ابتسم انت في المحروسه
في ناس كتير مش بيعجبهم الحال المايل
و بالرغم من انهم اغلبيه
الا ان النصابين هما اللى ظاهريين
لازم نعمل حمله تطهير للمجتمع من الفئات دي
احنا اغلبيه و هما اقليه
مش هانخليهم يتحكموا في البلد و يمشوها على مزاجهم
النصباية الكبرى اللى اتعرضلها كتير مننا هى نصباية التايم شير.
بتلاقى ولد و بنت شكلهم شيك فى احد مولات القاهرة او فى اى مكان آخر يقعدوا معاك و يعشموك بالهدية المجانية لو سمعت كلامهم للآخر و يفضلوا يحكوا فى اى كلام عن روعة و جمال القرية السياحية اللى هما عايزين يبيعولك تايم شير فيها , بشرط انك تيجى يوم الحفلة اللى هتستلم فيها هديتك (بعد ما تكون دفعت العشرين جنيه دليل الجدية) و بتروح الحفلة ما بتلاقيش اى حاجة.
و فيه صورة تانية واحد صاحبى اتعرض ليها انه راح الحفلة و بالفعل اشترى التايم شير على انه فى قرية جامدة جدا فى الغردقة و لما راح هناك لقيها اسوأ قرى الغردقة - اسمها قرية دهبية - و يكفى انى اوضح انه مفيهاش بحر اساسا.
و فيه صورة تانى من صور النصب بتاعة كروت التخفيضات (اللى كان كريم عبد العزيز بيبيعها فى فيلم فى محطة مصر) بيعدوا عليك فى البيت و بيحاولوا بيبعولك كراسة مليانة اسماء عيادات خاصة و مستشفيات على انها بتتيحلك خصم عند الكشف او اجراء العمليات الجراحية , طبعا كلام وهمى و هلامى , و الغريب ان الناس بتشترى منهم عشانم الكراسة رخيصة.
قصة حقيقة والشاطر يقول من النصاب فينا
كان عندنا قطعة ارض وكنا عارضنها للبيع
فيه واحد تاجر كان عايز يشتريها
الراجل دفع تقريبا60% من ثمن الارض وضرب على الباقى طناااااااااااااااش
هو معاه عقد ابتدائى والناس بتاعته قاعده فى الارض ليل نهار
واحنا معانا الاصول والمفروض يستلمها مع سداد قيمة الارض
المفروض اننا نخلص باقى الارض فى مده لاتزيد عن شهر بالكتير
تقريبا قعدنا نجرى ورا الرجل علشان الفلوس ولا حياة لمن تنادى خصوصا ان الحكومة كانت بتعمل حاجات فى الشارع وكانت الدنيا شبة متدمرة ومستحيل الوصول لقطعة الارض غير سيرا على الاقدام
واحد من طرفنا ذهب للراجل ده على اساس انه مشترى وانه جاد فى انه يخلص
التاجر جرى علينا علشان يخلص فلوسه وياخد اصول الورق بما انه هايكسب من البيع
فى نفس الوقت يجى لينا مشترى والراجل بيتكلم تقريبا فى سعر اكثر من اللى التاجر اخد بيه الارض ب 30% (يادى النيلة)
المهم خفينا صاحبنا اللى كان بيتدعى انه هايشترى الارض وبدأ التمهيد للعبة الكبيرة (انا مش طرف خااااااااااالص فى الموضوع)
واحد ابن مفترية عمل حركة بنت حرام - جاب عربية مهكعه ترامكو وعربية بيجو 405 ونزل فى الارض اللى جنب ارضنا (صاحب الارض كان معروف جدا لكنه غير متواجد والحارس هو اللى قاعد فى الارض)
الارض ديه املاك دوله ولازم يتعمل ازالة للسور ده لأن الشارع عرضة 30متر مش 6 متر
المهم طبعا الحارس متظبط من قبلها وكل الكلام ده والراجل اللى نازل معاه فوق المية ورقة ورسم كروكى للمنطقة بالاضافة للأعمال اللى الحكومة فعلا كانت بتعملها
المهم بعد ما خلص مع الحارس كل اللى قاله للناس اللى كانت فى ارضنا - ان ارضنا كمان فيها مايوازى 80 متر برضو هايدخلوا فى الشارع (مش كل الارض)
التاجر ده صايع جدا وبلطجى جدا ومفيش حد ممكن يقوله تلت التلاته كااااااااااام
الغريبة انه شربها وجرى علينا واحنا طبعا فرحانين انه هايخد فلوسه واننا هاناخد العقد - وهو بيتعامل على اننا مغفلين ومش فاهمين - والارض اتباعت وطبعا حصلت شوية مشاكل محترمة بعدها لكن الموضوع خلص على خير
محدش بيتعلم ببلاش.
