الموضوع: جاك a137 هاتشباك

بسم الله الرحمن الرحيم

انا الحمد لله استلمت العربية الجاك الهاتشباك 1300 cc و ده تقريري عنها بعد 1000 كم

بالنسبة للتقفيل الخارجي:
التقفيل الخارجي للصاج ممتاز؛ اللحام كويس. أما بالنسبة للاكصدامات ففيها عدم محاذاة يعني تلاقي طرف الاكصدام الوراني بارز عن الصاج و البيت المسامير اللي بتسبته من بلاستيك ضعيف شوية فأقل حكة في الاكصدام ممكن تكسره من مكانه

بالنسبة للأبواب:
أنا لقيت الباب اللي ورا يمين مش راكب مظبوط: فيه خلوص 3 مم في القفل بعد ما تقفل الباب فبسببه كنت باسمع صوت تخبيط في الباب و انا ماشي في طريق مكسر شوية.. بس قلتلهم عليه في صيانة الالف و هما ظبطوه و بقه زي الفل.. أما بالنسبة لصوت قفل الابواب فهو معقول. الابواب مش ناعمة قوي و انت بتقفلها بس برده مش ناشفة لازم تترزع... يمكن أنشف من النوبيرا سنة بسيطة..

التقفيل الداخلي:
تقفيل العربية من جوة ممتاز جدا كل حاجة ثابتة في مكانها مبتسمعش منها اي صوت و انت ماشي نتيجة الاهتزازات حتىعزل الصوت الخارجي كويس جدا..
خامات العربية ممتازة من جوة.. انا حطيط العربية في الشمس 6 ساعات و لما ركبتها ما شمتش اي رائحة غريبة من التابلوه او الفرش..

عجلة القيادة:
بالنبالي كنت حاسسها صغيرة و عايزة تكبر شوية عشان مكنتش بشوف منها العدادات و انا سايق...

أدوات التحكم في العربية (الدركسيون، البدالات، الفتيس)

الدركسيون مسكته مريحة بس انا لقيت زاويته مش مظبوطه يعني مايل 3 درجات في اتجاه عقارب الساعة عن عدلة العربية و هي ماشية بس العربية مش بتعوم (نسيت اقلهم يظبطوه في الصيانة). الدبرياج عالي شوية (بس انا متعود عليه عالي عشان كنت بأسوق 128 قبلها) و مشوار دواسة الفرامل طويل نسبيا. أما دواسة البنزين فـ مفيش عليها ملاحظات..
الفتيس كان فيه عضة بالذات في المارشدير بس اتظبططت في الصيانة

التكييف:

تكييف العربية معقول.. هو مش جامد أوي بس يدوب مكانش محسسني بالحر لما كانت درجة حرارة الجو 45 درجة في فترة الموجة الحارة مع العلم اني بشغله على أقل سرعة عشان آخد أقل درجة حرارة للهواء

السحب:
العربية سحبها مش عالي يعني ما يتعملش بيها سباقات او شد بين العربيات... بس كويسة لو كنت جايبها عشان تسوقها مش تسابق بيها
بالنسبة للسحب في حالة تشغيل التكييف، العربية ممكن تفصل منك لو انت على عدد لفات موتور قليل (أقل من 1100 لفة في الدقيقة) يعني هتلاقيها بتصقف كتير و انت في ماشي بالراحة جوة البلد و ممكن تفصل فلازم تزود رجلك على البنزين شوية بس لو انت ماشي على الهاي واي مش هتحس بفرق في السحب بتكييف او منغيره (2500 لفة في الدقيقة و انت طالع)

استهلاك الوقود:

أنا بحط في العربية بنزين 92 .. سعة خزان الوقود 45 لتر، لمبة البنزين بتنور لما يبقى فاضل فيها تقريبا 5 لتر

أنا لغاية دلوقت مليتها مرتين

اول مرة استهلكت 40 لتر في 450 كم
و تاني مرة استهلكت 39.5 لتر في 550 كم

مع العلم ان مشاويري مختلفتش في الحالتين و انا ما سافرتش بيها برة القاهرة و مزودتش سرعة الموتور عن 3000 لفة في الدقيقة و كنت بشغل التكييف في أغلب الاوقات...

العفشة:
بصراحة انا مبفهمش في العفشة كويس بس أكيد فيه فرق شاسع بينها و بين الـ128

الصيانة::

مركز صيانة الجاك اللي رحته كان هو مركز خدمة رجب في الكيلو 6.5 طريق مصر اسكندرية الصحراوي.. مواعيد العمل هناك من الساعة 9 صباحا إلى 5 مساءا

أنا رحت هناك الساعة 12:30 الظهر .. قبلت مهندس الاستقبال.. قلتله على ملاحظاتي في العربية (الباب ورا يمين + عضة الفتيس) و اني عايز اعمل صيانة الالف كيلو.. عاين العربية و كتب تقريره و اداني كتيب ضمان العربية ( هأصوره و أرفعه لاحقا هو و جدول مصنعيات الصيانات) قعدت في مكان انتظار العملاء المكان كويس بس مفيهوش ولا سلة زبالة و الراجل بتاع الاوفيس شغال بمزاجه حوالي ساعتين مش لاقيه بس اللي كان مسليني ان فيه واي فاي فالواحد ممكن يروح بالاب توب بتاعه و يعيش على النت هناك لغاية ما العربية تخلص..

بالنسبة لورشة الصيانة:: اللي لاحظته ان 6 أوناش هما بس اللي شغالين من أصل 12 اللي شفتهم و مفيش نظام واضح او ترتيب للحاجات اللي بتتعمل على العربية (يعني تحس ان الموضوع بالبركة و مفيش دور للعربيات)

انا اتغيرلي زيت موتور (شل 5000 كم) و زيت فتيس بس مغيرش فلتر الزيت مش عارف ليه.. مصنعيات اول صيانتين الالف و الـ 5000 كم مجانية
تكلفة صيانة الالف كانت 171 جنيه مصري

زيت موتور 105×1 جنيه
زيت فتيس 15×4 = 60 جنيه
ضريبة 6 جنيه

اجمالي 171 جنيه


أرجوا ان تقريري يكون مستوفي للنقط الاساسية و أي استفسارات ممكن تراسلوني على الايميل hiheha@hotmail.com