سعر شقتك كام ؟؟؟؟؟؟؟؟ اوعى تكون اكتر من 250 الف

طلت علينا الصحف بالأمس
لكي تخبرنا بالمفاجأة الكبيرة
التي سوف تسعد الناس وهتخليهم يطيروا من الفرحه من اعلى كوبري في مصر وينطوا في النيل
طبعا مش علشان ينتحروا لأ ده من الفرحه طبعا

الخبر ان الوزير الله ........ بتاع المالية
هيعفي الشقق اللي سعرها اقل من 250 الف من الضرائب العقارية الجديدة
وهما بيقولوا ان ده هيخلي ان 90% من المصريين هيحصلو على الأعفاء ده
وحسب الله ونعم الوكيل

-----------------------------

وعلى راي مش عارف مين
غطيني وصوتي عليا يا صفيه
او
Cover me and cry ya safiaaaaaa



السؤال اللي هبلني بجد

لو انا واحد متخرج وابويا كان معاه فلوس وطلع معاش مثلا او باع الل حلته علشان يبني عماره لأولاده في منطقة كويسه او بمساحه كبيره وكان بنيها برخيص مثلا يعني مش شرط ان الراجل يبقى من الاغنياء يعني
وابنه اتخرج وجوزه والواد يادوب هه بيعرف ياكل فول وطعميه كل يوم


تيجي الحكومة بنت ........
تقوله يا حبيبي شقتك بكام ...... بــ 400 الف مثلا
طيب هو الواد مش هوا اللي بنيها وابوه مثلا بناها بفلوسه اللي قعد يحوش فيها طول عمره ومتهيألي ان كل الشعب المصري بيعمل كده كل بيقعد يحوش فلوس علشان في الأخر يبني عماره لأولاده ويجوزهم وخلاص على كده

طيب ده مش معنى اني قاعد في شقه سعرها عالي لأي سبب
ممكن لأن المنطقة غليت
ممكن لأن المساحه كبيره

طيب ذنبي ايه انا مش فاهم
واجيب 14% من قيمة اجارها السنوي كل سنه ازاي انا مش عارف والله الناس دي بتفكر ازاي
بجد الناس دي بتهرج وبتستعبط كمان
لا وكمان خلي بالك الشقه اللي سعرها 400 الف مثلا هيبقى اجارها كام كمان واحسبه واضربه في 14% كل سنه ...... كارثة والله بجد

وعلى فكره كمان يمكن الموضوع ده مش ملاحظ في القاهرة اد ما هو ملاحظ جدا في المحافظات التانيه
لأن المحافظات ضغيرة الحجم واسعار الشقق في مناطق عاديه بتعدي المبلغ ده من بدري
يا راجل ده لو في منطقة عاديه عندنا في المنصورة واشتريت شقه 120 متر مثلا على الأحمر بتعدي الــ 200 الف من بدري وبعدين شطبها والكلام ده هتعدي الــ 250 الف اللي بيقول عليهم المتخلفين دول



انا مش بتكلم على نفسي ولكن في ناس كتير قاعدين في شقق غاليه للأسباب اللي انا ذكرتها دي ودخلهم لا يسمح طبعا بالكلام ده

ده معناه انه بيقوله روح يا شاطر بيع الشقه واشتري شقه في اي حته شعبيه علشان دي مستواك في الدلخل

ممكن اعرف اراءكم
وياريت لو يكون في حلول نطرحها لبعضنا للتخلف ده

السؤال هنا هو قيمة الشقة بتتحدد على اى اساس؟ تقديرية يعنى ولا مكتوبة فى عقد الشقة وللا ايه؟