الواحد من اللى بيشوفه بيخاف يقف لأي حد
انت لو وقفت تبقى اديتله فرصه يكلفتك و ممكن تتحرج أو ..أو
أحسن حاجة كده تخلع من بعيد.
و الواحد مبقاش يعرف النصاب من اللى فعلا محتاج.
كنت فى الأول لما بأهرب و مبقفش حتى لما حد ينادي عليك بأندم و أقول ليكون عايز مساعدة..بس صدقونى فى أغلب الحالات اللى قابلتها با:ون متأكد أن أغلبهم نصابين.
و بقى عندي مناعة و عصبية حاضرة. مرة من كام شهر كنت ماشى على البحر بتكلم فى التليفون و كان بحوالى 2000 جنيه و بعدها بكام دقيقة لقيت واحد بيوقفنى و بيحكى (أصل أنا سواق و العربية فيها مشكلة و البضاعة و ال...و ال...)أنا تهت فى كلامه و مفهمتش حاجة قلتله بخشونة مع أن أسلوبى العادي هادي: (عايز ايه يعنى؟) قاللى مكالمة بس أتكلم فى التليفون. رديت عليه و أنا بتحرك بالفعل عشان أسيبه و أمشى (معييش تليفون) و عقلى بيرد عليه من جوه (أه أديلك التليفون عشان تاخده و تخلع) قاعد يقولى و هو ورايا : معلش و مكالمة دقيقة واحدة و هتكلم قدامك ..زعقتله و انا بزود سرعتى (معييش تليفون!) سمعته بيقول و انا بأبعد (يا عم معاك مانا شايفك و انت بتتكلم فيه) الباشا كان مراقبنى مع انى حطيته فى جيبى من دقايق و سايب الزحمة كلها و منشن عليا.
للأسف بقيت أفترض الأسوأ لدرجة ان اللى بيقولى الساعة كام فى الشارع و الجو دوشة بأبقى ناوي أسيبه و أكمل رد فعل تلقائي بس معبال ما أميز الجملة من الدوشة بقف عشان أرد عليه
لاء انا واحد من المنيا اتصل بيا وقالى انو معه حتة اثار كان عاوز يبعها معرفش جاب رقمى منين اديت رقمو لوحد صحبى وكلمو وظبط معه ورحلو المنيا وشافو الحاجه واقتنعو انها سليمه وصوروها ووروها لخبير قال ديه سليمه المهم الخبير قال انا عاوز اشوف حته من الدهب ده ( كان عباره عن 365 ونيس ) صاحبى كلم الناس قالولو هات 20000 جنيه ضمان لمينا من بعض انا دفعت 5000 جنيه وهو جاب من اتنين كمان وكملنا الفلوس وسافرو على المنيا دفعو الفلوس وجابو الحته صغيره ملهاش لازمه المهم ودوها للخبير قال ديه دهب عادى وتعبان كمان المهم كلنا اتخضينا وكده وديه كنت فلوس تعبان فيها والله المهم صاحبى رجع تانى علشان يرجعها ويجيب الفلوس ملقهاش الناس هناك والموبيلا ت اتقفلت وكلو زى الفل ومعرفناش نرجع حاجه
طبعا الحكايه مش بالتفصيل بس انا قلت اقلها علشان كلو يعتبر من الموضوع ده وكان من سنه تقريبا
بصوا ياجماعه النصب يمارس اليوم من طبقه العمال والبوابين فى البيوت . العامل ال يتفق معاك على دهان شقه مثلآ بيعمل ايه يقول ندهن ب 2500 ج الشقه وبالمونه 5000 مثلآ . ادينى عربون 1500 ج وبعدين يشتغل يومين زى الفل وبعدين يختفى . ممكن تكون عارف مكانه يقول لك مراتى تعبت ولا ابنى المهم تقعد على الموال شهر واتنين وانتى رامى حاجتك وشقتك لا منها مخلصه ولا منها مفروشه وفى الاخير قاعد فى قهوة فى وسط قتالين قتله ..... وقيس عليها اى حاجه تانيه .. البيه البواب ساكن ببلاش وكهرباء ببلاش وشهريه توجع قلبك وبعدين يجيب طلب ولا اتنين وباى باى كدة وقاعد يخلف عيال يخربشوا عربيتك فى الشارع واغلبهم جواسيس لعصابات او شرطه او سماسرة وانت للاسف المسكين
