السلام عليكم ورحمة الله وبركاته
في البداية أنا عامل الموضوع عشان بعض الاعضاء اللى طلبوه و اخص أخويه الاستراوي اللدود نوبل حبيبي قلبي
لأنه كان طلبه مني بقاله فتره كبيره و أنا والله مكنتش ناسي ولا حاجه
بس ظروف اللي كانت عندي مخليانى غبت عن المنتدى فترة كبيرة أوي
نبطل رغي بقة وندخل في الموضوع
ده الكيت الاصلى للفلتر و ده اسمه Cold Air Intake يعنى المفروض ان الهوا بيدخل للعربيه بارد
من الماسوره رقم 1 اللى فى الشبكه و ينتقل الى الماسوره رقم 2 الوصله مابين رقم 1 و العمه
اللى هنعميله اننا هنركب فلتر الاسبيد على الماسوره دى اللى هيه رقم 3



أولا الأدوات المستخدمة مفك عادة و بنسة ببوز لو احتجناها فى ربط الاولسية بعد فكه(لما نوصل للأخر)
نبتدي الشغل بقة
1- تيجي بالمفك العاده و تفك الاولسيه ده بالطريقة دى

2- خد بالك الاولسيه ده ممكن يعمل الإله و يطير في وشك
فا إحنا نمسكه بأيدنا الشمال و نتبدى باليمين نفك كده

3- هتلاقى خورطوم صغير اسود مربوط فى العمه بالكلبس ده هترجعه لورا هيتفك على طول
4- تجيب المفك العاده برده وتفك المسمار بتاع العمه

5- تبتدي تفك الكلبسات بتاعت العمه وتفك الجزء اللى فوق بتاع العمه

6- الماسوره رقم 2 اللى هى واصله مابين رقم 1 و العمه و دى راكبه كبس فى العمه

هنحاول براحه نفك الواصله عن العمه و نخرجها بميل ذى ما فى الصوره كدا

كده يبقى احنا لغينا العمه دى كده خاااااااااالص

7- نجيب الفلتر الاسبيد او الاسبورت او اى ان كان اسمه
نركبه بكل سهوله على الماسوره بتاعت العمه

8- بالمفك الصليبه و تربط المسمار بتاع الاولسية بتاع الفلتر الجديد
نيجى بقه للأولسيه الاصلى بتاع العمه و نربط بيه الماسوره اللى متركبه فى الفلتر
عشان متتحركش كل شويه و تعملنا مشكله
ممكن نربطه هنا مفيش قلق لأن الفلتر وزنه خفيف مش تقيل
و هنستخدم الاولسيه الاقلى اللى فكناه و نربط بالماسوره اللى ببوز اللى قولنا عليها

كده احنا خلاص ركبنا الفلتر و كله تمام


فى عندك هنا الماسوره رقم 2 او الواصله سيبها ركبه متفكهاش

عشان دى بتاخد الهوا اللى جاى من الشبكه من بره العربيه و تديه للفلتر ودى اسمها Cold Intake
و مع المشي دى بتساعد على تجديد الهوا اللى داخل للفلتر و تحاول تقلل من درجه حراره الهوا اللى جوه الحوض

