الموضوع: حدث بعد منتصف الليل

المشاركة الأصلية كتبت بواسطة mody_elmoshax

هههههههههههههههه راجل عملى مابيحبش الحال المايل
سيبك يا دكتور من الناس الحقودة وللاسف حقد ممزوج بالغباء..
وبالنسبة لموضوع الشكك فده للاسف غلطة منك مش منها
انا لسة طالب بس هما كل مرة يأكدوا علينا اوعوا تبيعوا شكك لو حتى لابوكم لان ده المصدر الوحيد لاكل عيشكوا
اقول لحضرتك على فكرة دمار ...روح اتجوز الست دى وخد اللى انت عايزه منها(فلوسك يعنى) وبعد كدة اغدر بيها وطلقها واهو تبقى مصلحة ليك ومصلحة لجوزها الاولانى عشان يتجوزها تانى..ايه رأيك فى الفكرة الجاحدة دى ..خصوصا ان جوزها راجل عملى وهايتقبل الفكرة

ماهي وحشة
لو حلوة ..كنت فكرت في الموضوع
هههههههههههههههههههههههه

المشاركة الأصلية كتبت بواسطة pro_samir

يظهر النكتة بتاع الراجل اللي طلق مراتة علشان ميقومش يفتحلها الباب مكانتش نكتة هههههه

وربنا العظيم يابو سمير هوا ده إلي جه في بالي ساعتها
ومع إن الموقف مابيتاهلش الضحك..مع ذلك مامستكش نفسي من الضحك
علشان ساعة لما الراجل قال"طب إنتي طاااااااالق..إبقي خدي بقا فلوسك منها"..إفتكرت النكتة على طووول
وفطست على نفسي من الضحك

المشاركة الأصلية كتبت بواسطة ahmed-moga

معلش يادكتور أحمد وربنا يكون في عونك في اللي بتشوفه وبيحصلك

ونصيحه اخويه ابعد شغلك عن موضوع الشكك ده انت اللي هتكون خسران فيه في النهايه

اللي ممعهوش مايلزمهوش وخصوصا اذا كانت الحاجات دية غير ضروريه ذي الشامبوهات والكريمات والبرفانات

بس لو واحد محتاج دواء لازم وضروري ومن غيره ممكن يتعرض لأزمه صحيه تأثر علي حياته ومعهوش يكمل ممكن

تحتسب الفلوس دية عند الله بطيب خاطر وربنا يجعلها في ميزان حسناتك ان شاء الله

ومتزعلش واحنا كلنا هنا عارفينك وعارفين كرم اخلاقك وربنا يديك علي حسن نيتك

ماهو لو على الشامبوهات والكريمات ..ممكن
لكن تخيل يا إبن عمي
ناس بتاخد علاج..وبعدين تيجي تقولي ماخدناش
ده الواحد بياخد العلاج..ويقول يارب الشفا من عندك
تيجي الناس تاخد علاج..وتسرقني

المشاركة الأصلية كتبت بواسطة أبو إياد

ايه يا عم احمد اللى انت فيه ده
انا مش عارف اضحك ولا انبهكولا ادعيلك ولا اقولك ايه ولا ايه ولا ايه
بس المهم انك تخاطب الناس على عقولها
وربنا يهدى

واحشني والله ياأبو إياد
بس شوفت الراجل (إلي إتوقف ده)مخه عامل إزاي
يعني أنا لما أعلق لواحد محلول بالليل..أو أدي حقنة لواحد محتاج في وقت مش هيلاقي حد يديله الحقنة دي
أبقا كده بدعي الفضيلة...أنا مس متخيل طريقة تفكيره بيفكر إزاي؟؟؟؟
سبحان الله
ويخلق مالاتعلمون

وحدث أيضا

(مش فاكر إذا كنت حكيت القصة دي ولا لأ)

