الموضوع: التكييف

اولا احب اقول ان قسم الدايو انشط قسم فى المنتدى ، بصراحه مفيش مره سالت على حاجه و الرد اتاخر ، انا حاطط موضوع على قسم التكييف بقاله 10 ايام و محدش رد عليه ، و بالمناسبه ديه اخص بالتحيه أ / محمد ممدوح الى فعلا مبيتاخرش عن اى حد فينا .
المهم ،،
انا مسافر بكره و التكييف عاوز شحن ، بس المشكله ان كل ما بشحنه بيفضى بعد اسبوعين ، قبل كده غيرت اويلسيلات كتير و مفيش فايده ، و كل ما حد يكشف عليه يقولى مفيش تسريب و يشحنهولى و تتكرر نفش المشكله تانى ، انا شغلى فى المهندسين و ساكن فى النزهة الجديده ، يا ريت لو حد يعرف واحد كويس فى اى من المنطقتين اروحله بعد الشغل يدلنى عليه ، و يا سلام لو كان يعرفه و يوصيه عليا لو حته بالتليفون .
ملحوظة : يا ريت محدش يقولى المراكبى الى قدام فندق السلام بجسر السويس

المشاركة الأصلية كتبت بواسطة drmomoking

السلام عليكم ممكن تروح ورشة احمد تكييف اللى فى ارض اللواء واللى كان عامل عنها موضوع العضو zaza lanos وانا من شهر كدة روحت شحنت تكييف الاسبيرو عندى و التكييف الحمد لله زى الفل لحد الان وكان كفاءة فى ايام الحر الرهيبة اللى فاتت وانت قولو انا جايلك من طرف الموقع بتاع دايو عشان هوا عارف اننا بنعملة دعاية على كل شغل حلو بيعملة وبنقول برضة لو فى حاجة وحشة حصلت وقولو دكتور احمد اللى معاه الاسبيرو الفيرانى باعتلك السلام وتليفونو0125566606 والورشة فى عمارات الاوقاف اللى فى ارض اللواء امشى فى جامعة الدول كانك رايح ش السودان واطلع الكوبرى وانزل نزلة ارض اللواء واسال على عمارات الاوقاف وابقى طمنا

السلام عليكم يا رجالة احلى منتدى انا روحت يوم الجمعة اللى فاتت (16-7-2010) للراجل ده و صلحت عنده التكيف بتاع عربيتى لانه كان خربان عندى خالص ماكنش محصل حتى مروحة.
الراجل بص شوية عندى على تكييف العربية وابتدى يقولى على المشاكل اللى عندى وكانت كلها مشاكل تسريب فيريون من (a-->z) المهم مش هاطول اكتر من كده عليكم

انا اتبسط من شغلة وحسيت انه فاهم فى شغلة كويس ومش عايز يكلفك اوى فى المصاريف وكمان اللى شغالين عندوه

بس للامانة انا التكييف عندى بقى تمام الحمدلله ومستنى شويه كده عشان يطمئن قلبى من شغلة

للى عندوه مشكلة و حابب يروح ديه شوية معلومات عنه
اسم الورشة:الهندسية لتكييف السيارات
العنوان:2 عمارات الاوقاف-ارض اللواء-المهندسين-خلف كافيتريا مارينا
اسمه:احمد عبد المنعم (وتسألو عليه بالاسم ده لو تهوته) هو مافيش اساسا غيروه بتاع تكييفات
الموبايل:0125566609 اخروه رقم 9 مش 6

انا هاقلكو على الحاجات اللى غيرتها وتكلفتها عشان تعم الفائدة
العربية دايو لانوس 99
1-شحن فريون 150 ج R134 بيقول انه امريكى من مستورد اسمه MG
2-عدد 2 اويل سيل (كاوتش) 20ج اتركبو على ماسورتين داخلين على صدر العربية
2-عدد 2 اويل سيل (حديد على كاوتش) 40ج اتركبو فى وش الكباس
3-عدد 4 اويل سيل (كاوتش) 10ج 2 اتركبو على الفلتر ,2 فى ماسورة التكييف اللى جنب الرفرف الشمال من ناحية صدر العربية
4-غيرت البلف اللى بيتملى منه الفريون 60 ج بس بلف ابره زى بتاع الكاوتش كدة وهو احسن من اللى فى العربيه اللى هو بلية
انا كده خلص معانتى مع ام التكييف

