بسم الله الرحمن الرحيم
اولا اعتذر عن غيابى وقلة مشاركاتى وذلك نظرا لانشغالى الشديد وضيق الوقت
واليوم اتى لكم بمقارنة بسيطة بين توكيلين تعاملت معهما شخصيا واحببت ان انقل لكم
انطباعى عنهما وهما توكيل دايهاتسو(ابو رواش) وتوكيل سكودا(دير الملاك)
اولا: نظام حجز المواعيد:
دايهاتسو: يوجد
سكودا: لا يوجد وانت وحظك
ثانيا: مساحة مركز الصيانة:
دايهاتسو: مساحته كبيرة ويستوعب عدد كبير براحة تامة
سكودا: مركز ضيق تضطر الى الانتظار فى الشارع حتى ياتى دورك لتدخل الى مكان ضيق تتحرك فيه بصعوبة شديدة ولازم تكون بتسوق كويس .
ثالثا: الاستقبال:
دايهاتسو: استقبال راقى من اول موظف الامن على البوابة وحتى موظفة الاستقبال اللى بتستلم منك رخصة العربية لتاخذ دورك حتى مهندس الاستقبال اللى بيستلم منك العربية
سكودا: استقبال عادى
رابعا: صالة انتظار العملاء:
دايهاتسو: صالة كبيرة وحديثة مجهزة باحدث التجهيزات من اثاث الى وسائل ترفيه للعملاء من انترنت الى شاشة بلازما كبيرة لمشاهدة الديش او لعب البلاى ستيشن الى ركن خاص للاطفال مجهز بالعاب كثيرة للتسلية الى بوفيه شيك اوى للمشروبات المجانية بالاضافة الى واجهه زجاجية كبيرة تطل على مركز الصيانة وتكشفه بالكامل سواء اماكن انتظار السيارات قبل دخول الصيانة او بعد دخولها حيث تستطيع متابعة اعمال الصيانة بالكامل
سكودا: صالة انتظار صغيرة فقيرة التجهيزات وواجهه زجاجية صغيرة تكشف جزء صغير من مركز الصيانة مع وجود بوفيه متواضع للمشروبات (المفروض انها مجانية والله اعلم وساذكر لكم التجربة)
خامسا:مستوى الصيانة:
دايهاتسو: مستواهم عالى وحافظين العربية كويس والمركز مجهز باحدث الاجهزة المطلوبة
لاتمام الصيانة بسرعة ودقة ويتم تسليمك العربية مغسولة ولو معجبكش الغسيل ممكن
يغسلوها مرة واتنين حتى ترضى .
سكودا: شكلهم حافظين العربية برده بس تجهيزات المركز شكلها محدود مش بمستوى
دايهاتسو والصيانة غير شاملة غسيل العربية ولو حبيت تغسلها يبقى منك للعامل .
سادسا: مستوى النظافة:
دايهاتسو: مستوى خمس نجوم.
سكودا: نجمتين او تلاتة بالكتير.
سابعا:مستوى التعامل(مهندسين):
دايهاتسو: راقى جدا يشعرك بانك عميل مهم بالنسبة لهم .
سكودا: جيد .
ثامنا: مستوى التعامل(فنيين)
دايهاتسو: ممنوع التعامل مع الفنيين من اساسه وممنوع عليهم التعامل مع العملاء .
سكودا: الفنى بيحاول يلاقى اى فرصة يتودد اليك بيها عشان يحسسك انه مهتم بالعربيةوعشان ياخد منك تيبس .
تاسعا: مستوى التعامل(عمال نظافة وبوفيه):
دايهاتسو: ممنوع منعا باتا على عمال النظافة التحدث مع العملاء وتجدهم منتشرين فى كل مكان لمتابعة النظافة اما عن عمال البوفيه فعن تجربة شخصية فى مركز العبور سابقا ومركز ابو رواش حاليا فقد حاولت مرارا انى اديهم تيبس بالحاح شديد منى وبينى وبينهم مش ادام حد الا انهم كانوا بيرفضوا بشدة وفشلت كل محاولاتى معاهم رغم مستوى البوفيه العالى سواء للكبار او ما يقدموه للاطفال من سناكس يتسلوا بيها.
سكودا: ملمحتش عامل نظافة اثناء الزيارة اما عن عامل البوفيه فكنت طلبت نسكافيه ومعلوماتى ان المشروبات مجانية وده اللى خلانى امشى من غير ما اسال على الحساب فلقيته نازل ورايا بيقولى حساب النسكافيه طبعا اتفاجئت وقلتله انى اعرف انه مجانى
فقال لا احنا بنحاسب عليه وكنت وقتها بحاسب على الخزنة فرد محاسب الخزنة وقالى
فعلا هم بياخدوا حساب المشاريب !!
ورغم شكى فى صدقهم الا انى مكنش عندى وقت ولا طولة بال انى اتاكد من صحة
ده وقلت فى نفسى لو فعلا بياخدوا حساب المشاريب يبقى عيب اوى على توكيل كبير
زى سكودا ولو مبياخدوش والعامل اشتغلنى يبقى برده عيب على عامل غير امين بالشكل
ده محطوط عشان يسوء صورة التوكيل
صحيح الحساب كلام فارغ يعنى 3ج مش حكاية بس احرجنى وحسسنى اكنى عارف انى
المفروض احاسب ومطنش
طبعا النقيض حصل فى دايهاتسوا زى ما حكيت لكم بل انى كان نفسى عامل البوفيه
يقبل ياخد منى ولكنه رفض ...طبعا نزاهة تدل على نزاهة الادارة .
عاشرا: مستوى اسعار الصيانات:
تقريبا واحدة فى الاتنين
اخيرا: الانطباع النهائى:
دايهاتسو: توكيل محترم تحس انك عميل مهم عندهم وانهم حريصين جدا على ارضاءك وعلى تحبيبك فى عمل الصيانات عندهم ويخلوك تتغاضى عن بعض عيوب عربياتهم ان وجدت
بمستوى الخدمة العالى عندهم .
سكودا: توكيل عادى تحس فى الاخر انك عايز تقول ( هى دى مصر وهو ده التوكيل المصرى رغم ان موديلات سكودا كلها عالية وقيمة الا ان توكيلها خدمته عادية زى اى او معظم الخدمات فى مصر)
الله اعلم مستواهم حيكون ايه فى المركز الجديد اللى فى المعادى اللى مش عارف فتحوه ولا لسة بيشاوروا عقلهم.
اتشرفت فى الصيانة قبل اللى فاتت بمقابلة محمود موتوريزر والحقيقة وقف معايا جامد فى موقف بعيدن احكيلكم عنه وصمم ينتظر معايا للاخر رغم ان عربيته خلصت من بدرى وانا بشكره جدا جدا
وكمان بشكر ابوعبدالله اللى محمود كلمه واخذ مشورته والراجل متاخرش.
كمان اتشرفت جدا بمقابلة احمد باجنيد وكانت فرصة عظيمة اننا نكون مع بعض كلنا فى نفس الوقت .
اشكركم والى اللقاء