من حوالي سنة فاتت
سهران كالعادة في الصيدلية
طرقات غير منتظمة على الباب الزجاجي للصيدلية
رجل في أواخر العقد الثالث ..أو بداية العقد الرابع ..فاره الطول ..ممتلئ الجسد بشكل هائل ..ملحوظ القوة
دخل الصيدلية
"والنبي يادكتور عندي حرقان على صدري ..ومش عارف حاسس إني مش تمام"
جه في بالي-لقلة خبرتي الطبية وحسب تعبير الريفين عن الحموضة بكلمة حرقان في الصدر- إن دي حموضة
روحت على الرف وجبتله كيس فوار راني ..وكباية ميه وبفتح الكيس علشان أحطله الفوار و
فجأة
الرجل الضخم يترنح ويسقط أخذا في طريق سقوطه بترينة عرض البرفانات
بدون وعي مني
لقيتني ممتطي (كرشه الضخم) وبحاول أضغط على صدره بالتتابع مع أنفاس من فمي لفمـــه
مرات معدودة ..لم تأتي بنتيجة
طلعت أخبط على أصحاب البيت وأنده عليه"ياعم رضا ..ياعم رضا"
ولا مجيب

أقف وسط الطريق الخالي بعد منتصف الليل

ولا أحد يساعدني لنجدة الرجل
لا أحد

أسيب الصيدلية والراجل ممدد على الأرض..وأجري لحد الكمين إلي موجود فيه (الغفــر)
للأسف مالقتهمش موجودين
رجعت الصيدلية تاني ...وحاولت أنقل الراجل للعربية ...لكن كان مستحيل تماما مع حجمه الضخم
إتنين راجعين من شغلهم في العاشر من رمضان بالليل
ندهتلهم
حاولوا يساعدوني ننقله للعربية ...ماعرفناش إحنا التلاتة نشيله
سبتهم في الصيدلية هما الإتنين ..ومعاهم الرجل المدد على الأرض
وركبت العربية وجريت على بيت أقرب دكتور بشري على بعد دقيقة واحدة بالعربية على سرعة 120 وسط الأرياف
خلال دقايق
رجعت بالدكتور البشري للصيدلية
لقيت الناس إلي كنت سايبهم معاه..جابوا أهل الراجل
وبطريقة ما ..شالوه ودوه عندهم البيت
سبت الصيدلية مفتوحة على مصراعيها
وأخدت الدكتور البشري وروحنا بيت المريض ده ..الدكتور حاول بشتى الطرق
وبعد عدة محاولات للتنفس الصناعي

لم يجدي

وغطا وشه بالبطانية ..وخرج بدون كلمة إضافية
وخرجت وراه
على صوت نساء المنزل يشق سكون الليل ..معلنا وفاة الرجل
روحت الصيدلية
وقفلت على نفسي باب الصيدلية ..وإنتابتني موجة من البكاء الشديد ..مع قئ رهيب
..

االدكتور البشري(صديقي)..إتصل بيا بطمن عليا ..وقالي
""على فكرة ياأحمد ..دي كانت ذبحة صدرية ..والراجل ده مات فور سقوطه..يعني ماكنش بإيدك حاجة تعملها""
وقالي كمان
""مايبقاش قلبك ضعيف كده..إحنا ياما بنشوف"

..............................
أنا شوفت جثث كتير ..لما كنت في طب القاهرة (قبل ماأحول لصيدلة)
لكن دي كانت أول مرة ..أشوف واحد يموت قدامي
وأنا وهو بــــــــــس
ويموت بين إيديا

دي كانت تجربة ..من أقسى التجارب إلي عدت عليا في حياتي
....
اليوم التالي
أحاديث أهل القرية .. (أحمد)المتوفي إلي ربنا كرمه وكان على وش جواز على الرغم من سنه الكبير
أحاديث أهل القرية ..إن (أحمد)كان عايش لوحده ..ورنا رحمه إنه مات في الصيدلية..علشان لو كان مات في بيته..مكنش حد حس بيه
أحاديث أهل القرية.. عن الدكتور أحمد (أنا)المحترم إلي عمل كل إلي يقدر عليه
أحاديث أهل القرية..عن الدكتور أحمد (أنا)إلي مش فاهم حاجة- وإدى الراجل دوا غلط موته
أحاديث أهل القرية..عن الدكتور أحمد إلي سهران باللي في الصيدلية ..وربنا هيجازيه ثواب
أحاديث أهل القرية.. عن الدكتور أحمد(انا)الحمار إلي مش فاهم حاجة
أحاديث أهل القرية..عن الدكتور أحمد(أنا)إلي زق المرحوم ..وقعه..وقع على راسه ..مات
أحاديث أهل القرية..عن الدكتور أحمد(أنا)..ربنا يكرمه