MMamdouh

على فكرة الموضوع موجود في دول أوروبا
و هما بيدفعوك ضرائب عقارية شهرية لا تقل عن 80 يورو و لا تزيد عن 200 يورو حسب مساحة البيت .... و حسب المنطقة و السعر الحالي للعقار
---------------------------------------------------------
و لكن هنا في مصر الدخل إلى حد بعيد مختلف أختلاف كبير و لكن الحكومة قالت العقارات التي أقل من 250 ألف
بس بصراحة أنامش عارف هي الحكومة مش عارفة أسعار العقارات دلوقتي بقيت عاملة أيه ؟؟؟؟؟؟؟؟
دي كلمة 250 ألف بقيت زي 25 ألف من كام سنة
و أنا بصراحة مع الحكومة في تحصيل ضرائب عقارية و لكن أريد في مقابل ذلك خدمات و نظافة شوارع و شوارع ممهدة تمهيد جيد
و إلى أخره من خدمات يجب أن تقدم مقابل تلك الأموال
و أيضا لا يجب أن تزيد هذه الضرائب عن حد معين و يكون في مقدور الناس سداده

قيمة الشقة تقديرية طبقا لسعر السوق في الوقت الحالي وقابلة للتغير تبعا لمتغيرات اسعار السوق...يعني من الآخر هاتزيد مش هاتقل

طب انا أعرف ناس عالمعاش (يعني بكتيره 1000 جنيه في الشهر) وساكنين في الزمالك ومصر الجديدة ومدينة نصر (آخر عباس العقاد) في شقق إيجار قديم وبيدفعوا حوالي 14 جنيه في الشهر بس....دول بقى ها يعملوا ايه؟؟؟؟؟؟؟

طب وانا..انا اعمل ايه؟؟؟ انا اشتريت شقتي في المقطم بـ75 ألف ودلوقتي تمنها 300..وبعدين دي شقتي وعايش فيها مش باكل منها عيش..ادفع عليها ليه يعني. من حلاوة رصف شوارع المقطم..وبعدين هي الحكومة عايزة تنمي موارد الدولة من جيب الناس بدل زيادة الانتاج...في حكومة في الدنيا بتعمل كده....وبعدين الناس ها *********** امتى..دلوقتى ولا في سبتمبر

ملحوظة: تم وضع النجوم بمعرفتي للحفاظ على أعضاء المنتدى من المسألة القانونية..بجد مش هزار

المشكلة ان الحكومة بتسثمر في المواطنين اللي هيا اصلا اخترعوها علشان تخدم المواطن

اقتباس:

---

المشاركة الأصلية كتبت بواسطة ecybrarian

قيمة الشقة تقديرية طبقا لسعر السوق في الوقت الحالي وقابلة للتغير تبعا لمتغيرات اسعار السوق...يعني من الآخر هاتزيد مش هاتقل

طب انا أعرف ناس عالمعاش (يعني بكتيره 1000 جنيه في الشهر) وساكنين في الزمالك ومصر الجديدة ومدينة نصر (آخر عباس العقاد) في شقق إيجار قديم وبيدفعوا حوالي 14 جنيه في الشهر بس....دول بقى ها يعملوا ايه؟؟؟؟؟؟؟

طب وانا..انا اعمل ايه؟؟؟ انا اشتريت شقتي في المقطم بـ75 ألف ودلوقتي تمنها 300..وبعدين دي شقتي وعايش فيها مش باكل منها عيش..ادفع عليها ليه يعني. من حلاوة رصف شوارع المقطم..وبعدين هي الحكومة عايزة تنمي موارد الدولة من جيب الناس بدل زيادة الانتاج...في حكومة في الدنيا بتعمل كده....وبعدين الناس ها *********** امتى..دلوقتى ولا في سبتمبر

ملحوظة: تم وضع النجوم بمعرفتي للحفاظ على أعضاء المنتدى من المسألة القانونية..بجد مش هزار

---

اقتباس:

---

المشكلة ان الحكومة بتسثمر في المواطنين اللي هيا اصلا اخترعوها علشان تخدم المواطن

---

أيوه يا جماعة كل حكومات أوروبا و الولايات المتحدة و كندا يحصلون ضرائب عقارية من ملاك تلك العقارات لتحسين موارد الدولة و لبناء طرق و تنظيفها جيدا و قبل تنظيف الطرق يتم تنظيف جيوب المواطنين في تلك البلاد و جاء الدور على المصريين اللي هما جيوبهم أصلا نظيفة تماما

