الموضوع: القول الفصل فى الصنى الاوتو ماتيك

ياجماعه ان كل ما اقرا هنا موضوع عن النيسان صنى الصراحه بيجيلى تشاؤم من اللى بيتكتب وبجد بحس ان اى حد لو نفسو يشترى العربيه ده مش هيشتريها لان بجد فى كميه مبالغه اوى فى الموضوع وفى حاجات كتير

يعنى انا عمى معاه العربيه دة موديل 2006 اول دفعه فى التقفيل المصرى وصاحبى الانتيم اللى معايا تقريبا كل يوم واللى ساعات بيسافر بسبب ظروف شغلو الى شرم الشيخ بيسيبلى عربيتو اللى لسه جايبها صنى 2009 الشكل المعدل ..........واختو كمان بعد ما ما هوة جابها والله ب 6 شهور جابت واحده كمان هيه وجوزها

الخلاصه من غير اطاله .......اه ممكن تكون العربيه فيها عيوب بس مش للدرجه ومميزاتها اكتر بكتير

تعالو اكلمكم وارجع بالزمن ورا ايام عربيه عمى موديل 2006 كانت سوبر صالون وابانوس وحركات وكانت الدنيا كلها بتشترى ساعتها لانسر المهم كل الناس فضلت تقول بلاش التقفيل المصرى اصل واصل وكلام كتير

العربيه دلوقتى عامله 118 الف كيلو بالتمام والكمال كل اللى حصل فيها كاوتشة الباب اللى ورا اتفكت من مكانها واتعملت عادى فى التوكيل الكاسيت السى دى الشانجر بتاعها باظ فى السنه الاولى وهمة غيروة تبع الضمان ..
الكرسى اليمين كان بيزيق شويه حاجه بسيطه غيرو حاجه فى قاعده الكرسى اتظبط خالص

لكن تعالو بقى اقولكم مميزاتها :
1:عفشة ناعمة جدا جدا جدا بقعد ورا كأنى راكب وساده مش زى الاكسنت بتاعتى اللى بيقعد ورا بيفضل يطنطط
2:ركوبه كلاسيكيه وشياكه اوى بتحس انك ابن ناس وانت راكبها
3:ثبات رائع على السرعات العاليه هيه كانت فى الاول زمان مش بتجرى اول 5000 الف بعد كدة دلوقتى حدث ولا حرج
4:مفيش ولا تابلوة فك ولا زرار لخلخ ولا بلاستكه فكت ولا اى حاجه العربيه بتعمل صياتنها والزيت والتيل والكلام ده والطنابير ...وحتى اغلب الحاجات ده كنا بنجبها من برة التوكيل بالذات التيل وعادى جدا

5:مره عربيه ربع نقل دخلت فى الباب اللى ورا الباب اطبق روحنا لسمكرى برة ردو على الساخن واترش ورجع زى الاول .....للعلم باب عربيتى حصل فيه كده اتركمش وعمل زى كان البيبسى المعضض وشكله مرجعش زى الاول
.................................................. .................................................. ......................
اكلمكم بقى على العربيتين الجداد بتاعت صاحبى واختو وخاصتا انهم الشكل المعدل ودول سقتهم اكتر وبالمقارنه بالاكسنت وعربيه واحد صاحبى كمان النترا
1
:بردك مازلت بقول ان العربيه افضل منهم ثباتا واتزانا بالذات على السرعات العاليه والجديده مش فارقه كتير عن اللى من اربع سنين بس طبعا الجديد ما كملش 10000 كيلو ولسه التسارع ما اتحسنش زى اللى من 4 سنين
2
:طبعا مفيش تغير غير الكاسيت الكين وود اللى اريه اى نعم بس تحسو مش لايق اوى بس لذيذ ومريح
3
:التعديل الخارجى حلو بردك وكويس
4
:مفيش ولا مشاكل فى التكيف ولاتزيق ولا لخلخه ولا اى حاجه
5
:فرامل بالرغم انها مش اللى اى بى اس بس بتكلبش العربيه ومتجربه اكتر من مره
6
:الصاج الخارجى وده مهم اوى اوى اوى .....لان العربيات اللى صاجها طرى اوى ومش ناشف بعد 3 ولا اربع سنين هتبقى متبهدله ومعضضه ...لكن الصنى ولا الناشف اللى جامد اوى ولا اللى طرى زى الانترا والاكسنت والسيراتو
7
:سواقتها سهله اوى ودة بتفرق مع ناس كتير يعنى الايروديانميكس بتاعها حلو جدا
8
:سعر عربيه اوتو ماتيك بايرباج واى بى اس ب 90 الف يعنى ارخص من اللى زيها فى الانترا ببتاع 15 الف والسيراتو ببتاع 20 واللى زيها فى الانسر ب 120 الف يعنى الفرق 30 الف طبعا من 15 ال 30 الف ده ارقام كبيره
9
:الموتور اللى صوته عالى ده علشان سير الكاتينه الجنزير واللى بيبان فى حاله الكيك داون لكن السواقه العاديه والكبس التدريجى الصوت ناعم جداومعلش يعنى اركب عربيه صوتها كده من اول يوم لحد 10 سنين قدام احسن من كورى ناعمة فى السنه الاولى وكل سنه الموتور بياكل بنزين وصوته يعلى سنه ورا سنه والموضوه والله مش اوى كده يعنى
10:
استهلاك البنزين بقى واللى مضايق الناس
بصو هقولكم على حاجه
1:عربيه عمى من ساعها ما جبها ماعدا اول 5000 كيلو لحد دلوقتى بتعمل فى التانك كله التفويله يعنى 500 كيلو تقريبا (مشاوير مختلطه جوة اكتوبر ....مشاوير شغلو من اكتوبر لمجلس الدوله ....ساعات تكيف وساعات لااا...ساعات على الهادى وساعات بيبقى زهقان يقوم كابس على المحور علشان يوصل بدرى واهو مستشار بقى ومحدش ادو ولا بيهمو رادار ولا غيرو)