ياريت علشان نضرب النصب والفساد واحد فينا يجمع كل الاراء دة ونعمل فكرة صناعه قوانين تضربها وكدة شويه شويه البلد تنظف .العالم الحر كدة ودول المؤسسات مطبق انظمه تشبه نظام الجودة الشامل بمعنى كل مشكله حقيقيه لابد من وضع حل لها اما مؤقت او دائم وكل مشكله لو طبقنا معايير الجودة صدقونى البلد فى خلال سنين بسيطه ها تنظف. المشاكل هنا بعضها جنائى وبعضها اخلاقى وبعضها مالى وبعضها تسيب وثغرات قانون الموضوع يحتاج تحديد الحاله ومنها نبدء العلاج
مانا عذرتك فعلا فى الجزء الاولانى لان ده حقك وبترجعه بالحيلة
لكن الرجوع فى البيع لوجود مشترى بسعر اعلى ده اعتقد حرام شرعا والله اعلم
وانا سعيد ان التوقيع عجبك وياريت كل واحد يحاول ينشر الموضوع التوفير ده على كل اللى حواليه وحتلاقى التغيير بيحصل والله تدريجيا فى ثقافة الناس علشان خاطر عيالنا يطلعوا يلاقوا حاجة فاضللهم فى البلد دى:ask:
ايه خلاص قصص النصب خلصت ؟
اللهم احفظنا من النصب والنصابين
والحاجة الأشهر في النصب
واحد يوقفك ويوريلك بطاقته الشخصية..ويعرفك إنه منش محافظة بعيدة(بدليل بطاقته الشخصية)
وبقولك نفس كلمات الإستجداء
عربيتي إتسرق..فلوسي ضاعت...مش عارف مين عمل إيه
ومن الأخر
هوا عاوز يدويك تمن تذكرة رجوع لمحافظته..وبكل إلحاح
ويعرض عليك إنه يسيب ساعته أو بطاقته(لكن إنت طبعا هتتكسف تاخدهم منه)
واحد عمل معايا الموضوع ده في الصيدلية
أنا صيدليتي في الشرقية
دخل عليا واحد ووراني بطاقته(بني سويف)
وقال نفس الموضوع بتاع ان فلوسه ضاعت ..وعرض عليا إنه يسيب الساعة بتاعته(هيا أساسا ماتجبش 4 جنيه)
المهم
قعد يلح ..ويصر ..ويلح ..ويصر
إديته 5 جنيه علشان يمشي..وأنا مقتنع إنه نصاب ..بس علشان يفك مني ويمشي
أصله فضل واقف مايقرب من النص ساعة قدام الصيدلية مش عاوز يمشي
القصص كتير يا ابوصلاح بس فين النفس اللس تحكي :ma:
كان فيه موقف مؤثر قوي حصلي من حوالي سنتين ، كنت ماشي في شارع شهير بالمنيل على النيل وأستوقفني شاب باين على وجهه الأرهاق
الشاب : لو سمحت
أنا : افندم
الشاب : مش هنا فيه جامع كبير كدة
أنا : آه فيه جامع كبير قدام (وبدأت أوصفله مكان الجامع )
الشاب : هو مش الجامع دة بيطلعوا فيه صدقات
أنا : بصراحه معنديش فكره روح وأسأل
الشاب : اصل انا من اسكندرية وجاي مع والدتي عشان بتتعالج في مستشفى هنا والفلوس كلها خلصت على العلاج وعايز اسافر اسكندرية اجيب فلوس ومش معايا تمن تذكرة القطار
* طبعا انا فهمت ان دة حوار وأن قصيدة النصب ابتدت :w6266d
* الدنيا كانت ليل والشارع مظلم الى حد ما فمكنتش واخد بالي من وجهه
* إلى ان كانت المفاجأة !!!!