يا اخ توت
المشكلة ان الدول اللي حضرتك بتتكلم عليها دي
دخلهم غير دخلنا احنا خاص
دي حاجه
وتاني حاجه ان احنا متاكدين مليون في الميه ان الفلوس دي هتروح على الدهان بتاع الأرصفة والأسفلت اللي فيه خاصية المراجيح
ده غير المكافأت اللي بتوع المحليات بياخدوها بمناسبة الفلوس الجديده اللي وصلتلهم
وطبعا انا عارف انهم فئة منهم وليس كلهم
ولكن احنا قدامنا كام سنه لحد ما الشوارع تبقى حلوه
وده تفائل بصراحه بقوله وانا مش مقتنع لأن من داخل متاكد مليون في الميه انها مالهاش حل بجد يعني لن المشكلة فينا كلنا وليس مشكلة فئة معينه

ولكن ممكن تقولي انت بقه بعقلك اللي بيقبض 1000 معاش وخلي بالك ان ده اكبر معاش موجود في مصر يعني لو وكيل ورزاة بيطلع على المعاش بيقبض 1000 جنيه
طيب يدفع هو بقه كام في شقته اللي قاعد فيها في منطقة كويسه ومنين يجيب الفلوس ويصرف منين اذا كان يعول لسه احد

عندى سؤال غريب جدا

العقارات اللى فيها شقق مؤجرة ايجار قديم ب 15 جنيه و 25 جنيه وثمنها حاليا يتعدى المليون جنيه.

مين اللى هيدفع ضريبتها العقارية، المالك اللى بياخد عليها ملاليم لا تساوى تكلفة تحصيلها

واللا المستأجر الموظف على المعاش اللى ساكن فيها من 30 سنة وحخلة يادوبك على القد؟

بالظبط كده يا سبعاوي
انت متعرفشي هما عاوزين ايه
طب هبعملوها ازاي انهم يفرقوا في الحاجات اللي زي كده
في حالات كتير زي كده مينفعشي لها التهريج ده

حسبنا اللـــــه و نعم الوكيل
الأيام دى كل القرارات اللى بسمعها بتحسسنى إن الحكومة مش عايزة تحسن أوضاع الناس لأ دى عايزة تخلى الناس تبطل تتكلم على حالها المايل و اللى يتكلم يدوبك يدعى بأن الأوضاع ما تتدهورش أكتر من كده و تفضل على حالها .
و من ضرائب عقارية لضرائب أصحاب المهن لإرتفاع أسعار كل شئ (حديد .. أسمنت.. مواد تموينية..بنزين .إلخ ) إلى رفع الدعم إلا عن فئه قليلة من المساكين و تحويل غير مستحقى الدعم _فى و جهه نظرهم_ إلى محدودى الدخل ....نجد أنفسنا فى حالة خوف و ترقب دائم و ناقص يصبح علينا يوم يقولوا عندنا 80 مليون مواطن للبيع بس للأسف لم يعد لنا سعر لا فى الداخل و لا فى الخارج
و حسبنا اللـــــه و نعم الوكيل
و الله قلبت علينا المواجع يا أبو عبدالله

لا داعى للقلق يا جماعه
احنا شعب مايتغلبش , واذا كانت الحكومة ناصحه , الشعب المصرى انصح و كل عقدة وليها حلال و كل صامولة وليها مفك , احنا اللى دهنا الهوا دوكو
الناس هاتفتكس طريقة ما ... انا أعمل بالقانون و عارف , فى مائة طريقة لتغير البيانات و الحقائق و قلبها رأس على عقب فى كل شئ ( طبعاً ده مش اسلوب صحيح و انا مش معاه , لكن الناس ما بيدها حيلة) ,و بعدين انتو نسيتو دور الاعلام دلوقتى , ممكن تصعيد اى موضوع و تحويلة الى قضية رأى عام و هو ده اللى بينفع..
لا تقلقوا أوى كده

