........................
عرض للطباعة
........................
اولا أنا لسة مصلي استخارة و بعدين لقيت الى انت كاتبه ده و أنا في شدة الحيرة لسة النهاردة شايف فيلا رائعة في الشروق كمساحة واسعة جدا و تصميم و أرض مساحتها كبيرة و عندي امكانية بناء دورين كمان فى المستقبل لو حبيت فى الحي السابع بعد الشروق 2000 وواضح ان دي اشيك و ارقى حاجة في الشروق مع الحي التامن و كمان بنتى في مدرسة فرنسية و إن شاء الله مخطط ادخلها الجامعة الفرنسية و كمان متشطبة هاي سوبر لوكس بالظبط زي ما كنت بتمنى لو أنا بنيت بنفسي بالتالى مفيش قرف العمال و التشطيب و ما أدراك بالعمال في مصر. بس بنفس السعر ممكن أسكن فى تاون او توين هاوس في كمبوند حلو في التجمع الخامس بس طبعا مساحة اصغر كتير و لا يمكن أن ابنى او أغير أي شيء و كمان نص تشطيب و هتحتاج فلوس و وقت و مجهود و متابعة رهيبة. أنا معرفش اي حد ساكن في الشروق فيالتالي انا هاخد برأيك فأنت شايف ايه؟ هل أتوكل على الله في الفيلا الى شفتها و لا آخد حاجة صغيرة في كمبوند في التجمع و لا آخد أرض في الشروق و أبنيها؟ مع العلم أن كارفور و سكاي بلازا قدامهم زي ما شفت مش اكتر من 6 شهور و مدينتى فيها 18 شقة سكنوا خلاص يعنى كمان سنة هتكون عمرت شوية كمانز
كمان هل السكن في الشروق امان و لا لأ بالذات أن خلال الصيف بنتى ممكن تكون لوحدها في البيت و ما هو موقف الطريق الدائري الثانى هل سيمر بالشروق لان شغلى عند جامعة القاهرة و أنا ساكن حاليا في شيراتون المطار و بستخدم الطريق الدائري الحالي
أنا آسف لكتر الأسئلة بس أنا في أشد أشد اشد الحيرة و مش عارف آخد قرار و محتاج حد يساعدني و شكرا مقدما
السلام عليكم ,
أنا ساكن فى الشروق من 2008 و الحمد الله مرتاح جدا , انا ساكن فى بانورما الشروق خلف الشروق 2000 مباشرة و فعلا الحى السابع من أرقى أحياء الشروق لانة كله فيلات و كومبوند و فيه نادى هليوبلس .
بس حضرتك لازم تشوف ظروفك كلها و تحسبها يعنى انت شغلك فى جامعة القاهرة فلازم تشوف هل تقدر كل يوم تسوق من الشروق لحد الجيزة ولا الموضوع هيكون مرهق فكدة يبقى التجمع اقرب لشغلك . انما من حيث المقارنة بين فيلا الشروق و فيلا التجمع طبعا الاحسن فيلا الشروق كمستقبل عشان المساحة اكبر و امكانية البناء بالاضافة الى التشطيب و من ناحية الامان فالحمد الله المكان كويس و مشفتش مشاكل من ساعة ما سكنت فى الشروق . و ربنا يكرمك فى اتخاذ القرار السليم و انا تحت امر حضرتك لو محتاج اى مساعدة
http://lh3.ggpht.com/_bMNfsmUYp1A/Sp...0/SANY0441.JPG
http://sphotos.ak.fbcdn.net/hphotos-..._3044917_n.jpg
مول سكاى بلازا الذى يتم بناؤة
طيب كم سعر الشقة 130 متر فى الحى السابع
طيب سؤال لاهالي الشروق
انا بفكر افتح عياده اسنان بالشروق او العبور
محتار جدا جدا
العبور حلوه كمدينه و فعلا نسبه الاشغال فيها عاليه و مؤخرا فتح فيها عيادات اسنان كتير بس لسه موصلتش لدرجه التشبع
اما بالنسبه للشروق فكل اللي شفته فيها عياده واحده فقط لا غير بس معرفش الاماكن اللي ممكن يتفتح فيها عياده
فسؤالي لسكان الشروق
هل عندكم عيادات اسنان في الشروق كويسه ولا لأ
و ايه الاماكن المتاحه لعياده اسنان
السلام عليكم ,
فعلا عيادات الاسنان الخاصة قليلة فى الشروق بس بيكون فى دكاترة اسنان فى المراكز الطبية و اعتقد أنسب مكان هيكون فى قلب المدينة عند الجهاز لانه أكتر مكان فى نسبة اشغال عاليه بس الموضوع محتاج دراسة و مقارنة بين العبور و الشروق و انسب الاماكن فى الاتنين و ربنا يوفقك للخير و الاختيار الصح و حضرتك برضة مينفعش الاعتماد على عيادة واحدة سواء العبور او الشروق لان الكثافة مش زى القاهرة يعنى لازم توزع وقتك مثلا يومين فى المدن الجديدة و 3 ايام فى القاهرة .
معلش بقى هو عيادة حضرتك فين عشان انا اسنانى بايظة خالص و عاوز اشيل ضروس العقل .
ماهو الفكره اني حاليا بشتغل جراح وجه و فكين في مستشفي معهد ناصر و معنديش وقت غير 3 ايام ممكن اشغل فيهم العياده
و احنا كدكاتره اسنان مش زي الداكتره البشري ليهم اكتر من عياده و بيلفو عليهم
احنا بنفتح عياده واحده او اتنين بالكتير
انا اساسا كنت بشتغل في مدينه بدر بوزاره الصحه و ترددت كتير علي المراكز الطبيه بالشروق و عارف الشغل اللي بيتعمل هناك
مش ده شغل العيادات
اللي بيتعمل في المراكز الطبيه دي خلع فقط و لو ربنا مسهل في الخامات و المعدات و مع وجود دكاتره عندهم ضمير ممكن تحشي ابلاتين
و المنطقه عند الجهاز فعلا مسكونه كويس لأني كنت بروح كتير عند المنطقه الطبيه بتاعت الشروق القريبه من المول و الجهاز هناك
بس الفكره المساكن دي تنفع تستخدم كنشاط استثماري (عياده يعني) و اسعار الايجار كام و يهمني ان المكان يكون مستواه عالي او متوسط لأن الناس اللي بتروح المراكز بتاعت وزاره الصحه بيكون هدفهم الخلع و شكرا و فكره الخلع دي اخر اخر حل بيلجئ اليه دكتور الاسنان في عيادته