* حسيت ان الشاب دة شكله مش غريب عليا وبدأت احدق في وجهه وتذكرت ذلك الشاب خفيف الدم ضئيل الحجم الذي كان ضمن شله الجامعه وكان له جملة شهيرة عندما كان يقدم نفسه لأي شخص جديد معنا في الشله وهي باسم مسعد خلقة ربنا
أنا : انت اسمك باسم
الشاب : باسم ... لالا ... (وكان واضح عليه الأرتباك وبدأ يبعد)
أنا : باسم مسعد خلقة ربنا
* سكت شوية وبص في الأرض ثم رفع راسه ونظر ليا بحده حتى يكون متماسكا
الشاب : أيوة انا باسم مسعد ... ممكن تساعدني بقى
أنا : في ذهول ... هو انت مش ساكن هنا في أول الشارع يا باسم
الشاب : لاء اصل ابويا اتوفى وعزلت اسكندرية ... خلاص خلاص شكرا
أنا : في ذهول اكتر ... مالك يا باسم اية اللي حصلك ... أنت واقف بتشحت في الشارع !!!
الشاب : شكرا شكرا ... وابتعد بسرعه
طبعا انا اتأثرت جدا من الموقف وحكيت لأحد اصدقائي من شله الجامعه اللي أنا لسه على اتصال بيهم وعرفت منه ان باسم اتجه لطريق الضياع ( المخدرات ) في آخر سنة في الجامعه واختفى ومحدش عارف عنه حاجه من ساعتها ... لغاية ما انا قابلته
الله المستعان..موقف مؤلم
حصلي موقف مشابه بس اتعرفت مباشرة على زميلي القديم بسرعة برغم إن شكله اتحول بسبب المخدرات..وهو افتكرني بالاسم وبرغم ده طلب مني....نصف جنيه
الشاب ده والده كان راجل محترم وزميل والدي في الجيش....وساكنين في منطقة محترمة ودخلهم كويس والشاب نفسه كان متفوق دراسيا..لكنها المخدرات نسأل الله لنا ولكم العافية
هقولكم على موضوع ناتج عن تأثير المخدرات للتفكير والوعي
في شلة محاميين
دول مدمنين مخدرات زي ما قال الكتاب
وكل الانواع
المهم في مرة طلبت معاهم يجيبوا
واحد بقى من كتر البودرة والكيميا والله تحس انه ضااااااااااااع
كانك شايف عيل عنده
8 سنين وبتحاول تتكلم معاه او تتفاهم معاه
المهم الواد ده مكانش معاه فلوس يجيب بودرة فحب يعمل نمرة على الناس اللي مودة علشان يطلع منهم بفلوسطبعا كان المبلغ المطلوب كبير على الناس اللي موجودة
رغم انهم صحابه جدا
قالهم انا قدامي واد بيبيع (......) بسعر كويس بس الكمية كبيرة وبتاع ولازم نشيل الفرشة على بعض ونقسم تمنها وبتاع - وقتها كان شاحح جدا
راحو قسموا الكمية دي مع ناس تانية بحيث يبقى اللي هيدفعه الفرد قليل
وقالهم انا مش معايا فلوس سلفوني وبتاع المهم واحد سلفه وهو اللي كان متصدر للناس كلها لانهم علاقتهم بيه مكانتش جامدة زي علاقته بالواد ده
*المهم اقنعهم انه لازم ينزل ي مكان زراعة لوحده علشان الواد اللي بيبيع مختفي في المكان ده
المهم طبعا دخل المكان ده ومظهرش وخرج من مكان تاني غير اللي الناس مستنياه فيه
وخد الفلوس وهرب
وصاحبه اللي اتصدرله طبعا شال الليله كلها على دماغي ودفع للناس فلوسها لان هو اللي اتصدرله وقال انا ضامنه وكده
المعلم النصاب ده ظهر بعدها بشهر تحس انه حمل وديع ومعلش وبتاع اصل جالي تليفون قضية في الصعيد واضطريت اني امشي على طول والتليفون فصل شحن
طبعا حجة هبلة من واحد اهبل
المعنى ده من أكثر المعاني في الحياة إيلاما لي..لعل ذلك بسبب كثرة من رأيت من المرضى بعد أن كانوا في تمام الصحة وكيف تسوء حالة البعض يوما بعد يوم حتى يصل إلى مرحلة لو نزع عنه جهاز التنفس لمات
الضعف بعد القوة
المرض بعد الصحة
العجز بعد القدرة
الخرف بعد العقل
كان من دعاء النبي صلى الله عليه وسلم: اللهم إني أعوذ بك من الحور بعد الكور
