السلام عليكم ,,,,,,,

انا اتفرجت على برنامج " خط احمر " الي بيذاع على قناة دريم مع وزير الماليه يوسف بطرس غالي
بس الحلقه كانت معاده ومش عارف هل حد تابعها غيري ولا لا ,, المهم وانا بسمعه بحس انه على الاقل نصف الكلام الي قاله منطقي جدا وكان الحوار بيدور حول :-

1- الضريبه التصاعديه وقال انها كانت نظام فاشل
2- الموازنه العامه والعجز بيحاول يقلله كل عام وانه مش عاوز بتشبه بدوله زي اليونان الي وصل مستوى العجز فيها الى 14 %
3- الزام المواطنين بدفع الضرائب على المرتبات والضرائب العقاريه والجمارك وانه حتى هيتخرب بيته لانهم عندهم املاك كتير جدا (قال يعني هيدفع بجد)

4- قانون المعاشات الجديد وان القانون ده ناتج عن عملية زيادة الارادات نتيجه دفع الضرائب والضريبة الجمركيه وان سن او عمر المعاشات هيزيد تدريجيا خلال العشرين سنه القادمه بسبب ان مستوى الصحه بيزيد يعني التناسب تناسب طردي وان السن الحالي هو 60 وهيزيد الى 65 ولان حتى متوسط الاعمار بيزيد وقد يصل الى 90 سنه

5- والاهم بقى ودي النقطه الي المذيع ما عرف يساله الاسئله المناسبه , وان كان بيتكلم عن الخدمات المقدمة للمواطنين من تعليم و صحه وصرف صحي وان الصرف الصحي بالرغم من انه بيغطي بنسبة
%11 فقط من جمهورية مصر العربيه اي بمقدار 11 قرية لكل 100 قريه وان النسبة كانت من خمس سنين فقط 5% ودلوقتي وصلت 11% طيب والعشرين ولا التلاتين سنه الي فاتوا كانوا بيعملوا ايه والفلوس كانت بتروح فين الله اعلم !!!! , اما بالنسبة للتعليم فاتكلم انه تقريبا زود ميزانيته حوالي 20 % وان كادر المعلم (الي نفسي افهم لازمته ايه وايه الفائده الي رجعت عليه على الناس وبالاخص المواطنين ) كلف حوالي 6 مليار ,, واتكلم بقى على النقطه الي اثيرت الجدل في المنتدى هذا الشهر وهي زيادة اسعار الطاقه باستثناء البوتجازات والغاز يعني حيث انها بتكلف دعم للدوله حوالي 70 مليار , وخدوا بالكوا بقى من النقطه الي جايه دي ,, كان واضح من كلامه والي انه فهمته ان في المستقبل الله اعلم المستقبل القريب ام البعيد لانه قال بعد كده لما اشيل الدعم خالص هحطه في حاجات تانيه زي مثلا التعليم والصحه , وقال ان الزياده دي ما ينفع اجي بكره الصبح ازودها ومش منطقي , وطبعا قالها صراحة اان الزياده انت الي هتدفعها وشاور كده على المذيع وطبعا الزياده دي هتبقى تدريجيه والي هتبدا تقريبا بعد الانتخابات او في اقرب فرصه حسب ما يقرر احمد عز بيه او يوسف بطرس نفسه ,, انا الحقيقه كان نفسي بقى اساله طيب ما الاسعار دي هتزيد وهتزود كل حاجة في الدنيا مقابل نفس المرتبات ونفس الخدمات ونفس البنيه التحتيه ,,,

وكان واضح من كلامه اوي ان اي تتطور او تحسن هيتم هيتم بناءا على يما دفعه الشعب والمواطنين يعني الدوله نفسها مواردها ضعيفه لدرجة انها مش بتعتمد على اي دخل ليها الا من جيوب الناس

انا عاوز اعرف رايكوا ايه في الكلام ده او بالنسبة للي اتفرج على الحلقه احب اعرف رايه ؟؟؟؟