اختبر درجة التسقيع و الحمدلله وصلت درجة الحرارة لــ 0 ما شاء الله ان واالهى ما بهزر وكنت بردان لما دخلت العربيه

يارب اكون افدت والفايده تعم

الف شكر يا باشا

ممكن نعرف ايه اللى حصل من المراكبى معاك ؟

قال لى جمله بعد ما شحنت عنده كذا مره و الشحن بيفضى عرفت منها انه بتاع اشتغالات ، قال لى طبيعى جدا انك كل فتره لازم تزود فريون ، طبعا الكلام ده وارد لو الفتره ديه سنتين او ثلاثة ، لكن مش ممكن ابدا تكون الفترة شهر او شهرين ، و الموقف الى عرفت منه انه غير امين انى كنت رايحله بعربيه كورسا و عاوزه شحن و كنت قاعد على القهوه الى جنبه و هوه شغال و بعد ما خلص لاحظت ان الانبوبه الى بيشحن منها كانت r12 و طبعا عملت خناقه معاه لان ده علاوه على انه مش هيبرد بكفائة عاليه ده كمان ممكن يخرب اجزاء التكييف ،و كان رده عليه ان مفسش فرق بين الفريون الـ r12 و الـ r134 و بعد خناقه كبيره صممت على تغيير الفريون ، فراح فاتح البلف و خرج الفريون الى شحنه من غير ما يفضيه فى التنك و غرق الكبوت زيت ، بمعنى اصح نوع من العقاب ليه ، و اخيرا اتعطف عليه و شحنلى فريون r134 ، من الاخر معامله وحشه و شغل اى كلام ، و طبعا ده راجع لان موقعه مميز و زباينه كتير و مش هيفرق معاه زبون ولا اثنين .

يا جماعه انا لسه جاى من عنده و اليكم الاخبار :
اولا : الراجل ده محترم جدا و مش بتاع اشتغالات
ثانيا : صبور و مبيزهقش من كتر الاسئلة
ثالثا : انا غيرت خرطوم حسبهولى 120 جنيه و 2 اويلسيل 30 جنيه و فريون 140 جنيه و مصنعيه 30 جنيه ، انا مش هقدر احكم على الاسعار ديه بتاعتكم يا اهل الخبرة .
رابعا : التكييف بقه زى الفل بس يا رب يكمل على كده
خامسا : انصح كل الناس بالتعامل معاه فى حاله كون الاسعار الى انا قلتها معقوله ، الورشه بتاعته صغيره بس هوه فاهم جدا ، و خدنا ايه من الورش الكبيره غير فلوس فى الارض .
عموما انا حكمى النهائى عليه هيكون بعد ما اجرب التكييف كام يوم .
ملحوظة : انا شفت عنده حاجه مشفتهاش عن اى حد تانى ، عداد حراره دجيتال بيحط الحساس بتاعه فى الهوايه و هوه بيشحن بدل النظام القديم الى بيعتمد على حساسيك ايدك ، عموما انا الحراره وصلت عندى 4.2 درجة مئويه علما بان العربية كانت راكنه فى الشمس .
و شكرا لكل الى اشتركوا معايه برايهم
و السلام عليكم

المشاركة الأصلية كتبت بواسطة drmomoking

الف مبروك يا باشا و ان شاء الله هيفضل كويس وهو فعلا موضوع العداد بتاع الحرارة دة جامد انا بفكر اجيبة اراقب بية التكييف ويتهيالى الاسعار كدة مش غالية او حتى لو غالية مش مهم المهم يبقى بفايدة و ابقى قولنا لو فى جديد عشان نقيم شغلة برضة و ان كنت انا مجربة عندى زى الفل لحد الان وربنا يديم التكييف علينا كلنا فى الحر دة والف مبروك تانى

الله يبارك فيك يا باشا و متشكر على التواصل معايه ، عموما لنا هجرب و لو فيه اى جديد هقولكوا فورا ، و مره ثانيه الف شكر .