أي من النقصان بعد الزيادة
آمين يا رب
بالعكس حضرتك فهمتنا غلط المقصود من القصص دي مش التشفى ولا التريقة ... حاش لله
وإنما للأتعاظ عشان كل واحد داخل في الطريق السيئ دة وقرأ كلامنا يمكن يفوقه ويساعده انه يبعد بسرعه قبل السكينه ما تسرقه ويتحول لشخص مدمن ... وربنا يعافينا جميعا
من غير متقول انا مقصدتكمش خالص بكلامى وانا وكل الناس فاهم الهدف من القصة ...بالعكس انا مشفتش من الاساس انكم اتريقتم عليهم وانتوا بتحكوا
بس انتهزتها فرصة علشان افكر نفسي والاخرين ان الدنيا ملهاش امان واى حاجة ممكن تتقلب فجاة ووبدون اسباب...والموضوع ده بقى ظاهر اوى فى الفترة الاخيرة ..ناس فى اعلى المستويات علما ومالا ومكانة وتلاقيهم فجاءة بيقوموا بجريمة غريبة وتضيع حياتهم وحياة عائلاتهم فيها
يعنى لا علم ولا مال ولا صحة ولا نسب ولا نفوذ بيحمى
علشان كده نفسي ان الناس تحافظ على قول "اللهم عافينا" لما يسمعوا قصص تحول زى دى وربنا يعافينا جميعا.. والدكتور بحرى قال كمان دعاء جميل انا اول مرة اسمعه الحقيقة "اللهم إني أعوذ بك من الحور بعد الكور"
أي من النقصان بعد الزيادة
للرفع للأفادة خاصة لأنتشار عمليات النصب والسرقة الأيام دي أتمنى أن كل اللي حصله موقف بعد الثورة يحكيلنا حصل أيه معاه وأتصرف أزاي واللي محصلش معاه حاجة الحمد لله يقرأ المواقف المذكورة هنا للأستفادة والتعلم .
أنا اول ما رحت الجامعة سنة 2002 ابويا كان فرحان بيا اوي و كان عايز يغيرلي الموبايل
المهم اتعرفت علي واحد زميل ملتزم و بيصلي و لا بيكلم بنات وابوة دكتور جامعة و بدقن
و مش بيكلم بنات بقي و الحورات دي
المهم قعد يحكيلي انو بيبع موبايلو 8310
ابوة جايبو من بريطانيا و انه هيشتري واحد مش عارف ايه كده
المهم انا كنت بدور علي الموبايل ده و عاجبني اوي
المهم من هنا لهنا بابا اداني 1800 جنيه و قالي تنزل هاته زيرو من التوكيل و مش تشتري مستعمل
انا قعدت اقنع في والدي انو لقطة ب 1250 ولا 1200 مش فاكر
قالي انت حر
انا كنت واثق في الولد اوي
اشتريت الموبايل و خلاص و حبايب
و بعدها بشهر نمت و صحيت لقيت الموبايل عمل ريستارت و فرمت نفسه
مسح كل حاجة
قلت عادي نوكيا بقي
يومين و كرر الحوار
اخدتو و طلعت علي التوكيل نوكيا
و حكيت للراجل قالي ثانية واحدة اخد السريال و جالي استاذ حازم (صاحبي اللي اشتريت منو الموبايل ) انا اسف قلتلك مش هنصلحو , بس سؤال حضرتك شغلتو ازاي ؟
قلتلو لأ انا صاحب حازم و اشتريت الموبايل ده قالي اصل صاحب الموبايل ( حازم ) جابلنا الموبايل ده من فترة
و كان واقع في مية و عايز بوردة متعرفش هوا شغلة ازاي ؟ احنا بلغناه انه خارج الضمان و مش موجودة البوردة بتاعه !!!!
انا بقي عفاريت الدنيا كانت قدامي
كلمتو و براحة كده حكيتوا القصة
قالي انتا كذاب !!!!!!!
قلتلو عيب و لو مش مصدق تعالي معايا التوكيل
قالي مش جاي عايز اية ؟
قلتلو اعتبر اني اجرت منك الموبايل ب 250 جنية
خد الموبايل و هاتلي 1000 جنية
قالي لأ
قلتلو هاتلو الدكتور فلاني ( ابوة )
كلمت ابوة و حكيتلو
قالي انتا بتتبلي علينا يا ابني
قلتلو حضرتك ممكن تيجي معايا و تسمع كلام الراجل من التوكيل
و واجه ابنك
قالي انتا جاي بعد شهر ترمي بلاك علينا و الموبايل بايظ
قلتلو يا حاج انتا في سن والدي و عيب لما اقول لحضرتك ده اسمه
غبن في البيع
انتا راجل كبير و مصلي و حاج بيت الله
قفل السماعة في وشي !!!