2:عربيه صاحبى من اول يوم اشترانها وهيه بنفس الظروف اللى فاتت بتعمل 480 الى 520 الف فى التانك
حسابناها 3 مرات مره 485 ومره 503 ومره 520

3:اختو كان معاها فيرنا قبلها بتقول استهلاكها بالظبط زى الفيرنا بالتمام لانها بتمون بنفس المواعيد ومشاويرها هيه هيه

طب الخلاصه فى الموضوع
1:(العربيه كده تقريبا بتعمل 10 كيلو لكل لتر زى اى عربيه 1600 )
2:السيراتو والانترا بعد التجربه بياكلو بنزين ومش بيوفرو
3:الانسر ال 1600 الخليجى بتاكل بنزين والتوكيل يمكن بتوفر شويه
4:الاوبترا نفس الاستهلاك
5:الكورولا يمكن بتوفر شويه بس بتبدأ من 145
6:التيدا بردك نفس فكره الكورولا وبردك بنتكلم فى فرق 15 ل 25 الف تقريبا
7:اليارس هيه الوحيده اللى كانت بتوفر عنها وكان سعرها اوتو زمان 104 الف يعنى فرق 14 الف جنيه
ودلوقتى بقت ب 120 الف و 1500
طب عاوز اوصل لاه يعنى
انها مش فارقه كتير .............................طب هيطلع واحد يقولى لاااا دة بتعمل معايا 450 كيلو فى التانك يعنى اقل من اخواتها ب 50 كيلو فى التانك

طب تعالو نحسب حسبه صغيره
التانك فى العربيات التانيه بيعمل 500 كيلو وسعر ملأ التانك 100 جنيه لو فرضنا زياده الاسعار شويه
ولو قولنا انت هتعمل بالعربيه 100 الف كيلو وتاخد خيرها وتبيعها يعنى هتملا التانك 200 مرة بكام
( مره200 *100 جنيه يساوى 20 الف جنيه )

مع الصنى فى 50 كيلو بيقعو كل تانك
لو ضربنا ال 50 كيلو دول بردك فى نفس ال 200 مره هيطلعو 10 الف كيلو فرق
تانك الصنى بيعمل 450 كيلو والتانك تمنو 100 جنيه
يعنى اقسم 10000/450 يساوى 22 مره نضربهم فى سعر التانك يطلع الفرق 2200 جنيه بس


(هل بقى فرق 2200 جنيه دول يخلوك تجيب عربيه كورى ارخص زى الاكسنت وتضيع الثبات والامان والبرستيج والتوكيل الكويس .........او يخلوك تجيب عربيه سيراتو مع احترامى ليها ازيد ب 20 الف او كورولا او ..او...او)

لازم بجد نقدر الامور بحجمها ونشوف نصف الكوبايه المليان مش الفاضى علشان بجد ما نضللش حد وربنا يوفق الجميع .........واعذرونى للاطاله ...............انا عارف انى رغاى ............اخوكم فى الله احمد عزت