق شركات وطبعا سعر المتر عااالي اوي يعني 2800 او 3000 للمتروممكن اكتر
2-الحي الرابع فيلات وده عالي برضو وبيقولوا كمستقبل ممتاز والله اعلم وسعر المتر من 2000 الى 2500 او اكترقليلا بس حي رااااقي ما شاء الله وبرضو فيه كمبوندات وسعرها عالي تمنها غير الفلل المستقله
3- الحي السابع والحي الثامن فيلات وسعر المتر اغلى شويه من الرابع والسبب في غلوه انه طالع ويعتبر مكتمل وده اللي مزود سعره وكمان قريب جدا من مركز المدينة الرئيسي ومن الجامعه الفرنسيه وهي اغلى الاماكن حولها يعني حيين راقيين جدا
4- الحي التاسع فيلات وهو اللي بعد الحي الثامن على الخريطه ومشابه في الاسعار يعني 2200 الى 2400 للمتر تقريبا ومتعمر برضو بس اقل شويه في العمار من السابع والتامن
5- الحي الاول غرب متعمر وبرضو فوق ال 2200 للمتر
6-الحي التاني شرق فيلات شيك اوي برضو وهادئ بس يعتبر مهجور لسه العمران قليل وسعر المتر من 1850 الى 2200
7- الحي الثالث شرق راقي و موقعه مميز بس لسه مهجوور مفيش خدمات بس مستقبله كويس لان موقعه كويس جدا هو في وسط الشروق ومقابل له الحي الرابع وكمان قريب من مدينتي هو بعد التامنه والسابعه عمارات وسعر المتر من 2000 وانت طالع
7- الحي الثالث غرب متعمر وبرضو به اماكن مهجوره بس خدماته موجوده لكن هو له جانب قريب اوي من اسكان الشبااب ويطل عليه فورا بينهم شارع اما اذا دخلت فيه شويه بيكون كويس جدا وسعر المتر من 1850 وطالع
9- اقلهم الحي الاول شرق وغرب والحي التاني غرب دوول اقل شئ بالنسبه للاحياء الفلل بس مش وحشين لكن احنا بنقارن الاحياء ببعض فده ترتيبهم
بس عموما السكن في الاحياء حتى اذا شقق اكيد ارقى من السكن في المناطق بس لا يمنع ان كثيير من المناطق العمارات مميزه وجميله وراقيه مثل ما قولت لكم ترتيبهم
وطبعا كل مدينه ولها مميزات وعيوب وبالنسبه للي عرفته عيوبها عدم النمو السريع للخدمات واكتمالها او حتى بطء العمران ولكن ذلك بدأ يتغير بسبب انهم اعطوا مهله للبناء لاصحاب الاراضي سواء الشركات او الناس والا فغرامات وسحب الارض ولما العمران يزيد مشاكل المدينه سيستجيب لها الجهاز اللي غالبا هيتغير كتيير بعد الثوره لكن اراها ان شاء الله افضل بعد كام سنه كمان ليس سريعا وليس متأخر يعني ممكن 5 سنين والله اعلم
اللي يقرأ كلامي يحسبني بشتغل في العقارات بس اقسم بالله اني لم اكن اعرف شئ عن العقارات قبل ما ادرس الشروق كويس لاني من النوع اللي مبدخلش في شئ قبل ما ألم به علشان النصب وصوره المتعدده وعلشان الندم فيما بعد فبجب اعرف كل شئ قبل ما اقرر وده اللي عملته وسألت من هنا وهنا ودرست المكان كويس على الخريطه اولا وحفظت الاسعار بعد سؤال الكثيييير من اماكن وشركات مختلفه ورحت بعدها عاينت وتفرجت بعيني ثم توكلت على الله
والله أنا تعبت في الكلام وترتيبه بس علشان خاطركم وعلشان انفع بعلمي أي محتاج او محتار وعاوز يفهم
فأرجو اكون وفقت ان شاء الله في الشرح وتقريب الصوره للي عاوز يسأل عن الشروق
والله يوفق الكل يارب
بص انت قلت كلمه مهمه اللي استريحت له يعني ممكن انا استريح لمكان او عقار او شركه انت متستريحلوش ليه لانه ممكن يكون خير علي او الاقي مودي فيه وميكونش خير على غيري فلازم لما تروح بنفسك تقرر واكيد تكون واخد معلوماتك كامله بالافضل للاقل وهكذا انما الراحه ده بتاعتك انت
بس انا برضو هجاوبك انا ارتحت للمنطقه السابعه والمنطقه التاسعه لكن مارتحتش للتامنه رغم ان لو حد من الشركات سمعني بقول على التاسعه اريح لي من التامنه يضحك لكن معرفش ليه التامنه عمارات حسيتها مهرجان شويه وحسيت ان السابعه احلى وارقى والتاسعه اهدى ومنظمه في الشكل اكتر من التامنه وعموما اسعارهم كويسه التلاته وقسطهم معقول
وبتقول المشاريع اكيد تقصد الشركات اللي ارتحت لها بص ده برضو حسب مدى اقتناعك باللي هتشوفه لكن انا بالنسبه لي كشغل وتشطيب وحجم الاعمال وجدتها في
شركة أملاك _شركة الاسراء_شركة أبراج
والله التلاته ممتااازين وانا ربنا بعد الاستخارات وفقني مع املاك الحمد لله
بس انا مش بظلم الباقي والله ممكن يكون في كويسين غيرهم برضو بس انا ارتحت لدوول جدا والله أعلم برضو كله يمشي بالاستخاره قبل أي شئ لان الواحد ميعلمش الغيب فالاختيار للي انت تكون مرتاح له مش حد تاني علشان ده مسؤليتك لوحدك بس انت تجمع معلومات وتتفرج وتنقي وتتوكل على الله
واوعوا يا جماعه التسرع لاااازم تلف وتقرر بعنايه وتركيز وهتحتار شويه بس بالدعاء هتجد نفسك منجذب لشئ وعاوزه وعاجباك كل حاجه فيه يبقى ان شاء الله هو ده
السلام عليكم ,
جزاكى الله خيرا , حضرتك عملتى ملخص ممتاز لمدينة الشروق كلها و دة يعتبر فعلا دليل لأى واحد عاوز يشترى فى مدينة الشروق , و ربنا يوفقك حضرتك فى الشراء و السداد ان شاء الله .
بارك الله فيكي علي المعلومات القيمه و فعلا هايكون دليل لاي حد عاوز يسكن هناك
شكرا لذوقكم والله يجازيكم الخير على دعواتكم
والله فرحت انه عجبكم ويارب الكل يستفيد منه ان شاء الله
وأي استفسار انا ممكن اجاوب على أد معرفتي ان شاء الله
والله يوفقكم ويوفق الجميع يارب
في حفظ الله