السلام عليكم اعضاء نايل موتورز العزيز ... حصلت معايا شوية حاجات بالصدفة وكنت عايز اتناقش معاكوا فيها
الحكاية وما فيها ان من كام يوم كنت بلعب بال wd 40 وعمال ارش على المفصلات وقفل حزام الامان واى حاجة فيها احتكاك للمعادن
وكان معايا فوطة فيبر بمسح بيها اى زيادة من الاسبراى علشان مايجيش على بلاستك او جلد زى ما الاعضاء نوهوا قبل كدة
المهم وانا برش على مفصلات الكبوت جه شوية سبراى على الدهان الخارجى المهم مسحتها بالفوطة بس الحصل ان لاقيت الجزء اللى مسحته بالفوطة بيلمع لمعة جميلة
وبدأ حب الاستطلاع والتجربة يلعب فى دماغى وهووووب .. لاقيت نفسى عمال برش اسبراى على الفوطة وامسح بيها العربية .. زى مايكون فوطة زفرة بس على نضافة ... ومالكوش على اللمعة وجمال العربية بعديها
......................................
المهم قولت ما هو ال wd40 ملمع ومنظف وبيعمل جرعة زيت علشان كدة بيلمع العربية .. بس ربنا يستر وما يكونش بيلم تراب
قولت اعمل تجربة بالمرة وهى كدة كدة العربية كانت حتتغسل فى البنزينة تانى يوم ... وروحت راكنها تحت شجرة بحيث اشوف ايه اللى حيحصل
وقد كان نزلت بعد حوالى 6 ساعات وكانت العربية نزل عليها شوية تراب مس مش بتلم تراب زى الاول ... بالاضافة ان جيبت الفوطة اللى كنت بمسح البيها العربية والحاجة الجميلة ان التراب كان بيتشال من عليها بمنتهى السهولة يمكن احسن من الواكس الالمانى اللى انا بستخدمه
......................................
ومن ساعتها وانا تحولت الى مدمن wd40 كل يوم قبل ما اطلع البيت اديها ماسحة بيه وارجع الصبح الاقى العربية نضيفة وجميلة ومش بتلم تراب
.....................................
المفاجأة بقى ... بعد كام يوم من ادمانى لهذا الاسبراى والنهاردة تحديدا ... الحصل ان كان عندى خربوش كبير بطول الكبوت من العيال ولاد التيييت اللى بيخربشوا العربيات بالمسماير
و بقدرة قادر النهاردة الخربوش قل جدا لدرجة انه غير ملاحظ الا لو قربت للكبوت جامد مع العلم انه كان فاضح العربية
وعجزت فيه ولا حتى البوهيجى عرف يعمل معاه حاجة ولا واكس ولا بولش ولا كومبوند ولا حتى قلم بوية بلون العربية
....................................
عندى سؤالين محيرنى
1- ايه هى المواد اللى ممكن تكون فى ال wd40 يكون غطا الخربوش اللى حاكيتلكوا عنه ؟
2- هل لو فضلت استخدم wd40 فى تلميع العربية هل ممكن يأثر على الدهان على المدى البعيد ؟
3- يا ريت لو حد ليه تجربة معاه يقولها لكى تعم الفائدة
ملحوظة الموضوع غير قاصر على مناقشة استخدام wd40 ولكن على كل ما يخص نظافة السيارة