تعليقاً علي راس الموضوع .. و علي الاخ ابو عبد الله .. احب اقولك .. فيه حاجه اسمها تحايل علي القانون .. و دي حاجه بسيطه خالص .. انت ببساطه بتستفيد منثغرات القانون .. يعني ؟ .. الحكومه بتاعتنا بتتعامل بالورق (مش معقول يعني يدورو يعرفوا ال 75 مليون دوول عايشين ازاي) .. يبقي اللي بيحصل كالاتي ..
الوالد يملك عماره بنهالكو (نفس النظام هنا عندي يعني المثل واحد و يعم علي فئه كبيره من الشعب) ..
العماره قول مساحه الارضيه 250 متر .. مقسومه علي عدد شقتين (2 شقه) يبقي الشقه الواحده مساحتها 125 متر .. لو انتوا 4 اخوات و البيت دورين .. بكل بساطه تاخد السيد الوالد الشهر العقاري و يبيعلك شقه .. و يبيع لاخوك شقه .. و كل اخ من اخواتك شقه (اوعي تبيع لجيران هههه ) و تعمل توكيل عام منك للسيد الوالد .. .. و بكده هايبقي البيت بتاعكم برضه .. و انت اخذت الشقه اللي بنهالك ابوك .. و في العقد تحط المبلغ اقل من الاحد الاعفاء بكتير .. و بكده تبقي سلكت من تحت ايديهم .. و خلصت الحكايه ..
نفس الحكايه كانت بتحصل مع الضرايب و شركات الاشخاص / الافراد و كده للاستفاده من الاعفاءات الضريبيه التي تصدر بقرارات و الحوارات القرعه دي ..
يا باشا هم عايزين ورق .. نعملهم ورق .. و احنا الحكومه !

حضرتك انت هتدفع على الشقه الملك اللي انت قاعد فيها

وبعدين انا عندي مثلا كل واحد من اخواتي له دور كامل
يعني هتدفع هتدفع

فل قوي .. انت هاتدفع علي الشقه الملك اللي انت قاعد فيها .. لما يبقي البيت بتاع الوالد كله .. هاتدفع هاتدفع .. انما لو بيُعت البيت لكل اخ شقه .. هايبقي البيت علي الورق مقسم شقق .. و نصيبط شقه واحده .. و هوه ده اللي هاتتحاسب عليه قدام القانون .. و كمان لما تكتب في العقد مبلغ اقل من حد الاعفتء .. 100 الف مثلاً .. تبقي انت معفي يا حج .. و كذلك اخواتك كله حسب المبلغ اللي اتكتب في العقد ...
جمعت الصوره كده ولا لسه ؟

لا يا جماعه معتقدش تقديريه حسب سعر السوق
هياكيد هتبقى بسعر اللي مكتوب على الورق
سعر اللي تم به شراء السكن

كل حاجه في مصر بتتعامل علي الورق يا باشا .. ورق سليم دوس و اعمل اللي انت عاوزه .. اهم حاجه ورقك سليم .. امشي عدل .. تحتار حكومتك فيك هههه

الوزير كان في برنامج وجهة نظر أول امس و قال ان كل الشقق الإيجار القديم معفاة و ان حساب الضريبة بيتحسب لكل وحدة على حدة و قال مثلا لو عندك اكتر من شقة تمن كل واحدة فيهم أقل من 250,000 يبقى مش هتدفع حاجة هتدفع فقط علي الشقق اللي تمنها أغلى من كده (ده كلامه والله أعلم) و قال ان حساب الضريبة بيبقى على سعر السوق للشقة مالوش دعوة باللي مكتوب في العقد من خلال تقسيم الجمهورية الى مناطق أ؛ب؛ج؛..... و لكل منطقة سعر في المتر وخلاص
وحسب كلامه (!!!!) ان الضريبة لمعظمنا (للشقق أقل من مليون)هتبقى في حدود 70 الى 80 قرش لكل 1000 جنيه من تمنها في السنة يعني لو شقتك اتسعرت بـ 500,000 ألف فانت مطلوب تدفع من 350 إلى 400 في السنة..
بالرغم ان المبلغ مايعتبرش كبير في وقتنا هذا الا ان الناس مش حاسة بأي تقدم في أي مستوي سواء طرق تعليم صحة اجور اسعار توظيف ..... و يمكن هو ده سبب رفض الناس لفكرة دفع أي ضرائب جديدة

