Wartsila-Sulzer RTA96-C , اقوى محرك ديزل فى العالم !!

من كام يوم كنت مع احد اصدقائى العاملين بهيئه قناه السويس وكان بيكلمنا عن المحركات العملاقة المثبته فى ناقلات البضائع الفوق عملاقه زى ما بيقولوا عليها , واخدنا الكلام عن محركات متوحشة بخرج قوى يتعدى ال 100.000 حصان

لالا متستغربش , ايوه فعلا 100.000 حصان من القوه من مجرد محرك , هو فى الحقيقه هتبقى كلمه ساذجه قوى اننا نقول عليه مجرد محرك لأن المحرك ده لو وقف على عجلات وربطنا فيه امبابه ممكن ناخدها كلها رحله فايد ونرجعها اخر النهار

اول محرك اتكلمنا عنه كان محرك من شركه مان بقوه 101 ألف حصان , صديقى كان من ضمن فريق دخل غرفه المحرك للكشف على عطل ما وتنسيق بعض الامور مع طاقم الناقله بخصوص رحلتها الملاحيه داخل القناه وكلمنى عن شويه معلومات عن المحرك العملاق ده , منها مثلا ان طبعا علشان المحرك ده يشتغل الموضوع يتطلب مارش زى اللى فى العربيه

وعلشان ده مش محرك بحجم طبيعى فالمارش برده مش طبيعى , خدلك بقا نفس عميق , المارش يا سيدى اللى بيبدأ تحريك المحرك المان ده هو محرك V12 توين تربو بسعه 10 لتر بخرج قوى فوق الالف حصان يادوب كل اللى بيعمله انه بيضغط هوا فى خزانات عملاقه ودفعه الهوا دى بتدخل البساتم بتاعت الموتور الكبير علشان تحركها لدوره كامله فالموتور كله يشتغل

ده بجانب بقا انه يقعد يشرحلنا دوره التبريد اللى ممكن لو شغلناها على اسوان تعملها موسكو بكره الصبح ونظام ضخ الوقود وغيره من القطع السوبر عملاقه اللى بيشتغل عليها المحرك ده

وبعد كدا انتقل الكلام للموتور الديزل الاقوى عالميا , Wartsila-Sulzer RTA96-C هو اسمه والحقيقه هو اسم لا يليق ابدا بوحش كاسر قوته حوالى 109 ألف حصان ( مسمعش حد بيقولى ده صافى ولا من على الكرنك ) وعزمه 7 مليون و 555 ألف و 222 نيوتن / المتر

7 مليون ونص نيوتن يعنى , حاجه كدا لو ربطناها فى حبال وحد طلع سلبلنا القمر فيها هنشده نجيبه هنا الصحراء الغربيه وبعدين نشوطه نرجعه يدور حوالين بلوتو , انا لما كان صديقى بيحكى الارقام دى كنت بقول ايييية الكافيه كله بيلف يبص يشوف مين المجنون اللى عمال يزعق ده

الموتور المذكور اعلاه وزنه 2300 طن وبيتم صناعته فى اليابان وبعد ما بيصنع بيدخل ورشة بناء السفينه وبعدبن هى اللى بتتبنى حواليه مش هو اللى بيسقط جواها ( صوره توضيحيه لحجمه )

طوله حوالى 27 متر وارتفاعه ما بين 13 ل 16 متر

http://img685.imageshack.us/img685/2...neelephant.jpg

وزن عمود الكرنك لوحده 300 طن

http://img693.imageshack.us/img693/7946/rta96ccrank.jpg

سعه كل سلندر منفصلا حوالى 1820 لتر ( 1820.000 سى سى ) , يعنى السعه الكليه للمحرك حوالى 25.5 لتر , طبعا استهلاك الوقود اقتصادى من الطراز الاول ومناسب جدا لإستخدام الاسر الصغيرة بمعدل 7550 لتر وقود كل ساعه , سبعه طن ونص ديزل كل ساعه , يعنى بياكل حموله عربيتين شيل من اللى بتقفل الاوتوستراد الصبح دى كل ساعه على ما انت تضرب طبق الفول بالليمون الصبح وسايب الباخره تسخن الموتور يكون هو خلص ربع بير بترول

