الموضوع: هو حب تاني عيل ..زي حب أول عيل !!!!! سؤال لأصحاب العيال 2 فما فوق

المشاركة الأصلية كتبت بواسطة kareemz

الف مبروك و ربنا يرزقك الذرية الصالحه ان شاء الله

أنا من رأيى ان الطفل الاول بيكون الاهتمام بيه أكبر بكتير لانه حاجه جديده و بتشوف حركاته لأول مره و حاجات جديده عليك .. اقرا الموضوع ده

تصرف الأم بعدالولادة بابنائها الثلاثه

لو بلع قرش

الطفل الاول: تطلب عمل اشعة للولد.

الطفل الثاني: تقلق شوية عليه ، وتستنى وتشوف بيبلع الفلوس ويهضمها والاَّ لأ؟

الطفل الثالث: تخصمه من مصروفه

الملابس

الطفل الاول: تلبس ثياب الحمل من اول لما تعرف انها حامل.

الطفل الثاني: تحاول اتلبس ثيابها العادية لاطول فترة ممكنة.

الطفل الثالث: ثياب الحمل هي ثيابها العادية اليومية.

الاعداد للطفل

الطفل الاول: كل دقيقة تغيير للطفل.. وتحاول تخلي ريحته حلوة.

الطفل الثاني: كل ثلاث ساعات.

الطفل الثالث: لما ريحته تطلع.

خخخخخخخ

القلق

الطفل الاول: من اول خبطة تجري عليه و تشيله.

الطفل الثاني: تشيله لو حست ان خلاص فيه سيارة بتصقعه.

الطفل الثالث: احسن..علشان تتربي... خلي السيارة تدوسك.

هههههههههه

الاكل

الطفل الاول: تغسل اى حاجة تقع على الارض.

الطفل الثاني: تغسلها بشوية ماي.

الطفل الثالث: تمسحها فى ثيابها.

الفسح

الطفل الاول: الملاهي... - المرجيحات ..النادي.

الطفل الثاني: النادي.

الطفل الثالث: السوق.

الخروج

الطفل الاول: تخليه مع اختها و تتصل تطمن عليه كل خمس دقايق.

الطفل الثاني: تخليه مع اختها... و هي على الباب تفتكر تخلي رقم التليفون حق المكان اللي هيه بتروحه.

الطفل الثالث: تخليه مع أى حد.. مع تحذير بان ما أحد يتصل بها الا فى حالة يكون فى الموضوع دم.

فى البيت

الطفل الاول: كل دقيقة تتفرج على ابنها وهو نايم.

الطفل الثاني: من وقت للثاني تتاكد ان الكلب(الطفل الاول) ما أكل إيد الولد.

الطفل الثالث: تغيب عنهم الا لو سمعت صوت صراخ.

تحليل دقيق جدا وواقعي قوي كريم باشا
بالنسبة للحب و المعزة كلها بتبقي واحدة انت بس بيتهيألك دلوقتي في الوقت الحالي ان بنتك هي حبك الوحيد عشان لسه الهانم التانية ما شرفتش انما مجرد ما تتولد حتلاقي ربنا نزل حبها في قلبك بشكل فظيع و علي فكرة الاباء غير الامهات في الشعور ده لان الام بيتولد معاها الاحساس ده اول ما بيحصل الحمل و دي حاجة فطرية كده لانها بتبقي جزء لا يتجزا منها
انما طبعا الاهتمام بيكون مع الطفل الاول اكثر بكتير من التاني و ده سببه ان الابوين بيكونوا اكتسبوا الخبرة المناسبة مع الطفل التاني يعني انا مثلا عندي مازن الكبير عنده 8 سنين و كان و هو صغير بيبقي قلقي عليه مالوش حل يعني مش مجرد ما يمرض اجري بيه او الكلام ده انما بيبقي قلق مفرط لدرجة بتستفز الاهل من حواليك لدرجة انه لما كان عنده سنتين و معظم كلامه مش مفهوم وديته لدكتور تخاطب و من غير ما حد يعرف من اهلي او اهل مراتي عشان ما يدبحوناش و مرة تانية نزلت الفجر بالشبشب لاقرب مستشفي لما كان عنده برد و كان سخن شوية
انما مالك الصغير و عنده 4 سنين انا اللي بعالجه بأيدي لما يمرض لدرجة انه ما بيفرقش بين الدوا و الحاجة الحلوة و كل يوم يقولي يا بابا ما تنساش تجيبلي معاك دواء و انت راجع
الاتنين حبهم واحد طبعا انما الاهتمام هو اللي مختلف حسب المرحلة السنية يعني انا عندي مازن دلوقتي الراجل بقي بطل في الكاراتيه بسم الله ما شاء الله و حاصل علي الحزام البني فطبيعي حيبقي قلقي عليه اقل من اخوه اللي ممكن يؤذي نفسه من غير ما يعرف و انا بصراحة مش مقتنع خالص بالرأي القائل ان الكبير بتبقي معزته اعلي سنة عن التاني لاني بالفعل بكرههم ...اقصدي بحبهم هما الاتنين بنفس النسبة بس ممكن مثلا مالك احبه الصبح اعلي من مازن سنة و بعد الظهر احب مازن سنة اعلي شوية انما قبل ما ننام الاتنين حبهم بيبقي واحد

ربنا يباركلك في بناتك و يلا تقل جيبك و ظبط الودايع عشان العرسان مستنيين