انا خايف الحكومة تعمل ضرايب على الهدوم والمتعلقات الشخصيه @@ يعنى الى عندة اكتر من بدلة يدفع ضرايب واللى عندة اكتر من عيلين يدفع على التالت ضرايب هو دة اللى ناقص

اقتباس:

---

المشاركة الأصلية كتبت بواسطة amgad29

الوزير كان في برنامج وجهة نظر أول امس و قال ان كل الشقق الإيجار القديم معفاة و ان حساب الضريبة بيتحسب لكل وحدة على حدة و قال مثلا لو عندك اكتر من شقة تمن كل واحدة فيهم أقل من 250,000 يبقى مش هتدفع حاجة هتدفع فقط علي الشقق اللي تمنها أغلى من كده (ده كلامه والله أعلم) و قال ان حساب الضريبة بيبقى على سعر السوق للشقة مالوش دعوة باللي مكتوب في العقد من خلال تقسيم الجمهورية الى مناطق أ؛ب؛ج؛..... و لكل منطقة سعر في المتر وخلاص
وحسب كلامه (!!!!) ان الضريبة لمعظمنا (للشقق أقل من مليون)هتبقى في حدود 70 الى 80 قرش لكل 1000 جنيه من تمنها في السنة يعني لو شقتك اتسعرت بـ 500,000 ألف فانت مطلوب تدفع من 350 إلى 400 في السنة..
بالرغم ان المبلغ مايعتبرش كبير في وقتنا هذا الا ان الناس مش حاسة بأي تقدم في أي مستوي سواء طرق تعليم صحة اجور اسعار توظيف ..... و يمكن هو ده سبب رفض الناس لفكرة دفع أي ضرائب جديدة

---

لو كده يبقى فعلا كويس و مش غالي

اقتباس:

---

المشاركة الأصلية كتبت بواسطة tom

انا خايف الحكومة تعمل ضرايب على الهدوم والمتعلقات الشخصيه @@ يعنى الى عندة اكتر من بدلة يدفع ضرايب واللى عندة اكتر من عيلين يدفع على التالت ضرايب هو دة اللى ناقص

---

بس يا عم اسكت ماتدهمش افكار هههه احسن يجوا بعد كده يفتشوا في الهدوم و يعملولك جرد لدولابك ههه

انا فعلا سمعت حوار لوزير المالية عن الموضوع ده من يومين وقال ان الحكومة هي اللي راح تقدر ثمن العقار حسب الموقع اللي موجود فيه (يعني مش راح يبصوا على اي سعر مكتوب في اوراق البيع والشراء) ...النقطة الاهم ان الحكومة مش راح تدور على صاحب الشقة علشان يدفع ... لا دي راح تحسب الضرائب وسنه ورا سنه مش هيظهر صاحب الشقة علشان يدفع تقوم الحكومة تحجز على الشقة باللي فيها ... صباح الفل

يا خبر .. ده الحكومه هاتاخد 3/4 البلد كده هههه

على فكرة الضرايب دي هتكون على الشقق الجديدة بعد 97 قبل كده مش هتدفع ولا مليم

وتقدير الوحدة هيكون باقل تمن لمنطقى يعني لو جنبك عمارة جديدة بتبيع المتر ب 4 الالف

في حين واحد في الشارع اللي وراك بيبع ب 3 الالف هيتم تحديد متر شقتك ب 3 الاف

وقانون لسه تحت الدراسة ولم يتم تحديد اجزاءه لغاية الان ..... والله واعلم هيغيره الكلام ده ولا هيسبوا

