والله اخر زمن .......... سلسلة الغزو الصينى
القصه بالظبط حصلت مع زميل ليا فى العمل وكما يروى لى
رن جرس الباب قام يفتح وجد امامه شاب صينى ومعه فتاه صينيه
طبعا اعتقد كالمعتاد انهم بيبيعو منتجات صينى على البيوت
لكن المفاجئه ان الشاب قدمله نفسه بالعربى المكسر انه حلاق
وان البنت اللى معاه كوافيره حريمى يعملون متجولون بالمنازل
والحلاقه شعر وذقن مقابل 5جنيه بس باجهزه حلاقه متطوره ومعقمه
وان التعقيم سيتم امامه
ومعاه مجله عباره عن كتالوج لاحدث قصات الشعر اللى تختارها بنفسك
والبنت الكوافيره تعمل معه بس حريمى يعنى للمدام
وكل اعمال الكوافير اللى بتعملها برضه مقابل 5 جنيه فقط
وممكن يتفق معاك على موعد ثابت تحدده معاهم للحضور كل مره
ويحضر فى الميعاد بالظبط كما تحدده
وعلى فكره زميلى ساكن فى منطقه عين شمس
بس مارضيش يتعامل معاهم وخاف انه يدخلهم بيته
وبعد كده عرف انهم كتير ومقسمين نفسهم على الاحياء الشعبيه
.................................................. .....................................
الغريب فى الامر ان الشباب الصينين دول بييجو من بلدهم عندنا
وبيبتدعو فرص عمل لانفسهم وبيعرفو ازاى يكسبو الزباين
فى نفس الوقت اللى شبابنا بيهرب من البلد علشان مش لاقى
..........فرصة عمل
انا مش بنتقد حد ابدا علشان ماحدش يزعل منى
لكن صدقونى انا نفسى مابقتش فاهم حاجه
هل احنا فعلا مش لاقيين فرص عمل ولا مش عارفين نشتغل ازاى