الموضوع: امبارح كان موعدى معها انها السيفيك

السلام عليكم الحمد لله وبعد تفكير طويل وبعد ما قررت انى احجز السيفيك من توكيل هوندا يوم 15/1 وانتظارها حتى 15/4 قد رزقت بمبلغ من المال وقدرت الحمد لله اشتريها تسليم فورى ب 150 الف جنية بالعافية وبعد طلوع الروح والحمد لله كان هنالك اللون الازرق الزهرى اللى كنت عايزة واليكم نتيجة تجربة السيارة لمد يومين بس يومين تقريبا العربية ما وقفتش بس للاسف مقدرتش اجرى بيها علشان التلين ولنبدأ بالمميزات
اولا لو اتكلمت عن الانطباع الخارجى للسيارة فهوة بجد تحفة ولا يمكن ان يقارنبة اى سيارة فى فئتها غير ان ماشاء الله اللون الزهرى عليها يهبل
ثانيا:العربية من جوة ما شاء الله جامدة جدا غير بقى العدادات والتابلوة ما شاء الله موضوع العدادات الديجتال دة مخليها فخمة اوى
ثالثا:ثبات العربية ماشاء الله يتحسد بالذات فى المنحنيات العربية مكلبشة فى الطريق
رابعا التكيف طبعا تلاجة ودة عادى فى اى عربية يابانى
خامسا العربية واسعة جدا وعلى فكرة انا طولى 188 وابنى الكبير 192 وبيركب احيانا ورايا وعادى جدا طبعا رجلية بتبقى لازقة فى ضهر الكرسى بس يدوبك لامسة......تخيلو انتوا بقى اد اة الوسع
التسارع من صفر ل 100 فى وقت قليل يمكن الطلعة بطيئة شوية بس شغالة
جودة التقفيل والخامات رائعة ولما تفتح الكبوت هتنبهر بالتنظيم الشنطة واسعة

اما العيوب والتى قد تجعل البعض يبتعد عن تلك السيارة وهى الاقل الى الاصعب فى رأى
كماليتها فقيرة نوعا ما تنقصها الستبترونيك والشبورة وفتحة السقف والجنوط غير ان المكان اللى فية الكاسيت دة قديم شوية والمفروض ان الخليجة الكاسيت دة مدمج.ومفيهاش الاوبشن اللى نازلة فى بنت عمها الكورولا الكبوت كمان قصير جدا والموتور قريب نوعا ما الاكصدام الامامى ودة يخوف مع الخبطات الشديدة انة يجيب الموتور ربنا يستر.....قوة الفرملة ضعيفة نوعا ما اذا ما قورنت باخواتها الكورولا والانسر والمازدا ولما تعوز تجربها اربط حزامك كويس وامشى كدة على 70 وفى مكان واسع اوى واضرب فرامل مرة واحدة بس اللى قلبة ضعيف ما يعملش الكلام دة
(وانا فى رأى ان تلك العيوب لاقيمة لها اطلاقا مع سيارة تلبى لك كل الاحتياجات اللى انت عاوزها)
اما العيب القاتل هوة ان العربية واطية شوية وعلى فكرة سيبكم من كلام المواقع الاجنبية والكلام اللى مكتوب فى الكتالوجات العربية اوطى من الكورولا بشوية والشوية دول الصراحة همة اللى يخلوا الكورولا عمرها ما تحك فى اى مطب بس يخلوا عربيتى تحك فى 5 مطبات فى خلال يومين بس الاحتكاك بسيط.....بس المشكلة ال5 مطبات دول كانوا عالين وكان راكب فى العربية 5 افراد اما اليوم اللى كنت لوحدى ما حكتش فى اى مطب.................عموما انا سمعت انها مصفحة من تحت وان اللى بيحك دة القوايم اللى بطول العربية وعموا انا ناوى اخر الاسبوع ارفعها فى بنزينة واشوف اة الموضوع من تحت دة............

الف مبروك على العربية
بالنسبة للفرامل , برجاء قراءة كتالوج العربية جيدا , ستجد تحذير من استخدام الفرامل القوية اول 1000كم
وذلك حتى تطبع الفرامل