نزلت بعت الموبايل في اول محل موبالات ب 750 جنية و استعوضت ربنا
و طبعا ولا بقيت ارد عليه السلام في الجامعة و قاطعتة
بعدها بكام سنة شفت عجب العجاب
حظه العافر انه في البنش قدامي بزاوية
يعني شايفة و شايف بيعمل اية
لقيته فاتح كتاب جوه الشنطة
و الشنطة بين رجله
و لابس كاب علي راسه
و قاعد ينقش من الكتاب
و سألت عليه العيال اصحابنا قالولي ده حريف غش
و ده اقل حاجة
و الله علي ما اقول شهيد في كل حرف !!!!
و منو لله
للرفع...موضوع مميز...مضحك ومحزن
كنت باشتغل في محل سوبر ماركت وانا طالب وواحد جه بيبيع بضاعة جملة وقالي ان صاحب المحل طلب بضاعة وجابها معاه و انه عايز تمنها حالا فعطيته ثمنها ولما جه صاحب المحل قالي انه ميعرفش حاجة ولا طلب بضاعة
ياجماعه الايام دة محدش يشترى عربيه بتوكيل . ال بيحصل توكيل وتيجى تنقل الملكيه تلاقى مافيش ورق وانضحك عليك ولبست العربيه. معلش اخسر نقل ملكيه واضمن ورق العربيه وخالصه مخالفات وادفع فلوسها ونام وارتاح اليومين دول اى حاجه بتوكيلات مش مضمونه
طب انا بقسط مع بنك لاقيتهم بيتصلوا بيه بيقولولى فى 130 جنيه مصاريف ادارية ده يبقى ايه، مش عارف طلعت ازاى دى، هل فعلا ده من حقهم؟؟؟؟؟؟؟؟
كنت ماشى فى السيده عائشه بالعربيه انا و واحد صاحبى والدنيا زحمه وحاجه آخر وجع قلب
وبعدى أتوبيس بسرعه قليله مش كبيره ياعنى ممكن 30 ومره واحده لاقيت صوت طااااخ فى العربيه من ورا
المهم رحت راكن على جنب بسرعه وقولت أنزل أشوف ايه!!
نزلت لقيت واحده ست كبيره عاوزه تتخانق وتقول انت خبطنى ... يا ست انا أخبطك إزاى وانت بعيد عن وش العربيه أصلاً
والست عاوزه تتخانق
انا قولت يمكن وانا مشوفتهاش ... قولتلها انا آسف وحقك عاليا والناس هدت المواضيع
ومشيت انا و صاحبى وخلاص
بعديها بكام يوم بحكى لواحد على اساس ان الواحد ممكن يخبط حد او حاجه وهوه مش واخد باله
قالى دانت كان هيتنصب عليك
قولتله إزاى
قالى دول ناس بيجوا فى الحته الزحمه ويقوموا خبطين بإيدهم على الرفرف الورانى جامد أكنك خبطهم وتقوم انت نازل بسرعه من العربيه وناسى موبايلك او محفظتك او أى حاجه مهمه وتقعد ترغى وتتكلم معاهم
وتلاقى واحد تانى معاهم جه خد أى حاجه من العربيه وانت مشغول ورا فى الخناقه
قولت الحمد لله أنى أول ما نزلت من العربيه متعود أقفلها بالريموت على طول
فكل واحد ياخد باله من الموضوع ده
ويحاول ميحطش أى حاجه مهمه قدامه لأنه ممكن ينزل وينساها وتنسرق منه
انا كل اللى اتعرضت لية الحمد لله النصاب ما بيخدش منى حق ولا باطل وعلى سبل المثال
* ايام ما كنت رايح الكلية كنت مشمع الفتلة وشايل المسطرة حرف تى وقفنى واحد من اياهم من بتوع الفلوس وقعت منى وعاوز اروح وكان الموضوع لسة جديد وكان ماسك فى ايدة ربع جنية فقلتلة عاوز تروح فين قالى كذا، قلتلة خلاص اقف فى المحطة دى واركب اتوبيس كذا وتذكرتة بربع جنية وانت معاك ربع جنية بصلى اوى وقالى لا اصل وفصل، قلتة اصل اية هو انت عاوز تروح فى تاكس فضحك وقالى (لا حلوة دى) وسبنى ومشى.....
