المشاركة الأصلية كتبت بواسطة noon_eg
الاخوه الاعزاء انا اشتريت صنى 2010 منيوال من اسبوعين وفيه شويه حاجات لاحظتها ما كانتش موجوده عندى فى العربيه الصنى القديمه ( كانت موديل 1999 منيوال يابانى )
وعايز كل واحد معاه صنى منيوال يدخل ويشارك علشان تعم الفائده ان شاء الله
اولا
التدوير صباحا
بدأ الاداره صباحا عمليه المفروض انها بسيطه لكن عمرها ما بتدور من اول مره علما بانى مش لاقى فى الكتالوج اى معلومه عن بدا الادراه ( العربيه القديمه كنت تكارك مرتين وترفع رجلك عن البدال لو بارده -- وتدوس دوسه خفيفه لو سخنه )
العربية مفيهاش اى مشكلة في التدوير ( يا عم الحج العربية زيرووو ) يعني إزاى تكارك و الكلام ده
انت أفتح كونتاكت الاول و أستنى لما لمبه الإيرباج و الabs يطفوا بعدها دور العربية من غير ما تدوس بنزين ولا غيرة
ثانيا
البنزين
العربيه بالتجربه فايقه اكتر فى بنزين 90 عكس المتوقع -- لما باحط 92 باحس ان العربيه بترعش وبتعمل كيلومترات اقل فى ال 92 مع ملاحظه ان مافيش معلومه فى الكتالوج عن الاوكتين الموصى به
أنا مجربتش بصراحة 90 و أنا حاسس ان الرجرجه دي عشان لسه رجلك مش واخده علي إرتفاع الدبرياج
و النقطه بتاعت الأوكتان دي موجوه في كتالوج العربية في الأخر خالص
ثالثا
التكييف
لما بيشتغل بيعمل صوت ونه مسموعه لما بتكون ماشى على الاول او واقف فى اشاره تختفى عنى توقف الكباس ( الكمبريسور ) عن العمل وتعود بصوت مسموع عند اعاده تشغيل الكباس -- فى السرعات العاليه لا يظهر هذا الصوت لان صوت الموتور بيكون عالى
المفروض انك تسمع صوت زياده مع صوت موتور العربية عشان في حاجة تانية أشتغلت معاه وهو التكييف فمتشغلش نفسك بالنقطة دي
وعمتاً العربية في الاول بيبقي صوتها عالي جدا
رابعا
العفشه
العفشه متماسكه بس ناشفه جدا خصوصا قدام وبتحس بترزيع -- زى مايكون فيه حاجه مفكوكه فى علبه الدركسيون
مفيش الكلام ده بس بتحس بأى مطب أو أى حفرة أو نقرة بتعدي عليها
خامسا
الانوار الاماميه
حاسس انها عاليه جدل لدرجه ان النور العالى لما افتحه مش باشوف الطريق من كتر ما هو عالى بزياده
الكلام ده صح صح صح نفس الكلام كان معايا و كنت حاسس أن النور العالي أساساً مش ملامس الاسفلت من أساسه و ضارب في نص العربيات ايلي قدامى
لازم تظبطة
سادسا
الدبرياج
حاسس انه عالى عن الطبيعى -- وشفت كذا شكوى من ناس عندهم عيب اسطوانه - فهل هم ما اخدوش بالهم من عدم ضبط الدبرياج من اول ما اشتروا ؟
وهل يمكن ضبط ده عند صيانه الاف المجانيه ؟
نفس الكلام برضة حصل معايا و للأسف مينفعش تعلي أو توطيي الدبرياج لأنه علي ضغط زيت بس انا دلوقت أتعدوت عليه خلاص
سابعا
صيانه الالف
انا عملت 1500 كم للان ولسه ما عملتش صيانه الالف- قلت استنى لما اطلع كل الملحوظات قبل ما اروح -- تنصحونى اعملها فيه احسن مكان ؟
وهل فيه مشكله انى استنى لغايه 2000 كم ؟
طبعا في مشكلة عشان غيار الزيت بس مش أكتر
و لو انت من القاهرة عندك السبع ولو من الأسكندرية عندك مركز الحضرة
ياريت اللى عنده تعقيب او رد على النقاط المطروحه يرد ويعرفنى ممكن اعمل ايه وخصوصا المهندس سبعاوى والناس الخبره فى منتى نيسان الرائع
على فكره انا مش متضايق من العربيه بالرغم من الملاحظات الصغيره لانى كل شىء بسعره واللى عايز ياخد حاجه برفكت يشترى كرولا او اوكتافيا ب 150 الف -- ده للناس اللى ناويه تدخل تقطم فى العربيه وتطلعها مالهاش لازمه
يا عم الحج كل برغوث علي قد دمه و العربية زيها زى أى عربية مقارنه في سعرها وكويس ان وصلك الإحساس ده ان العربية مناسبة لسعرها يعني متظلمهاش و تقارناه بالأغلي منها ولا برضة بالأقل منها في السعر
الدور و الباقي علي العربية إياها إيلي محسسنى انها تساوى قد سعرها مرتين ( حدش فاهم حاجة )
تحياتى