حسبى الله و نعم الوكيل
طب أنا كنت شارى شقتى من 6 سنوات بـ 160 الف و دلوقتى تقريبا تخش فى 450 الف يعنى حيظبطونى فى الضريبة
هى الحكومة شايفة إن إللى عايش فى شقة تمليك دا شخص مرفه و مدلع و لازم يساعد الحكومة الغلبانة و ياريتوا بيروح لمنافع الشعب بعد كده
مرة أخرى حسبى الله و نعم الوكيل

لا يا احمد اللي عنده شقه ملك مرفه لأنه المفروض يعيش في خيمة وبرضه هيدفعوك تمن الأرضيه واضرار بالطريق العام
يعني من الأخر تسيبلهم البلد وهيدوروا عليك برضه بالأنتربول علشان الكام جنيه الضرائب اللي عليك
ما هو انت مقتلتش 1000 شخص دفعه واحده ولكن هربتو مدفعتش الضرائب اللي عليك

http://www.moq3.com/img/17012008/Fgj73291.jpg

ايه ده يا جماعه انتوا عاااااااوزين تسررقوا حق البلد

دى فلوس الدوله مش عاوزين تدفعوا اللى عليكم ليه ؟
هى الضرائب دى مش مقابل خدمات الدوله قدمتها للمواطن
هى مش الحكومه وفرت لك شقه تمليك وطرق مرصوفه مفيهاش حفر ولا مطبات للوصول لبيتك وكمان وفرت لك خدمات ومرافق فى منطقتك ولا كل يوم يكسروا قدام بيتك وفحت وردم يبقى بلاش نطمع وندفع اللى علينا .......!!! وعجبى

تقدير الضرائب العقاريه بيتم على اساس السعر السوقى للوحده مش المكتوب فى العقد ..

لانك لما بتروح تسال عن الضرائب المستحقه على شقتك وبتقدم لهم عقود الملكيه لازم ينزل لسعادتك واحد يعاين الشقه على الطبيعه ويعمل تقيم لسعرها الحالى وطبعا كل موظفين الدوله وخصوصا موظفين الضرايب حبايبنا

طول ما ايدك بتدخل جيبك وتطلع بسهوله متخافش انت فى اماان وفى بلد امااان

ايواااا
كده بقه كملت
بس يا ترى الشقق حتتسعر ازاى ؟؟؟
حيلفوا على مكاتب السماسرة ؟؟؟ و لا حيعدوا يسألوا البوابين ؟؟؟

حسبي الله لا إله إلا هو عليه توكلت و هو رب العرش العظيم

أدي دقني لو المصريين دفعوا ضرائب عقارية
و الوزير نفسه عارف بس بيحاول

يعنى مش كفاية الاسعار اللى عمالة تزيد كل ليلة وكل يوم على رأى أم كلثوم ، والحكومة سايبة التجار يمرمطوا فى الشعب المصرى .

أنا عارف الحكومة عايزة ايه بالضبط !!!

عارفين ايه !

الحكومة عايزة الشعب المصرى ينتحر بأى من الطرق الآتية :

الانتحار غرقا فى مياه نهر النيل ،

أو نضرب بعضنا بالرصاص .

وطبعا بعد الشعب المصرى ماينتحر ، البلد ح تبقى فاضية على الحكومة ، واتخيلوا بقى بعد ماكان عايش فى البلد 75 مليون ، يبقى عايش فيها حوالى 200 أو 300 عضو من أعضاء الحكومة ، ياسلام .................عليه النعمة عملية نضيفة مية المية .

ساعتها بقى الحكومة ح تلغى كل انواع الضرائب اللى خلقها ربنا ، ويبقى اسم مصر بدلا من جمهورية مصر العربية يبقى اسمها جمهورية الحكومة المصرية العظمى.

ولما تزور حكومات الدول العربية أو الاجنبية مصر وتلاقى الحكومة المصرية مبرطعة فى البلد لوحدها ، ح ينبهروا بالتجربة المصرية وأكيد ح ينقلوها لكل دول العالم ، وساعتها الناطق باسم الحكومة ح يقول هى دى ال New Look بتاعة الدول المتحضرة " دول بلا شعوب " .


وكل عام وانتم بخير .