التكييف ونصب بتوع التكييف ... عاوز حل من الاخر

**Michael_Lanos** · 05-07-2010 09:56 AM

هاي يا شباب

طبعا الواحد مش بيلاقى مكان احسن من المنتدى هنا يفضفض فيه وياخد حلول من الاخر محترمه من ناس فاهمه ومجربه

مشكلتى بقه ان التكيف عندي ضعف من سنتين كده وعملت وقتها الموضوع http://www.nilemotors.net/Nile/72164-a.html
وما اخدتش اى قرار من وقتها غير من شهر فات، علشان انا ما اعرفش حد فى اسكندريه مضمون للتكييف، ولما نزلت القاهره قريبي قالى على واحد المفوض انه امين ومحترم اسمه الابيض على جسر السويس

المهم رحتله ووصفتله ايه اللى انا حاسس بيه: ان التكيف بقه 0% + انى بسمع صوت تنفيث هوا من الهوايه اللى على اليمين خالص، المهم من غير ما يدي اهميه لكلامى كشف على الدايره ونزل تحت العربيه وطلع يقول ان الكومبريسور بينفث تنفيث خفيف ولازمله طقم اصلاح يكلف 400 جنيه + 160 جنيه تغير فلتر اللى موجود قدام فى الكبوت جنب الكلاكس ... وتم الاتفاق على مبلغ 500 جنيه لكل الليله على بعضها (مع انى كنت شاكك فيه) بس لقيته اشتغل حوالى ساعتين او ثلاثه وبعدها الكتيف رجع شغال حلو بنسبه 80% من الاول.

وبعد مرور اسبوع وفى ايام الحر الشيدي لاحظت انه ضعيف جدا، قولت علشان الدنيا حر، بس للاسف طلع ضعيف على طول، المهم رحتله من اسبوعين اشتغلنى وقالى تلاقيه عاوز يتظبت، ووصل موتور شبه بتاع الثلاجه والمؤشرات بتاعت القياس وقالى كده تمام، وبالفعل لقيته اتحسن شويه، ولكن بعد يوم ضعبف تانى

اخيرا رحتله الخميس بالليل وانا جاي من الاسكندريه وانا متضايق وقولتله لازم تجيبلى حل قالى تعالى بكره الجمعه بدرى وانا هاكشف

رحتله لقيت الصنايعيه واول ما قولت للصنايعي على موضوع التنفيث اللى سامعه من الاول لقيته فك تحت الطابلوه اليمين وقالى انت عندك الكويل مخروم (حاجه شبه السربنتينه كده) ووصل صاحب المحل وقالى ده تكلفته 600 جنيه استعمال الخارج ومافيش منه اصلى فى السوق

قولتله ان انا قولتله على موضوع التنفيث ده من الاول قالى لاء دى حاجه تانيه ولسه بايظ، وانا متاكد انه اهمال منه فى عدم الكشف بضمير (ربنا يسامحه) قالى هاغيرهولك بواحد استعمال ومش هاخد مصاريف فك وتركيب ولا فريون ، والتكلفه هاتقل عن 600 جنيه الكلام ده المفروض الاسبوع الجاى

عاوز الحل منكم من الاخر علشان انا دفعت 500 جنيه على الارض ومش عارف هادفع تانى كام واصلحه عنده برده علشان دي غلطه تبعه ولا اصلح بره، واجيب منين الكويل ده وفيه منه جديد اصلى ولا لاء والاسعار ايه ؟

انا طولت عليكم جدا بس علشان ماليش غيركم يا اساتذه المنتدى

**احمد المصرى** · 05-07-2010 10:30 AM

مش عارف اقولك ايه بس ناس نصابه بجد بس الحمد لله انك كتبت اسمه علشان كل الناس تعرفه علشان تعرف شغله عامل اذاى

انتظر راى الناس ممكن حد يقولك على صنيعى خبره ابن حلال وتحت ابن حلال مليون خط

**sala7** · 05-07-2010 12:12 PM

على فكرة يا باشا التنفيس ده طبيعي .. انا عندي نفسه بالظبط و التكييف شغال تمام التمام
بص يا باشا انا هقولك على حاجة
لازم تغير فلتر الغاز زي ما أنت قولت اللي جمب الكلاكس اللي شبه الكوباية الومنيوم علشان ده بيكون مسدود نتيجة الرايش اللي خارج من الكمبريسور مع غاز الفريون
الحاجة التانية لازم مواسير المكيف تتنضف بالضغط العالي
هتلاقي وانت بتغير الكوباية الالومنيوم او فلتر الغاز فيه اويسيلات لازم تتغير بردوا
و فيه بردوا بين الكمبريسور و القاعدة الانابيب اللي راكبه عليه فيه زي جوانات كدا عريضة لازم يتغيرو بالمرة
بس مهم جدا تنضيف الانابيب (تنظيف دورة المكيف بالضغط العالي)
موضوع الفسفسه اللي بتسمعها دي من الناحية اليمين انا مش هفتيك فيه بس انا بقول انه ده صوت الغاز و هو داخل على الصمام الداخلي اللي جوة التابلوه فا بيديلك احساس انه تنفيس - لانه بردوا شغال عندي و مافيش اي مشكلة معايا خالص الحمد لله (و الله اعلم)
نضف المروحة بردوا الداخلية اللي بتبعتلك الهوا الساقع

