يا سلام على كلامك انت فعلا استاذ في مجالك
شكرا على التوضيح
للعلم ان ال1500 كانت اختياري في الاول وبدات في اجراءات تملكها بس لما ظهرت مشكلة السحب مع الاخوة الاعضاء غيرت رايي وعلى طول بدلتها ب 1600 وقلت انا مش حمل تجريب خصوصا ان ديه اول عربية اشتريها جديدة
بخصوص الجين2 انا عارف انها مشكله واتحلت فى المواتير ال كامبرو الجديدة iafm لأنى كنت متابعها كويس لحد مقررت على 1600 fsv
انا كنت بس بضرب مثل عشان لو فية نفس السقطة فى الرسم كان يبقى دة سبب ضعف السحب فى ال ار بى ام القليل
بس الجراف اللى حضرتك حاطة بيقول انها زى الفل والمفروض العزم بيزيد بدون اى مشاكل يبقى مش عيب تصميم ولا حاجة (ممكن يكون فية مشكله وهم مش عارفين يظبطوها فى التوكيل)
ارجو ان كل ملاكها يتحدو ويجربو كويس ويعملو مقابلة فى التوكيل - ويا ريت يقارنو بعربيات من دفعات مختلفة يمكن المشكلة فى دفعة معينة
و ان شاء الله محلولة
كلام تمام يا بشمهندس روميو وانا كنت اتكلمت عن مشكلة العزم دى قبل كده
وكويس ان حضرتك جبيها بشكل علمى وفعلا بردك موضوع الصيانات على فترات متقاربة حقيقى لنى فعلا بغير
بوجيهات كل 20000 كم .
وطبعا اصحاب السيارة كده لهم القرار لأن من الواضح ان السيارة مصممة لتوفير البنزين
وبالتوفيق
كلام جميل بس يا أ / مصطغى انا فى تجربتى لأستهلاك البنزين فى السيارة دى داخل البلد بس فى مشاوير طوالى و مافيهاش اشارات يعنى المقطم الى الهضبة الوسطى الى الطريق المؤدى الى اوتوستراد مدينة نصر ثم الى شارع الطيران حتى خلف رابعة العدوية - و العودة من نفس الطريق كان استهلاك السيارة و انا راكب لوحدى و من غير تكييف و قيادة هادئة 225 كم / الصفيحة و انا بيتهيألى ان سيارتك ال 1600 ما بتستهلكش اكتر من كده يعنى 8.9 لتر / 100 كم فى حين ان فى الكتالوج الأستهلاك 4.9 لتر / 100 كم عند سرعة متوسطة 90 كم - طبعا لازم يكون فيه فرق بس انا شايف ان الفرق كبير و مش موفرة قوى ولا حاجة مع خسارة كبيرة فى عزم السيارة - انا اشتكيت فى صيانة ال 2000 فى التوكيل من استهلاك البنزين و وجدت ثلاثة اشخاص آخرين عندهم نفس الموديل بيعملوا صيانة 2000 و 10000 و بيشتكوا من نفس المشكلة بس انا لقيت مشكلتى اقل منهم بكتير ده في منهم ناس استهلاكها ما بيكملش 180 كم / صفيحة يعني 11.1 لتر / 100 كم - و المهندس هناك وعدنى بتضبيط الموتور لكى يوفر فى الأستهلاك و فولت التنك و ادينى مستنى لما اشوف الأستهلاك هيبقى كام - ده إذا كانوا عملوا فيه حاجة فعلاً فى التوكيل .
و بعدين احنا ما أصبحش فى ايدنا قرار غير اننا نرضى بالأمر الواقع و نقول عوضتا على الله و حسبنا الله و نعم الوكيل مش كفاية انى بعد ما اشتريتها ب 4 ايام سعرها نزل 5000 ج و سعر السيدان نزل 12000 جنية و انا كان نفسى اجيب ال 1600 بس كان سعرها كتير عليه
نظرا لما أصابنى من أحباط و خيبة أمل :I_angr1[1]:فى سيارتى ال FRV 1500 موديل 2010 فقد قررت تغيير توقيعى ليكون بالشكل الموجود حاليا أرجو أن تقرأوه
شوف يا استاذ سونسون العربية ما زالت كويسه والمسألة صدقنى ومش كلام حتتغير مع الوقت للأفضل
انا عربيتى فى المشاوير جوه البلد والأماكن الزحمة بتعمل 230 كم فى الصفيحة والمشاوير الطوالى بتعمل 275 كم فى الصفيحة
والحمد لله ده معدل كويس على 1600 بس المعدل ده موصلش كده مرة واحده المسألة خدت وقت واعتقد انى بردك فى صيانة
2000 كم اشتكيت من البنزين لأنى فولت مره وكانت النتيجه سيئة وفعلا قلولى العربية لسه فى التليين والنسب حتختلف
والحمد لله اختلفت.
انا معاك بردك ان مسألة اقصى عزم عند 4400 لفه دى مسألة رخمة جدا لكون 4400 لفه ده حرق وبيزود الإستهلاك بس فى
نفس الوقت المعلومة دى مكنتش معروفة والموضوع محتاج معايشة مع الموتور وحضرتك مع الوقت حتعرف ازاى تطلع منه
اقصى اداء ممكن ...