وبالمناسبه الموتور سرعه دورانه 102 لفه فى الدقيقه فقط


طبعا القطع الداخليه للمحرك مش هزار , ولا مثلا تقعد تتخيل زى ما انا عملت فى الكافيه وتقول طيب لو الكاتينه قطعت وحبينا نغير صبابات ولا نخرط ونعمل عمره هنجيب مخرطه منين , هو على العموم يعنى طلع على تروس مش كاتينه :)

دى شويه صور ليها

http://img682.imageshack.us/img682/7...a96cpiston.jpg

http://img682.imageshack.us/img682/7997/pistonss.jpg

اللى طالع ده مش ريش تثبيت , دى المواسير اللى بتوصل الزيت لفوق :H_angry[1]: ( موااااسير )

http://img576.imageshack.us/img576/317/pistonrods.jpg

http://img138.imageshack.us/img138/3...96ccyldeck.jpg

ودى صوره لنسخه من الموتور بعد الانتهاء من صناعتها

http://img823.imageshack.us/img823/6058/rta96c.jpg

انا بصراحه مكنتش متخيل ان فى محركات بالقدرات دى , وكنت لما بسمع رقم 10 الاف حصان ولا 30 الف حصان كنت متخيل ان دى حدود قوه المحركات العملاقه دى بس الموتور ده ابهرنى بالفعل

واتمنى كمان يكون ابهركم بنفس القدر

( ملحوظه : الصور المعروضه بعضها لنسخ اصغر من المحرك لكن كل المواصفات خاصه بالنسخه ال 14 سلندر الاكثر قوه )

ان شاء الله غبور منزلها في الفيرنا الجديدة :)

ده على الشاحنه العملاقه Emma Marsk ودى اكبر سفينه شحن فى العالم برضه
http://gcaptain.com/maritime/blog/wp...-underway.jpeg

http://www.nzshipmarine.com/images/Emma%20Maersk.jpg
http://masterroad7.files.wordpress.c...sk_sailing.jpghttp://www.emma-maersk.info/picture/...sk_mooring.jpg


من ويكيبديا

Emma Mærsk is powered by a Wärtsilä-Sulzer 14RTFLEX96-C engine, currently the world's largest single diesel unit, weighing 2,300 tons and capable of 109,000 horsepower (82 MW).[13] The ship has several features to protect the environment, some of which include exhaust heat recovery and cogeneration. The exhaust gases of the engine are passed through a steam generator which then powers electrical generators to generate electricity. This creates an electrical output equivalent to about 12 percent of the main engine power output. Some of this steam is also used directly as shipboard heat.[14] Instead of biocides, used by much of the industry to keep barnacles off of the hull, a special silicone-based paint is used.[4] This increases the ship's efficiency by reducing drag while also protecting the ocean from biocides that may leak. The silicone paint covering the part of the hull below the waterline is credited for lowering the water drag enough to save 1200 tons of fuel per year. The ship has a bulbous bow, a standard feature for cargo ships.

اقتباس:

---

المشاركة الأصلية كتبت بواسطة evoo90

ده على الشاحنه العملاقه emma marsk ودى اكبر سفينه شحن فى العالم برضه
http://gcaptain.com/maritime/blog/wp...-underway.jpegمن ويكيبديا

emma mærsk is powered by a wärtsilä-sulzer 14rtflex96-c engine, currently the world's largest single diesel unit, weighing 2,300 tons and capable of 109,000 horsepower (82 mw).[13] the ship has several features to protect the environment, some of which include exhaust heat recovery and cogeneration. The exhaust gases of the engine are passed through a steam generator which then powers electrical generators to generate electricity. This creates an electrical output equivalent to about 12 percent of the main engine power output. Some of this steam is also used directly as shipboard heat.[14] instead of biocides, used by much of the industry to keep barnacles off of the hull, a special silicone-based paint is used.[4] this increases the ship's efficiency by reducing drag while also protecting the ocean from biocides that may leak. The silicone paint covering the part of the hull below the waterline is credited for lowering the water drag enough to save 1200 tons of fuel per year. The ship has a bulbous bow, a standard feature for cargo ships.

