سؤال الي وحوش وخيراء نايل موتورز

**esam_comm** · 02-07-2010 10:45 AM

الموضوع باختصار اني معايا عربيه عايز اعرف ليها قطع غيار في مصر وكنت عاوز انزل بيها وظبطها في مصر
رينو كليو سبورت 2000 سي سي 182 حصان موديل2005 وعايز اعرف ايه من موديلات رينو التانيه ممكن يركب عليها بصراحه انا نفسي انزل بيها تحدي لنفسي مغريه عايز اجربها في السفر

اخيرا ارجو الاهتمام واللي يعرف يساعدني لان قربت انزل وبناءا علي ردودكم هاقرر وعلي فكره اللي يعوز ياخد لفه لما انزل يقولي ومايتكسفش دي 182 حصان وبالحجم ده متخيلين احترس من كل من اقترب من الارض

**omar-saad** · 02-07-2010 04:21 PM

ماشاء الله لا قوة الا بالله
العربية تحفة بصراحة بس حضرتك
لازم علشان تنزلها تكون المالك الاول ليها
وهيتم محاسبتك على 135% من قيمتها جمارك
وهيتخصملك حوالى 5% عن كل سنة استعمال
فاحسب حسبتك وشوف
والعربية دى لو نزلت بيها هاتعور الاسفلت بصراحة خصوصا ان كمان الصحراوى اتصلح منه اجزاء كتير
بالنسبة لقطع الغيار بقى انتا هاتتعب فيها شوية لان العربية اللى معاك مختلفة شوية
وخصوصا ان الرينو فى مصر برضة مش اد كدة
انما خارجيا هتلاقيلها قطع غيار كتير
انما الموتور ومشتملاتة صعب شوية الا لو فيها حاجات مشتركة مع الكليو العادية
وانا رايى انك لو هاتعرف تجيبها وتظبط قطع الغيار من على النت وانتا غاوى العربية نزلها
لو عايز توفر على نفسك التعب
بيعها وهات حاجة فى مصر احسن
لا فى جمارك زى ماقولتلك ونقل ملكية وحاجات كتير
فا شوف الافضلك
وربنا يوفقك للخير

**Ahmed Nouh** · 02-07-2010 06:27 PM

قطع غيارها هتكون متواجده لو نفس الموتور ده بينزل مصر هنا استيراد والناس بتسقط منه

وحسب ما اعرف نادرا لما حد بيسقط فى عربيات رينو فبالتالى يبقى حاجتها مش موجوده هنا والنزول بيها مخاطره

**magyver** · 02-07-2010 07:04 PM

بسم الله ماشاء الله
بس اظن هو يقصد ينزل بيها يقضي اجازة ويرجع تاني

**esam_comm** · 02-07-2010 07:39 PM

انا ياجماعه الخير قصدي انزل بيها اجازه وارجعها تاني وخصوصا اني مانزلتش بري قبل كده وعلي ما اظن تكلفه النزول بيها بري هاتكون اعلي من السفر طيران انا بس طالبه معايا انزل بيها واغير لونها في مصر من فيراني لاسود مطفي بدون لمعه علشان مافيش صنايعيه بره مصر

**Mzeid** · 03-07-2010 02:09 AM

المشاركة الأصلية كتبت بواسطة esam_comm

انا ياجماعه الخير قصدي انزل بيها اجازه وارجعها تاني وخصوصا اني مانزلتش بري قبل كده وعلي ما اظن تكلفه النزول بيها بري هاتكون اعلي من السفر طيران انا بس طالبه معايا انزل بيها واغير لونها في مصر من فيراني لاسود مطفي بدون لمعه علشان مافيش صنايعيه بره مصر

للأسف مش هينفع تنزل بها و تغير لونها لأن لو دخلت بعربية تريبتك يبقى لازم تخرج من البلد بنفس حالتها اللي دخلت بيها