و شوف كدا و ربنا يسهل و المشكله تتحل معاك - بس ان شاء الله لما الكوباية الالومنيوم دي لما تتغير ان شاء الله الموضوع هيتغير معاك لان المشكلة دي بردو حصلت معايا

**Michael_Lanos** · 05-07-2010 12:27 PM

المشاركة الأصلية كتبت بواسطة sala7

على فكرة يا باشا التنفيس ده طبيعي .. انا عندي نفسه بالظبط و التكييف شغال تمام التمام
بص يا باشا انا هقولك على حاجة
لازم تغير فلتر الغاز زي ما أنت قولت اللي جمب الكلاكس اللي شبه الكوباية الومنيوم علشان ده بيكون مسدود نتيجة الرايش اللي خارج من الكمبريسور مع غاز الفريون
الحاجة التانية لازم مواسير المكيف تتنضف بالضغط العالي
هتلاقي وانت بتغير الكوباية الالومنيوم او فلتر الغاز فيه اويسيلات لازم تتغير بردوا
و فيه بردوا بين الكمبريسور و القاعدة الانابيب اللي راكبه عليه فيه زي جوانات كدا عريضة لازم يتغيرو بالمرة
بس مهم جدا تنضيف الانابيب (تنظيف دورة المكيف بالضغط العالي)
موضوع الفسفسه اللي بتسمعها دي من الناحية اليمين انا مش هفتيك فيه بس انا بقول انه ده صوت الغاز و هو داخل على الصمام الداخلي اللي جوة التابلوه فا بيديلك احساس انه تنفيس - لانه بردوا شغال عندي و مافيش اي مشكلة معايا خالص الحمد لله (و الله اعلم)
نضف المروحة بردوا الداخلية اللي بتبعتلك الهوا الساقع

و شوف كدا و ربنا يسهل و المشكله تتحل معاك - بس ان شاء الله لما الكوباية الالومنيوم دي لما تتغير ان شاء الله الموضوع هيتغير معاك لان المشكلة دي بردو حصلت معايا

الفكره ان الراجل لما فك ناحيه الكويل ده لقى زيت متسرب عليه دليل انه فى تسريب
ان شاء الله هاروح اكشف عن حد تانى محترم وربنا يسهل بحل كويس، وانا لو اعرف انه هايكلف كده ما كنت عملته اصلا، انا بحب اسوق من غير تكييف، لكن المشكله ان اهلى بيكونوا معايا ومالهومش ذنب

**ramy_gamal** · 05-07-2010 11:15 PM

حضرتك جربت وايت اندسترى فى الاسكندريه فى الابراهيميه

**Michael_Lanos** · 06-07-2010 10:48 AM

المشاركة الأصلية كتبت بواسطة r_gamal1

حضرتك جربت وايت اندسترى فى الاسكندريه فى الابراهيميه

لا صدقني معرفهوش

انا رحت امبارح لواحد فى الازاريطه عند ارض كوته اسمه الحاج جابر العريبي، حسيت ان الراجل فاهم قوى وخبره كبيره، وكشف بذمه وطلعلى 3 عيوب:-
1- جوان الضغط العالى
2- الثلاجه الداخليه (الكويل)
3- السربنتينه الخارجيه

بس الاسعار اللى قالهالى حاسس انها مغالى فيها
70 جنيه للجوان
1000 للثلاجه الداخليه مع انى سائل عليها قالولى ب 525
400 للسربنتينه
و أخد 20 جنيه ثمن الكشف

بجد انا محتار ومش عارف اخد قرار، لكن هاسال عند واحد تانى،

ياريت اللى يعرف اى معلومات فى الموضوع ده يدلنى على الصح والاسعار المظبوته

**ramy_gamal** · 06-07-2010 03:05 PM

طيب ممكن حضرتك تروح ل وايت اندسترى دة كويس جدا عن تجربه
حضرتك تدخل من شارع البطاريات وبعدين اول شارع شمال تلاقيه على الشمال ... اسمه المهندس احمد وابقى طمنى

**Michael_Lanos** · 06-07-2010 04:44 PM

المشاركة الأصلية كتبت بواسطة r_gamal1

طيب ممكن حضرتك تروح ل وايت اندسترى دة كويس جدا عن تجربه
حضرتك تدخل من شارع البطاريات وبعدين اول شارع شمال تلاقيه على الشمال ... اسمه المهندس احمد وابقى طمنى

انا رايحله بأذن الله الناهرده او بكره

**ramy_gamal** · 06-07-2010 11:13 PM

مستنى ردك عشان نطمن هو على فكرة اسمه محمد مش احمد انا كتبتها غلط

-

الموضوع: التكييف ونصب بتوع التكييف ... عاوز حل من الاخر

LinkBack

أدوات الموضوع

عرض

التكييف ونصب بتوع التكييف ... عاوز حل من الاخر - انشر الموضوع فى :

-

-

-

-

-

-

-

المواضيع المتشابهه

فك وتنظيف فلتر التكييف + هوايات التكييف اليمين والمنتصف والشمال (الطريقة الصحيحة )

سؤال بخصوص مروحة التكييف و التكييف عامة

غيرت فلتر التكييف ولاحظت صوت مع تشغيل التكييف

لمالكى النترا 2012 اخبار التكييف معاكو ايه وخصوصا التكييف الاوتو فى حر السنه دى ؟؟؟

صديقى ونصب بتوع الكاوتش

الكلمات الدلالية لهذا الموضوع

المفضلات

المفضلات

ضوابط المشاركة