الهوا اللى بيدخل للماسوره رقم 1 بيدخل من الفاتحه اللى فى الصوره دى من ورا الشبكه

نيجى بقة لمزايا و عيوب الفلتر ده
نبتدى بالعيوب عشان نسيب المزايا نحلى بيها
1- الفلتر بيسخنك على طول على الجري و ده اللى بيخلى العربيه تبقى مسرفه شويه فى البنزين(بس مش معنى كده انها هتكله اكل)
عشان صوته بجد تحفه يحسسك انك راكب موتور 3000 مثلا(وعلى فكره صوته مش بيظهر إلا في القرص بس او الكبس)و دى ميزه طبعا
يعنى مش ذى الديفل خالص عمال بيجعر على طول و يزعجك في السفر لو أنت دايس او بتجري
و غير كده صوت القلتر انعم بكتير
يعنى للناس اللى مش بتحب الصوت ده طلما بيسوق عادى من غير قرص او كبس الصوت مش هيطلع ابدا
2- الفلتر بيسحب هوا سخن من داخل الحوض و ده بيخلى العربيه مكتومة اوى فى الصيف و خصوصا مع ارتفاع درجه الحرارة و التكييف شغال تحس انك راكب بطه بلدى (عشان كده لا أفضل تركيبه فى الصيف)
و ده بيرجع لإن الفلتر متركب (Short Ram Intake) و الفلتر الأصلى بتعها Cold Air Intake
عشان كده لو تلحظوا انى ملغيتش الماسوره رقم 2 ولا 1 عشان بقدر الامكان يجددوا الهوا اللى فى الحوض
نيج بقى لمزايا الفلتر:-
1- ذى ماقولت فى الاول الفلتر صوته مش بيظهر خالص الا فى القرص بس او الكبس يعني لو انت مسافر و ماشى على RBM عالى الفلتر صوته مش هيظهر ولا هيضيقك ذى ما الديفيل بيعمل
2- التسارع بتاع العربيه اعلى و استجابه الموتور اسرع وده نتيجه ان الموتور بيتنفس احسن و ده بيرجع لسببين الاول ان معدش فى عوائق كتير زى العلبه و المسورتين اللى قدام العلبه اللى فيهم كرفات بتعمل على اعاقه الهوا اللى داخل للموتور (هتحس بالكلام ده اكتر بكتير فى الشتاء عن الصيف)
3- السبب التانى هقوله هنا ان الفلتر ده مسامه اوسع من مسام الفلتر الاصلى و بيسهل على الموتور التنفس(تخيل كده لو انت ماسك شاليمو رفيع و عمال تشفط هوا و مره واحده شديت الشاليمو و انت بتشفط هتلاقى كميه الهوا اللى داخله بقيه مضاعفه اكتر)المثال ده قالهولى البشمهندس ممدوح
4- الفلتر مش بيتغير سهل التنظيف بيتغسل بالميه والصابون عادى و بيرجع زى الفل

ملاحظاتي عن الفلتر بعد التجربه و التركيب
1- الفلتر معايا بقاله اكتر من 8 شهور يعني جربته فى الشتى و الصيف
فى الشتى اداء الفلتر مع العربيه اكثر من رائع بس فى الصيف انا مركب الكيت الاصلى بتعها عشان التكييف و السواقه جوه البلد وكده لأن الهوا السخن مع الحر اللى احنا فيه ده بيخلي العربيه مكتومه
عشان كده انا بكررها (لا يفضل تركيبه فى الصيف)
و ان شاء الله هظبط كيت ColdAir لفلتر الاسبيد بأقل التكالييف عشان امشي بيه فى الصيف و اول ما اخلصه هرفع الصور و عمله فى موضوع كمان
2- العربيه لو انت ماشي بالراحه من غير قرص و كبس و الكلام ده
استهلاك البنزين اتحسن انا مكنتش مصدق إلا لما حسبتها نظريا و كملت التجربه عمليا
نظريا ذى ماقلت الفلتر احنا مركبينه Short Ram Intake و هنا الAir Mass مش عبيط
هيلاقى ان الهوا اللى داخل من الفلتر سخن و كميه الأكسجين فيه قليله
و هيدي امر للكنترول بان يدي بنزين قليل على قد كميه الاكسجين و درجه حرارته
3- الفلتر مسامه اوسع من الفلتر العادى و ده ممكن يخلى التراب يدخل للموتور
عشان كده بعض الفلاتر العاليه ذى الK&N بيجي معاه زيت بيتحط بعد كل عمليه تنظيف للفلتر
اما الفلاتر ذى الSimota و الAeroSpeed مش بيجي معاها الزيت ده
بس انا بستخدم زيت الباور العادي بعد كل عمليه تنظيف لزيادة كفائه الترشيح و عن تجربه فعليه معدش فيه نقطه تراب واحده جوه الماسوره
و الطريقه انك بتديله فرشه زيت باور بس قبل التركيب
نيجي بقى لسؤال حلقه النهارده :-
طيب بدام الفلتر ده فوايده كتيره اوى كده ليه الخواجه مش بينزله مع العربيه؟
الجواب
1- ان الفلتر مصنوع من مواد اغلى بكتير من المواد اللى مصنوع منها الفلتر العادى
2- اهم حاجه عند الخواجه ان العر بيه دى تكون صوتها واطي فى حاله القرص او غير القرص
3- يهمه ان العربيه تعمل اقل متوسط معدل استهلاك للوقود فى جميع الحلات القرص او الغير القرص سواء فى الشتاء او الصيف
و بكده نوصل لختام حلقتنا النهارده
و اى استفسار انا تحت امركم
يارب مكونش طولت عليكوا
ارجوا من الاداره تثبيت الموضوع هنا فى القسم لتعم الفائده