---

تسلم يا ايفو على المعلومات دى

انا كمان لقيت معلومات اكثر فظاعه عن الموتور ليها علاقه بالناقله دى

حاجه وهم :b4_556:

اقتباس:

---

المشاركة الأصلية كتبت بواسطة Eng.Geo

ان شاء الله غبور منزلها في الفيرنا الجديدة :)

---

ههههههههههههههههههههههههه هههههه

انا بفكر اسقطة فى عربيتى
لاب وجاتى ولاباجانى زوندا بقى ولا الكلام الفاضى دة
دا نا هاقفل الللللللللللللللللللللللل لللل
تفتكرو الموتور دة يبقى سرعتة كلم على عربية عادية؟

علي فكرة أنا كنت بأشتغل علي سفن بها مثل هذه النوعية من المحركات و كنت في الوردية الواحدة (4 ساعات) علشان أعمل كشف روتيني علي الحرارات و الضغوط و فحص للمحرك أثناء عمله و التأكد من ان كل شئ مظبوط بأخد وقت حوالي ساعة و نصف لأن المحرك عبارة عن عمارة من ثلاثة طوابق (دور للرؤوس - cyl. heads) و (دور لمنطقة التوربينات scv. manifold and turbochargers) و الدور الاخير و ده تحت فيه أبواب الكارتير (crankcase)

حلو قوي الموتور ده ... أنا فعلا كان نفسي في واحد زيه أحطه في عربية دفع رباعي على قده ..


























على فكرة ملحوظة صغيرة عشان ماحدش يغهمني غلط .... أنا قصدي على المارش الـ في 12 توين تربو اللى مش عارف كان كام سي سي ده !!؟؟






... لأن بعد كده نظري ماجابش

اقتباس:

---

المشاركة الأصلية كتبت بواسطة se_coralsea

علي فكرة أنا كنت بأشتغل علي سفن بها مثل هذه النوعية من المحركات و كنت في الوردية الواحدة (4 ساعات) علشان أعمل كشف روتيني علي الحرارات و الضغوط و فحص للمحرك أثناء عمله و التأكد من ان كل شئ مظبوط بأخد وقت حوالي ساعة و نصف لأن المحرك عبارة عن عمارة من ثلاثة طوابق (دور للرؤوس - cyl. Heads) و (دور لمنطقة التوربينات scv. Manifold and turbochargers) و الدور الاخير و ده تحت فيه أبواب الكارتير (crankcase)

---

ساعه ونص كشف دورى :) , ده اقل واجب فعلا

ربنا يعينك يا بشمهندس انا قعدت كدا اشوف شويه اعمال صيانه للمحركات دى اكتشفت انها فيلم كبير فى كل حاجه مش بس الحجم والقوة

اقتباس:

---

المشاركة الأصلية كتبت بواسطة n.y.s.m.a

حلو قوي الموتور ده ... أنا فعلا كان نفسي في واحد زيه أحطه في عربية دفع رباعي على قده ..