*كنت شغال كاشير ايام الاجازة واتعرضت لحركة نصب من بتاع ما اديتك الفلوس وعاوز الباقى ، فا اول مرة قلت جايز اكون خد الفولس وناسى بعد كدة اتكررتكتير وببقى واخد بالى اوى من اللى داخل على وناوى ينصب وساعتها بياخد اللى فية النصيب من اهل الخير
* اخيرا بقى البنت اللى بتتصل على التليفون الارض وتقولى مبروك احنا عاملنا سحب عشوائى على رقم حضرتك وكسبت معانا سلعة بقيمة 400 جنية، قلتلها كويس اية المطلوب قالتى احنا هنبعت لحضرتك مش عارف جهاز اية ب 700 جنية فهنخصم 400 جنية وهندهولك ب 300 جنية قلتلها طب انا محتاج حاجة فى حدوالمبلغ اللى كسبتة بس قالت لا شكرا ماينفعش ومرة تانية قالتلى انت كسبت برضة مش عارف اية مجانا وهنجيبة لحضرتك لكن هتدفع 25 جنية مصاريف شحن قلتلها طب انا هاجى هستلمة قالت لا ماينفعش وشكرا...
ودى نصباية على الماشى بيحكيها واحد صاحبى.....
-----------------------------------
من خمس سنين قرأت في جريدة الأهرام ان فية حجزشقق في قلب القاهرة وكان الإعلان يقول انت الآن في قلب القاهرة وكان الحجز بمقر نقابةالمهندسين بالجيزة و كانت الشركة المالكة للمشروع اسمها الشركة العالمية للإنشات و الاستثمارات العقارية.
ذهبت للاستفسار عن الموضوع قابلني شخص مهذب يرتدي البدلة و عاملني كما يكون اخ اكبر لي تماما و يريد اسداء النصيحة الى.
اخبرني عن شروط الدفع و مساحات الشقق و ان موعد التسليم بعد سنتان و نصف اقتنعت بكلامة و حجزت الشقة و دفعت المقدم و بدأت الأقساط الشهرية و خذ عندك التالي:-:-
مساحة الشقه 80 متر مربع و ليست 130 متر
تسلمت الشقة بعد خمس سنوات و ليست بعد سنتان ونصف.
تم تركيب عدد 1 اسانسير و لم يعمل حتي الآن بالرغم من ان التعاقد يشترط تركيب عدد 2 اسانسير
حتي الأن لم يتم توصيل المياه و الكهرباء للوحدات (واخد وصلة من العداد التجارى بتاع المشروع وخزان العمارة بيتملى من خرطوم المشروع برض).
اثناء التعاقد تم زيادة عدد مبلغ 5000 جنية لان الشقة تري حديقة الفسطاط و القلعة و بعد استلام الشقة اكتشفت ان الشقة ترى القلعة و حديقة الفسطاط بصفة مؤقته حيث ان الأبراج المجاورة و التي تقع على ناصية الشوارع الرئيسية ستحجب رؤية حديقة الفسطاط و القلعة.
اثناء التعاقد قال لي ان لكل شقة مكان بالجراج و بعد سنتان ارسلت لى الشركة خطاب بأن الجراج بمبلغ 25000 جنية.
ذهبت لمقر الشركة اكثر من مرة للشكوى و قدمت شكوى رسمية لصاحب الشركة و لم اجد اي استجابة.
كانت شروط الدفع مجحفة لي حيث وضع شرط عندما اتأخر في الدفع ينص علي فسخ العقد دون الرجوع لمحكمة ولو فسخت العقد استرد فلوسى بنفس طريقة السداد ياعنى اللى دفعتة من خمس سنين استردة على اقساط شهرية و كنت مضطر الالتزام بهذه الشروط و علي النقيض لم يضع شرط يلزمة بالتسليم بالموعد المحدد وتم دفع 75% من تمن الشقة قبل استلامها.
في النهاية اريد ان اخبركم عن مدي سوء التعامل مع هذه الشركة و نصيحة عند توقيع أي عقد شقة يجب الاستعانة بمحامي .و اطلب منكم الدعاء
----------------------------------
بصراحة موضوع مفيد جدااا