والله أنا مش بحاول اخفف عنك بس حضرتك والله والحمد لله العربية اللى معاك ممتازة والأيام حتسبت الكلام ده والسواقة مش
سحب وجرى لازم تكون راكب عربية قوية وفيها عوامل امان وكماليات كويسة وثابتة وانت والحمد لله معاك ده
وافتكر الحادثة اللى شوفنها فى التوكيل ربنا يكفينا شر الحوادث العربية الكبوت كان ضايع والكابينة ما شاء الله سليمة
حضرتك قول الحمد لله ومع الوقت حتقول العربية راائعه
وتمنياتى لحضرتك وللجميع بالتوفيق
معلش حخش معاكم رغم اني مش ممتلك لبريلانس ولاحاجة .
بس حبيت اوضح نقطتين كدة من باب علمي و متابعتي للسيارات الصينية .
المحركان ال 1600 و ال 1500 من بريليانس تصميميات " قديمة " نسبيا بالنسبة للمحركات و ده ممكن تلاحظوه من ضعف القدرة الحصانية , وده مش عيب في المحرك او عيب صناعة يعني , لأ ده موديل محرك قديم شوية , فمتقارنش مثلا محرك زي ده مع محرك 1600 جديد مثلا من تويوتا او هيونداي .. مش لان المحرك سيء او صناعته وحشة , لأ ... لانه اقدم " تكنولوجيا " شوية ..
فاكيد حيكون على حساب سحب السيارة , و خلي بالك من حاجة .. عمر ما في مصنع صيني في مصر بيكتب ارقام التسارع من صفر الى 100 كم في الساعة .. علشان غالبا حتكون رقم كبير جدا .
يعني لو بصيتوا مثلا لاسبرانزا a516 - a620 و حتى الصغيرة a113 على موقع شيري الانجليزي , ارقام الصفر الى 100 كم في الساعة كبيييييييييييييييييييييرة جدا ! و غير واقعية ..
طبعا مش شرط بريلانس تكون كدة ..
بس من واقع اختبار قيادة صيني " ترجمته " قبل كدة .. لل fsv ال 1500 وال 1600.. قاله انه اداء السيارة جيد للمدينة انما متتوقع اداء سيارة رياضية يعني .
و ببساطة شديدة , سبب طرح المحرك ال 1500 مش علشان استهلاك البرنزين ولا اي حاجة ..
سبب الطرح الوحيد هو ان الصين عاملة قانون جديد بضرائب و مصاريف ترخيص مخفضة جدا جدا للسيارات اقل من 1600 سي سي لذلك اتجه كل مصنعي السيارات في هذه الفئة الى استخدام محرك 1500 سي سي ,, يحيث يكون مقارب لل1600 في الاداء و في نفس الوقت يستغل التخفيض الضريبي .
ماعدا النسخة الاوتوماتيك , لارتباط الجير الاوتوماتيك بتاع ال frv/fsv بالمحرك ال 1600 .
فمدايقوش نفسكم او تضيعوا وقتكم مع التوكيل علشان حيقرتحوا عليكم حلول ... ملهاش لازمة .. زي استعمال بنزين نضيف و اضافة محسنات للبنزين و النقل عند 3500 - 4000 بدلا من 2500-3000 ... و هكذا .
مع كامل احترامى ليك يا باشا
موتور السيارة تكنولوجيا حديثة من واقع البرشور بتاع السيارة
ويا استاذ حسين
السيارة زى الفل ما شاء اللة
لا تقلق من سحبها واللة العظيم كانت معايا كدة قبل 2000كم
هو فى الحقيقة انا متفق معاك فى حاجات و مختلف فى حاجات تانية و ده يمكن ان حضرتك علشان ماعندكش العربية دى تلاقيك ما قريتش عنها كفاية لان موتور السيارة دى و خصوصا موديل 2010 تكنولوجيا حديثة مش قديمة زى حضرتك ما بتقول و هى بأشراف تويوتا بدلا من الموديلات السابقة اللى كانت تكنولوجيا ميتسوبيشى - و موضوع ان البنزين كهرباء مش ميكانيكى ده كمان يمكن يكون له دخل كبير -
بالنسبة لتسارع السيارة مش وسيئ قوى بس لازم ال آر بي إم يصل الى 4500 علشان تديك العزم المطلوب و عموما انا بلاحظ فعلا ان السيارة بتحتاج انى انقل متأخر شوية لكى أحصل على العزم المناسب بس انا كنت بخاف على الموتور و بنقل عند 3000 لفة و ده اللى بيخلى عزم السيارة ضعيف و طبعا لو زودت زمن النقل هيكون على حساب سلامة الموتور و استهلاك البنزين يعنى فى الآخر هيه هيه بس يبقى ال 1600 احسن لآن العزم أقوى .
هو طبعا انا مع أ / مشمش 78 ان احنا شوارعنا و طرقنا ما تستحملش سرعة و انا مش من طبيعتى القيادة بسرعة لكن أحب الموتور اللى معايا تكون سرعة إستجابته جيدة للطوارئ ( يعنى مثلا زى ما شرحت من قبل فى مداخلات سابقة لو بطلع من سيارة على طريق سريع و الطريق ده فردة واحدة ممكن ملحقش اعدى من السيارة لو فيه سيارة مقابلة جايه فى وشى بسرعة بسبب ضعف عزم الموتور و بطء أستجابته للسرعة )
هو ده اللى انا بتكلم عنه و لكن انا مش داخل سباق - السيارة فى البلد مش وحشة على السرعات العادية و القيادة الهادئة ، لكن لو طالع مطلع زى المقطم مثلا و اللى انا بطلعه يوميا لأنى ساكن هناك بحس بضعف عزم السيارة و بأضطر انى اديها السرعة اللى قبلها علشان اعوض الضعف و بيبقى ال ( آر بي إم ) على 4000 - 4500 لفة