على فكرة ملحوظة صغيرة عشان ماحدش يغهمني غلط .... أنا قصدي على المارش الـ في 12 توين تربو اللى مش عارف كان كام سي سي ده !!؟؟

... لأن بعد كده نظري ماجابش

---

تخيل مارش v12 توين تربو :)

انا اول ما قريته قولت يعنى المارش بتاعه اقوى من موتور الفيرون اللى المفروض اسرع عربيه تجاريه فى العالم

سلامه نظرك يا باشا

'طيب من 0 لـ 100 كيلو بيجى فى قد ايه
أراهن عربيتى أسرع

ههههههههههههههههههههه

مشكور إيفووو على المعلومات الخطيره دى

اييه ده .. انا كنت فاكر ان محركات القطارات هي الأكبر والأقوى

ودة فى منة استيراد يركب على الانوس ولا لازم اعدل القواعد :):)

ينهاااااااااااااااار بتنجان انا كنت متصور ان متور السفن دية كبيرو حاجة جامدة لاكن مش بالمنظرالمبالغ فية دة ......

حقيقى تسلم ايدك يا باشا على الموضوع

اقتباس:

---

المشاركة الأصلية كتبت بواسطة Ahmed Nouh

ساعه ونص كشف دورى :) , ده اقل واجب فعلا

ربنا يعينك يا بشمهندس انا قعدت كدا اشوف شويه اعمال صيانه للمحركات دى اكتشفت انها فيلم كبير فى كل حاجه مش بس الحجم والقوة



تخيل مارش v12 توين تربو :)

انا اول ما قريته قولت يعنى المارش بتاعه اقوى من موتور الفيرون اللى المفروض اسرع عربيه تجاريه فى العالم

سلامه نظرك يا باشا

---

عارفين بقي العمرة بتتعمل أزاي في المحركات اللي من النوعية دي ؟؟

أولا .. التعامل بيكون بالوحدة .. يعني (رأس - أسطوانة - مكبس - عمود مكبس - كراسي)
cylinder head - liner - piston - piston rod - big end bearing

كمان المكبس بيكون عبارة عن 3 أجزاء :
tag - skirt - rod
كل وحدة بيتعمل لها العمرة بتاعتها لوحدها و بتتعامل علي أنها محرك مستقل بذاته علي عدد ساعات تشغيل

زمن اجراء العمرة الكاملة ممكن يوصل الي 12 ساعة لو فيه تغيير للقميص أما في حالة وجود مكبس بديل جاهز بدون تغيير للقميص فممكن زمن العمرة يصل الي 6 ساعات لو الطقم مدرب بشكل جيد

أما نصف العمرة (تغيير الرأس فقط) فممكن يتم خلال زمن من (3 -4) ساعات

الطريف بقي أن لو المحرك ده مكون من 9 وحدات مثلا (زي معظم المحركات اللي أشتغلت عليها) فمن الممكن فصل وحدة كاملة عن العمل و تشغيل المحرك بالثماني وحدات المتبقية و هذا بعد عمل بعض الاجراءات و ده بيكون في حالات طارئة نتيجة لوجود خلل بهذه الوحدة

حقيقي الموضوع ده كبير و يتكتب فيه مواضيع و لكنه شيق جدا و كل جزء في المحركات البحرية حكاية لوحده , البحر في حد ذاته عالم أخر له قوانين و أليات تحكمه مختلفة تماما عن الارض و أهم مبدأ فيه هو السلامة safety first و ده اللي أحنا بنفتقده هنا في عالم البر

لو انتوا حقيقي مهتمين بالموضوع ده ممكن أكتب لكم عدة موضوعات عن السفن الكبيرة و تشغيلها و المعدات الموجودة عليها

مع خالص تحياتي
م/ سمير الشهاوي

ينفع اسقط الموتور ده في الـــ126
ولا لا

اصلي بفكر اخليها اسرع سيارة في العالم

عشان اعلم ع الفيرون

هههههههههههه

يا فكرتي بعربيتي القديمه كانت برمود كنترول

يا نهار ابيض ايه كل ده, ده ممكن و هما بيصينوه ينسوا مهندس جوه سلندر ولا حاجه.

