الموضوع: تعمل إيه لو طلبوا منك تتنازل عن الجنسية المصرية علشان تتجنس ؟

لا يمكن طبعا انا بعشق البلد دي بحلوها ومرها وبعدين ليه مش احنا اللي نغيرها للاحسن كل واحد يعمل اللي يقدر عليه ويبتدي يصلح مش نقعد نقول بلد زبالة ما احنا اهلها يعني لازم نصلحها

وشكرا علي الموضوع الجميل ده و قضية مهمة جدا

المشاركة الأصلية كتبت بواسطة thedeveloper87

قلنا نعمل ايه علشان نصلحها؟ ادينا حل عملي واحنا معاك

يا باشا كل واحد في مجاله يعمل شغله صح يعني المهندس يخلي عنه ضمير ويعمل شغله صح والدكتور يعمل شغله صح والله ده مش كلام انشا بس حضرتك ابتدي بنفسك يعني شوف ايه الحاجات الغلط اللي بتعملها وبطلها واعمل شغلك بضمير وعلي اكمل وجه ومتقبلش رشوة من حد ولا ترشي حد عشان يعملك مصلحة واللي احنا للاسف بنجمل في تسميتها يعني تلاقي الراجل بيقولك طب فين الشاي بتاعي شاي ايه دي رشوة وفي حاجات كتير المختصر ان حاول متشاركش في اي غلط

المشاركة الأصلية كتبت بواسطة charming

فى حاجة مهمة جدا انتا ممكن تبقى غريب وسط اهلك
و بعدين مسئلة الجنسية و الحدود احنا اللى عملينها و ليس الخالق
التنازل ملوش علاقة بموضوع انتماء دة اوراق و رسميات لو انتا مسلم او مسيحى فا انتا ليك واجبات ناحية دينك وو طنك و دة بيكون بلافعال و ليس بلاوراق و المستندات الى هما فى النهاية (حبر على ورق)

طيب نيجى بقا للفايدة
مواطن مصرى بيتهان كل يوم (مش عارف ياكل كويس و لا يلبس و لا يمشى من غير مرمتة احساسة العام بكأبة المستقبل و غموضة احساسة العام بلظلم و عدم احترام لأدميتة اللى موجودة فى كل انسان بنى ادم تقدير جهودة لو انسان فعال فى المجتمع و اعطاءة حقوقة يفضل اية تانى انك تسيب البلد بحثا عن الرزق و الاحترام و الحياة الكريمة اللى ملقتهاش وسط اهلك و اللى يخليك توافق على مبدا التنازل لاحقا التنازل على ورق و ليس عن انتماء و مبدا

كلام منطقي 100% و اللي يأكد صحتو اكتر و اكتر قوله تعالي بسم الله الرحمن الرحيم "
"إن الذين توفاهم الملائكة ظالمي أنفسهم قالوا فيم كنتم قالوا كنا مستضعفين في الأرض قالوا ألم تكن أرض الله واسعة فتهاجروا فيها فأولئك مأواهم جهنم وساءت مصيرا" صدق الله العظيم

لا ده كلام انشا للأسف

جرب تنزل المرور ترخص عربية و اتدفعش لبتاع الفحص الورقة اياها .....ابقى قابلني لو روحت في اليوم ده

جرب تعمل شغلك صح و لما مديرك يقولك اعمل كذا (وهو غلط) قله غلط علشان ده مش في مصلحة مصر ...

و ابقى خلي مصر تنفعك و انت في التحقيق و بيتخصملك 10 ايام و تتحط في ملفك نقط سودا تخلي اللي وافق يبقى سابقك و ريس عليك ....

جرب تقول لواحد لواحد بيرمي زبالة في الشارع ...كده غلط يا محترم ...وشوف اللي هايقولهولك أو حتى البصة اللي على وشه و هو بيرميها برضه ....

جرب تقتصد في استهلاك الكهربا لأنك مؤمن بكده و تلاقي الحكومة بتقطع عنك التيار 5 ساعات في عز الحر علشان الشبكة مش قادرة

انتو فاكرين ان قرار الهجرة ده سهل !!!
لا يا سادة

ده أصعب و أشجع قرار

و كتير من اللي عمالين يزايدوا عليه هم أضعف من اتخاذه

لأنه فعلا قرار صعب جدا فوق تخيل أي حد

انت بتبدأ من الأول و انت عندك 30 سنة

في بلد ماتعرفش فيها حد و لا لغة زي أهلها ولا طباعهم

ولا ليك صاحب تركن عليه و لا حد تسأله

ما حدش قعد في بلكونة كده ساعة عصاري و قال أسهل حاجة أهاجر


أنا حاولت أتعايش فشلت

حاولت أصلح فشلت

حاولت أطنش كمان فشلت

حاولت ابقى زي الناس و اعيش سبع ........برضه فشلت

و بمنتهى الصعوبة ....خدت القرار

برضوو حضرتك انت كمان كلامك و منطقي ولازم اتحيز ليك عشان بلدياتي اما بالنسبه لقرار الهجره فانا خدتو و انا عندي 18 سنه صحيح قرار علي قدي بس اهو.....انا من ايام ثانوي عاوز ادرس ميكانيكا السيارات و كان عندي (حلم) اني ادخل صناعه السيارات مصر بس كل محد يعرف كدا كان يقولي هتخش قسم ميكانيكا؟؟ هتعمل ايه يعني؟؟ هتطلع ميكانيكي؟؟؟....و بعد م انهيت السنه الاعداديه في كليه الهندسه جامعه المنصوره ..قررت احول عين شمس عشان فيها قسم سيارات او automotive engineering و بالرغم من ان كل الناس بتطفش من عين شمس عشان التعقيد و الصعوبه انا حولت عشان اخش قسم ملوش مستقبل زي مالكل كان بيقول.......و قسم بيخوشو الناس اللي مش جايبه مجموع في تانيه ميكانيكا (التخصص بدايه من تالته) و قسم بيخوشو فقط حوالي 60 طالب من اصل 430 في ميكانيكا ورغم كدا قررت اسيب العيشه و الراحه في وسط اهلي واجي اعيش لوحدي في القاهره عشان احقق حاجه انا مؤمن بيها....و اما جيت هنا و دخلت عين شمس مكتش اعرف حد ولا ايه النظام ولا اي حاجه في اي حاجه ...وكت عايش في شقتنا و مكنش فيها اي نوع مالتجهيزات او حتي النضافه او الاكل و كت بعقد احيانا باليومين تلاته علي صميت و جبنه (مش بقولكو قصه كفاح) ....دلوقتي السنه خلصت...بس الامور بقت احسن شيئا فشيئا..الشقه ننضفت شويه...شويه و جبنا تليفزيون...بعد شويه دش...بعد شويه نقلت الكمبيوتر...اما عن الكليه فبقي الدفعه كلهم اصحابي و عرفت ناس اجدع من اصحابي في المنصوره..و بدأت استغل قعدتي في القاهره اني اخد تدريبات و كورسات في اماكن مكتش في المنصوره.......اخيرا يعني عشان مطولش عليكو دا هجره نص كم و علي قدي...بس فعلا القرار بيبقي صعب انك تسيب اهلك و اصحابك و تروح مكان متعرفش فيه حد ولا حد يعرفك..بس لو فيه دافع هتاخد القرار...و اعتقد ان مستقبلا ان شاء الله برضو هيكون عندي الشجاعه اني اخد قرار الهجره بره مصر عشان اشتغل في دوله بتهتم بالمجال اللي انا حابه و اخد حقي فيها كبني ادم اولا و كمهندس ثانيا...و اسف علي الاطاله