حاجة جبارة يركب عندى فى الشاهين دة

اقتباس:

---

المشاركة الأصلية كتبت بواسطة د.محمود صلاح

اييه ده .. انا كنت فاكر ان محركات القطارات هي الأكبر والأقوى

---

القطارات بتمشى على قضبان حديد لو حاجه زقتها من ورا هاتمشى لوحدها ( اقصد سهله الحره ومافيش مقاومه جامده عليها )
شوف انت بقى وانت بتعوم الميه بتبقى تقيله فى ايدك ازاى وبعد شويه بتتعب من ازاحه الميه تخيل بقى الناقله دى اد كام ايد من ايدينا !!! شوفت محتاجه قوه اد ايه عشان تزقها وتحركها فى الميه :verygood:

اقتباس:

---

المشاركة الأصلية كتبت بواسطة evoo90

القطارات بتمشى على قضبان حديد لو حاجه زقتها من ورا هاتمشى لوحدها ( اقصد سهله الحره ومافيش مقاومه جامده عليها )
شوف انت بقى وانت بتعوم الميه بتبقى تقيله فى ايدك ازاى وبعد شويه بتتعب من ازاحه الميه تخيل بقى الناقله دى اد كام ايد من ايدينا !!! شوفت محتاجه قوه اد ايه عشان تزقها وتحركها فى الميه :verygood:

---

مش بس مقاومة المياه لأ و مقاومة الهوا كمان , تخيل عمارة من 9 طوابق بتتحرك ضد الهوا و المياه و ياسلام بقي لو فيه عاصفة

ليه بس التعقيد ده

هو احنا ناقصين

حرررررررااااااااااااااااا اااام
انا نفسيتي تعبت
انا كنت بس اشوف الموتور 2500 سي سي بتعب
ده 1820000 سي سي
يالهوي

محركات عملاقه فعلا

اقتباس:

---

المشاركة الأصلية كتبت بواسطة د.محمود صلاح

اييه ده .. انا كنت فاكر ان محركات القطارات هي الأكبر والأقوى

---

محركات القطارات عاديه جدا ومفيهاش اى مواصفات تشد للدرجه , انما موضوع السفن ده ياكل الدماغ

اقتباس:

---

المشاركة الأصلية كتبت بواسطة ahmedtefagad

ودة فى منة استيراد يركب على الانوس ولا لازم اعدل القواعد :):)

ينهاااااااااااااااار بتنجان انا كنت متصور ان متور السفن دية كبيرو حاجة جامدة لاكن مش بالمنظرالمبالغ فية دة ......

حقيقى تسلم ايدك يا باشا على الموضوع

---

الله يكرمك يا استاذ احمد

اقتباس:

---

المشاركة الأصلية كتبت بواسطة SE_coralsea

عارفين بقي العمرة بتتعمل أزاي في المحركات اللي من النوعية دي ؟؟

أولا .. التعامل بيكون بالوحدة .. يعني (رأس - أسطوانة - مكبس - عمود مكبس - كراسي)
cylinder head - liner - piston - piston rod - big end bearing

كمان المكبس بيكون عبارة عن 3 أجزاء :
tag - skirt - rod
كل وحدة بيتعمل لها العمرة بتاعتها لوحدها و بتتعامل علي أنها محرك مستقل بذاته علي عدد ساعات تشغيل

زمن اجراء العمرة الكاملة ممكن يوصل الي 12 ساعة لو فيه تغيير للقميص أما في حالة وجود مكبس بديل جاهز بدون تغيير للقميص فممكن زمن العمرة يصل الي 6 ساعات لو الطقم مدرب بشكل جيد

أما نصف العمرة (تغيير الرأس فقط) فممكن يتم خلال زمن من (3 -4) ساعات

الطريف بقي أن لو المحرك ده مكون من 9 وحدات مثلا (زي معظم المحركات اللي أشتغلت عليها) فمن الممكن فصل وحدة كاملة عن العمل و تشغيل المحرك بالثماني وحدات المتبقية و هذا بعد عمل بعض الاجراءات و ده بيكون في حالات طارئة نتيجة لوجود خلل بهذه الوحدة

حقيقي الموضوع ده كبير و يتكتب فيه مواضيع و لكنه شيق جدا و كل جزء في المحركات البحرية حكاية لوحده , البحر في حد ذاته عالم أخر له قوانين و أليات تحكمه مختلفة تماما عن الارض و أهم مبدأ فيه هو السلامة safety first و ده اللي أحنا بنفتقده هنا في عالم البر

لو انتوا حقيقي مهتمين بالموضوع ده ممكن أكتب لكم عدة موضوعات عن السفن الكبيرة و تشغيلها و المعدات الموجودة عليها

مع خالص تحياتي
م/ سمير الشهاوي

---

انا بجد فعلا نفسى اعرف اكتر عن الموضوع ده

طيب الاوناش اللى بتدخل تصين ده بتتثبت ازاى ولا هو بيبقى معمول حسابها ومتثبته مسبقا جوا غرفه المحرك , ده بجانب ان اصلا ازاى قطع الغيار العملاقه دى بتدخل المركب وهى فى الميه وازاى مهمه بالحجم ده تخلص فى الاوقات البسيطه دى وازاى اصلا ممكن يتعمل صيانه فى المحرك وهو شغال والسفينه ماشيه كدا !!!

ياريت يا بشمهندس اول ما وقت حضرتك يسمح بجد تمتعنا بالحديث فى الموضوع ده

اقتباس:

---

المشاركة الأصلية كتبت بواسطة NFS

يا نهار ابيض ايه كل ده, ده ممكن و هما بيصينوه ينسوا مهندس جوه سلندر ولا حاجه.

---

ههههههههههههههههههههههههه ههههههههههههههههه , وممكن وحياتك ينسو ونش مش بس مهندس

بس على اى حال يعنى ايا كان اللى هينسوه جوا مشكلته لن تتعدى مجرد تشغيل المحرك وهيطلع مع اول فتحه صباب للعادم :) , بس على شكل بخار بقا ويبقى حظه وحش لو الموتور متربن

اقتباس:

---

المشاركة الأصلية كتبت بواسطة Mohamed.Raafat

ليه بس التعقيد ده

هو احنا ناقصين

حرررررررااااااااااااااااا اااام
انا نفسيتي تعبت
انا كنت بس اشوف الموتور 2500 سي سي بتعب
ده 1820000 سي سي
يالهوي

---

لالالا انت مخدتش بالك , ال 1820000 ده سعه السلندر الواحد انما الموتور كله 25.000.000 سى سى :shine[1]:

اقتباس:

---

المشاركة الأصلية كتبت بواسطة Ahmed Nouh

انا بجد فعلا نفسى اعرف اكتر عن الموضوع ده

طيب الاوناش اللى بتدخل تصين ده بتتثبت ازاى ولا هو بيبقى معمول حسابها ومتثبته مسبقا جوا غرفه المحرك , ده بجانب ان اصلا ازاى قطع الغيار العملاقه دى بتدخل المركب وهى فى الميه وازاى مهمه بالحجم ده تخلص فى الاوقات البسيطه دى وازاى اصلا ممكن يتعمل صيانه فى المحرك وهو شغال والسفينه ماشيه كدا !!!

ياريت يا بشمهندس اول ما وقت حضرتك يسمح بجد تمتعنا بالحديث فى الموضوع ده

---

بالنسبة للاوناش اللي بتستخدم في رفع قطع الغيار بتكون مبنية أساسا من ضمن تجهيزات غرفة الماكينات و هيا كمان بدورها لها برنامج صيانة و شهادات و كشف دوري و هي بتكون من طراز ال bridge cranes

أما قطع الغيار العملاقة دي بتدخل عادي جدا من خلال فتحات موجودة بغرفة الماكينات hatchs بواسطة ونش أخر مثبت علي سطح السفينة

اما عن كيفية انهاء العمرات او الاصلاحات في المدة اللي اتكلمت عنها قبل كده فده بيكون نتيجة أن طاقم الماكينات اللي بيشتغل عنده خبرة بمثل هذه المحركات و مؤهل علي قدر عالي جدا بالاضافة الي أن الصانع لما بيعمل محرك زي ده بيعمل معاه المعدات الخاصة بصيانته special tools اللي بتخللي اداء الصيانة يتم في وقت قليل

اما عملية الصيانة فمش ممكن تتم و المحرك شغال و لكن لازم يكون متوقف عن العمل
و لكن فيه أنواع من الكشف و الاختبارات بتتم أثناء التشغيل زي :
- اختبار كفاءة الحريق
- اختبار ضغط الانضغاط و معرفة حالة الشنابر و هل فيه منها شنابر مكسورة و لا لأ
- قياس القدرة المتولدة من المحرك و قياس العزم الناتج
- و من خلال متابعة الحرارات و الضغوط يمكن معرفة حالة بعض الاجزاء و تحديد العيوب تمهيدا لعمل الصيانات أو الاصلاحات اللازمة في أقرب فرصة

عموما سوف أكتب أن شاء الله في أقرب فرصة عن هذا الموضوع بالتفصيل بس اخد فرصة أجهز فيها المادة كاملة بالصور و الافلام علشان يكون الشرح وافي

مع خالص تحياتي
م/ سمير الشهاوي

موضوع شيق جداً

شكراً ليكم بجد يا جماعه على الموضوع ده

فعلاً مواتير المراكب دية ليها مقاييس تانيه خالص

طيب يا بشمهندس سمير مقلتلهمش على كمية الغزعاج اللي بيعملها محرك الديزل اد ايه

انا الحمد لله نفدت من الديزل و اشتغلت في بخار :3mla:

بجد معلومات تحفه وكنت محتاجها وبقالى كتير بدور عليها وطريقة عرض تحفه بج دواحلى حته بتاع بير البترول هاها :b4_388::b4_388:

اقتباس:

---

المشاركة الأصلية كتبت بواسطة Mzeid

طيب يا بشمهندس سمير مقلتلهمش على كمية الغزعاج اللي بيعملها محرك الديزل اد ايه

انا الحمد لله نفدت من الديزل و اشتغلت في بخار :3mla:

---

الصوت طبعا بيكون عالي جدا في المحركات البحرية و لكن في المحركات العملاقة عادة بيكون مقبول نظرا لأنها محركات بطيئة (أقل من 250 rpm)

المشكلة بتكون في المحركات متوسطة السرعة (500 rpm فأكثر) و عالية السرعة و دي اللي بيكون الصوت فيها مرتفع جدا لذا يجب أستخدام واقيات للأذن و ألا بعد فترة بيحدث ضعف للسمع
و من الطبيعي أن يتم عمل كشف دوري علي العاملين في غرف الماكينات كل 5 سنوات للتأكد من سلامة الأذن و العصب السمعي بالاضافة الي عدة أختبارات طبية أخري لبيان مدي لياقتهم و قدرتهم علي أداء مهامهم

عرفتوا قد ايه احنا صغيرين

واحنا مش عارفين نصنع عربيات او نجمع عربيات بجوده عاليه :_Alshmokh08[1]:

المفاجاة بقي و اللي كتير مايعرفهاش أن محركات سولزر الشهيرة بأنها ثاني المحركات البحرية بعد ال b&w من تصنيع بلد ليس لها سواحل علي أي بحر و هي سويسرا

اما بالنسبة لمصر ... فحدث و لا حرج ... مانعرفش حتي نعمل صامولة في المحركات دي

اقتباس:

---

المشاركة الأصلية كتبت بواسطة SE_coralsea

اما بالنسبة لمصر ... فحدث و لا حرج ... مانعرفش حتي نعمل صامولة في المحركات دي

---

هي دي

لاننا على الارض بنبقى مش مقدرين حجم القوى اللي محتجاها السفن العملاقة او حتى الطائرات.
مثل طائرات الشحن اللي بتستخدم اكثر من jet engine كل واحد بقوة هذا المحرك.